Лагерда өлгән қаһарҗанниң ачиси: хитайға қарита еһтиятчанлиқимиз карға кәлмиди, йүрәк паримиздин айрилдуқ

Мухбиримиз шөһрәт һошур
2019-07-10
Елхәт
Пикир
Share
Принт
Қаһарҗан қавулниң ачиси гүлҗамал ханим(оттурида ақ көңләклик) аниси таҗигүл ханим(гүлҗамалниң оң тәрипидә) түркийәдики туғқанлири билән биллә.
Қаһарҗан қавулниң ачиси гүлҗамал ханим(оттурида ақ көңләклик) аниси таҗигүл ханим(гүлҗамалниң оң тәрипидә) түркийәдики туғқанлири билән биллә.
RFA/Shöhret Hoshur

Мәлум болушичә, өткән йили ақсуда лагерда җан үзгән қаһарҗан қавулниң түркийәдики аниси вә ачиси, ақсудики уруқ-туғқанлириниң бихәтәрликини көздә тутуп, 20 йилдин буян түркийәдики уйғур җамаити вә тәшкилатлиридин узақ туруп кәлгән. Мана бу еһтиятчанлиқниң һечқандақ карға кәлмигәнлики, әксичә бу аилиниң бу дәриҗидә еғир зиянкәшликкә учришиға сәвәб болуп қалғанлиқини илгири сүргән ана-бала буниңдин кейинки һаятида, зулум вә һәқсизлиққа һәргиз сүкүт қилмайдиғанлиқини баян қилди.

Мәлум болушичә, түркийәдә 4 ресторанниң саһиби болған вә йолдиши ташқи сода билән шуғуллинидиған гүлҗамал ханим бу чағқа қәдәр хитайға қарши һәрикәтләрдин узақ турса вәтәндики аилә-тавабиатлириниң аваричиликкә учримайдиғанлиқиға ишинип кәлгән. Шуңа улар, өткән 20 йилда түркийәдики уйғур тәшкилатлириға йеқин йолимиған; уйғурлар олтурақлашқан мәһәллиләрдин йирақ җайлардин макан тутқан. Иш-тиҗарәттин башқа, уйғурларға алақидар һечқандақ бир иҗтимаий вә сиясий паалийәтләргә қатнашмиған. Шундақ туруқлуқ гүлҗамалниң қериндиши қаһарҗан қавул лагерда җан үзгән. Униң аяли, икки балиси вә башқа биваситә туғқанлиридин 10 ға йеқин кишиниң из-дерики болмиған.

Бу ақивәткә асасән өзиниң бүгүнгә қәдәр уйғурларниң әһвалини дуняға аңлитиштин ибарәт йоллуқ вә зөрүрий һәрикәтләргә қатнашмиғанлиқиниң хата болғанлиқини тонуған гүлҗамал ханим хитайниң пәйлини толуқ чүшәнмәй қалғанлиқини өкүнүш билән тилға алди вә өз виҗдани бурчи һәм қалған туғқанлириниң бихәтәрлики үчүн буниңдин кейинки һаятида җим турмайдиғанлиқи, чәтәлдики барлиқ уйғур паалийәтчи вә тәшкилатлар билән йеқин һәмкарлиқ ичидә өтидиғанлиқини баян қилди.

Мәлум болушичә өткән һәптә гүлҗамал вә аниси түркийәдики алақидар һөкүмәт органлириға берип, қаһарҗан қавулниң түркийә әлчиханиси өзлиригә хәвәр қилғинидәк кесәл сәвәби билән өйидә җан үзгән әмәс, бәлки лагерда җан үзгәнлики һәққидә мәлумат бәргән вә қаһарҗан қавулниң өлүм сәвәби һәм башқа уруқ-туғқанлириниң из-дерики һәққидә мәлумат елип беришни тәләп қилған. Алақидар хадимлар бу әһвални ташқи ишлар министирлиқи арқилиқ қайтидин сүрүштә қилидиғанлиқини билдүргән.

Қаһарҗан қавулниң аниси вә ачиси қаһарҗанниң өлүми һәққидики учурни әң дәсләп түркийә әлчиханисиниң өзлиригә йәткүзгәнликини баян қилғаниди. Өткән һәптә телефонимизни қобул қилға хитайдики түркийә әлчихана хадими қаһарҗан қавул һәққидә өзлириниң илгири ениқлаш елип барғанлиқи вә еришкән учурини әйнән мәзкур аилигә йәткүзгәнликини баян қилди. Бу хадим бизниң қаһарҗанниң өлүм учурини нәдин алғанлиқимизни сориди. Биз униңға мәзкур аилидин вә ақсудики алақидар хадимлардин игилигәнликимизни баян қилдуқ. Биз униңдин хитай тәрәп өзлиригә йәткүзгән учурниң тоғра-хаталиқиға қандақ қарайдиғанлиқини сориғинимизда, у бу һәқтә бир нәрсә дейәлмәйдиғанлиқини ейтти.

Толуқ бәт