Uyghur rayoni da'irilirining pompéyoni tenqidlesh üchün asasi qatlamlargha buyruq chüshürgenliki delillendi

26-Yanwar küni birleshme agéntliqning béyjingda turushluq muxbiri dakikang özining twéttir hésabida Uyghur aptonom rayonluq hökümetining hökümet xizmetchilirige ewetken bir körsetmisining kopiyesini ashkarilidi. Körsetmining bash qismida mundaq bayanatlar yer alghan: “Organlar we teshkilatlar, yéqinda amérika sabiq tashqi ishlar ministiri pompéyoning junggogha qarshi qilghan sözige jawaben qisqa sin ishlenglar, sin körünüshi üchün: 1) xitay tili yaxshi bolghan Uyghur xizmetchilerni tallanglar. 2) Pompéyoning sözige éniq pozitsiye bildürünglar”.

Biz bu uqturushning emeliylishish ehwalini aydinglashturush üchün xotendiki alaqidar organlargha téléfon qilduq. Xoten qariqashtiki bir edliye ponkiti xadimi bu körsetmini herderjilik partkom teshwiqat organliri bilen edliye we saqchi organlirining birlikte teshwiq qiliwatqanliqi hem orunlashturuwatqanliqini ashkarilidi.

Mezkur körsetmining dawamida, ishlinidighan widiyoluq bayanatlarda “Pompéyoning junggogha qarshi sözige qet'iy qarshi turimen, méning uninggha ghezipim keldi” dégen jümlilerni qollinish alahide telep qilin'ghan. Körsetmide bu bayanatlarning, partiyeni, döletni we Uyghur rayoni weziyitini medhiyelesh bilen axirlishishi telep qilin'ghan. Déyilgendek, yéqinqi bir heptidin buyanqi pompéyogha qarshi bayanatlarda, set we edepsiz jümliler qollinilghan bolsa, atalmish milletler ittipaqliqi weziyitige qarita “Anarning danisidek uyushush” qatarliq bettem oxshitishlar yer alghan.

Körsetmide yene, “Men junggoluq, men wetinimni söyimen, men xizmet we turmushta xushalmen” dégen jümlilerni ishlitish shert qilin'ghan.

Xoten qariqashtiki saqchi xadimliri ahalilerni pompéyogha qarshi bayanat bergüzüsh üchün yuqiridin uqturush tapshuruwalghanliqini delilligen bolsimu, öz tewelikidin pompéyogha qarshi gep qilishqa kimlerni békitkenliki heqqide melumat bermidi. Qariqash bazarliq saqchixanidiki yene bir xadimmu, özlirining mezkur körsetme boyiche orunlashturush élip bériwatqanliqini ret qilmidi. Emma u bayanat bergüzüsh üchün kimlerge némilerni ögitiwatqanliqi heqqidiki so'alimizgha jawaben, buning dölet mexpiyetliki ikenlikini tekitlep, jawab bérishni achchiqlan'ghan halda ret qildi.

Hörmetlik radi'o anglighuchlar, melum bolushiche, amérikaning sabiq tashqi ishlar ministiri mayk pompéyogha qarshi bayanat bergenler qatarida, Uyghur kishilik hoquq we démokratiyeni ilgiri sürüsh jem'iyitining re'isi rabiye qadir xanimning newrisi aydidar qaharmu bar bolup, rabiye xanim aldinqi küni bu teshkilat tor bétide bayanat élan qildi؛ in'glizche we Uyghurche ikki xil tilda élan qilghan mezkur bayanatta, xelq'ara jama'etke mundaq so'al qoyulghan: “Yéqinqi 30 yilda, xitayning qaysi bir puqrasi, bir ministir emes, bir yéza bashliqini tenqid qilip baqti? tenqid qilghuchilar bolghan bolsa, ularning aqiwiti néme boldi? démek, 38 uruq-tughqini türme we lagérgha tashlansa, uni sürüshtimu qilalmighan, méning téléfonumni élishqimu jasaret qilalmaydighan newremge, xitayning gholluq axbaratida tenqidiy pikir bayan qilish jasariti nedin kelgen we u erkinlikni uninggha kim bergen?”.

Bu teshwiqatning eqliy normal ademni aldiyalmaydighanliqini ilgiri sürgen, rabiye qadir xanim, xitay terep irqiy qirghinchiliq jinayiti sadir qiliwatqan bolghachqa, könglidiki jinayet tuyghusining tesiri bilen teshwiqatchiliqta özining eqliy tengpungluqini yoqitip qoyghanliqi we bashqilarning eqliy qabiliyitini xata mölcherlewatqanliqini tekitligen. U, xelq'ara jama'etni xitayning bu derijide töwen sewiyelik özini aqlashlirini diqqet bilen közitishke we weziyet heqqide aqilane höküm chiqirip Uyghur qirghinchiliqi mesiliside toghra meydanni tallashqa dewet qilghan.

Hörmetlik radi'o anglighuchilar, yuqirida, xitayning Uyghur rayonida amérika sabiq tashqi ishlar ministiri mayk pompiyogha qarshi bayanat élan qilish heqqide uqturush chüshürgenlikining delillen'genliki diqqitinglargha sunuldi.