Қаһарҗан қавулниң аниси: «хитай оғлумниң өлүмини 6 ай биздин йошурди»

Мухбиримиз шөһрәт һошур
2019-06-27
Елхәт
Пикир
Share
Принт
Қаһарҗан қавулниң аниси таҗигүл вә ачиси гүлҗамал. 2019-Йили, түркийә.
Қаһарҗан қавулниң аниси таҗигүл вә ачиси гүлҗамал. 2019-Йили, түркийә.
RFA/Shöhret Hoshur

Откән йили ақсуда лагерда җан үзгән қаһарҗан қавулниң түркийәдики аниси таҗигүл вә ачиси гүлҗамалниң бүгүн радийомизға баян қилишичә, хитай даирилири қаһарҗанниң өлүмини аилисидин 6 айчә йошурған. Ахири әһвални бейҗиңдики түркийә әлчиханиси сүрүштә қилғандин кейинла ашкарилашқа мәҗбур болған. Һазидар ана-бала бүгүнки сөһбитимиз давамида қаһарҗанниң из-дерикини қилиш җәряни вә униң лагерға елип кетилишигә сәвәб болған түркийә сәпири һәққидиму мәлумат бәрди.

Мәлум болушичә, 22 йилдин бери түркийәдә яшаватқан вә түркийә пуқраси болған таҗигүл һәмдулла оғли қаһарҗан қавул билән әң ахирқи қетим 2017‏-йили 5‏-айда ақсуда көрүшкән. У шу қетим түркийәгә қайтип келип икки айдин кейин, йәни 2017 ‏-йили 7 ‏-айдин башлап оғли билән болған алақиси пүтүнләй үзүлгән. Униң 2 йилдин буян оғлиниң из-дерикини елиш үчүн қилған пүтүн тиришчанлиқлири һечқандақ үнүм бәрмигән.

Бу һәқтә таҗигүл һәмдулланиң түркийәдики қизи, қаһарҗан қавулниң һәдиси бәзи мәлуматларни бәрди. Униң дейишичә, арилиқта буларниң бәзи тонушлири қаһарҗанниң камандиропкиға чиқип кәткәнликини ейтқан болсиму, әмма уларниң ялвуруп туруп ейтқан қаһарҗанниң бир парчә рәсимини болсиму көрүш тәлипи җавабсиз қалған. Ахири көңли бир шумлуқни туйған таҗигүл һәмдулла билән қизи гүлҗамал түркийә ташқи ишлар министирлиқиға берип, оғлиниң ғайиб болғанлиқ әһвалидин мәлумат бәргән вә из-дерикини елип беришни тәләп қилған. Дәрвәқә, икки айдин кейин әлчиханидин җаваб кәлгән. Җавабта хитай тәрәп тәминлигән учурларға асасән икки балиниң дадиси 41 яшлиқ қаһарҗан қавулниң бултур 11-айда кесәл сәвәби билән өлгәнлики уқтурулған. Улар бу уқтурушқа, болупму қаһарҗан қавулниң кесәл сәвәби билән өлгәнликигә қәтий ишәнмигән. Улар түркийә әлчиханисидин бу һәқтә техиму тәпсилий мәлумат тәләп қиливатқан бир мәзгилдә униң оғлиниң лагерда өлгәнлики хәвири ахбаратқа ашкариланған. Оғлиниң лагерда өлгәнлик учурини уйғур кишилик һоқуқ вә демократийә фондиниң тор бети вә радийомиз хәвәрлиридин уққан таҗигүл һәмдулла хитайниң оғлиниң өлүми вәқәсидә һәм қатиллиқ һәм сахтипәзлик қилғанлиқи һәққидә шикайәт қилған.

Биз түркийә тәрәпниң бу вәқәгә қанчилик дәриҗидә вә қандақ усулларда арилашқанлиқини билип беқиш үчүн бейҗиңдики түркийә әлчиханисиға телефон қилдуқ. Әлчихана хадими бу ишқа алақидар хадимниң нөвәттә иш үстилидә йоқлуқини ейтип, бу һәқтики соаллиримизни елхәт арқилиқ йоллишимизни тәвсийә қилди. Биз бейҗиңдики түркийә әлчиханисиға елхәт әвәткән болсақму, әмма улар аридин 24 саәт өтүпму бу һәқтики соаллиримизға җаваб қайтурмиди.

Таҗигүл һәмдулланиң дейишичә, қаһарҗан қавул 1997 ‏-йили түркийәгә келип бир йерим йилчә турған вә көнәлмигәндин кейин юрти ақсуға қайтип кәткән. Таҗигүл алдинқи йили ақсуға барғинида оғли қаһарҗанни тәкрар түркийәгә көчүп келишкә дәвәт қилған болсиму, у йәнила ақсуда яшашни таллиған. Оғлиниң аилисини беқиштин башқа ой-хияли йоқлуқини илгири сүргән таҗигүл ханим уйғур райондики көп сандики кишиләр қатарида оғли қаһарҗанғиму увал қилинғанлиқи вә хитайниң пүтүн уйғур миллитиниң яшаш һәққини дәпсәндә қиливатқанлиқини баян қилди.

Мәлум болушичә, қаһарҗан қавулниң аниси таҗигүл вә ачиси гүлҗамал қаһарҗан қавулниң өлүминиң сәвәби вә тәпсилати һәққидә түркийә әлчиханисидин йәнә мәлумат күтмәктә икән.

Пикирләр (0)
Share
Толуқ бәт