“вәтәнпәрвәр” диний зат абдулла нураҗи йәттә яшлиқ балиниң өлүми һәққидә мәлумат бәрди (1)

Мухбиримиз шөһрәт һошур
2013-04-12
Share
xumdan-305.png Хумдан
Public Domain

Хитай даирилири 3 һәптидин бери пичанда йүз бәргән 7 яшлиқ уйғур балиниң 52 яшлиқ хитай ишчи тәрипидин чанап өлтүрүлүш вәқәсини изчил йошуруп кәлмәктә. Мухбиримиз бүгүн вәқәни нәқ мәйдандин көргән вә һөкүмәт тәрәптә туруп, вәқәни җимҗит бесиқтуруветишкә һәссә қошқан аталмиш вәтәнпәрвәр диний зат абдулла нураҗини зиярәт қилди. Пичан наһийилик ислам җәмийитиниң муавин рәиси болған абдулла нураҗи, өзиниң хитайға көрсәткән хизмитини тонуштуруш билән бирликтә 7 яшлиқ балиниң өлтүрүлүш, йәрликидә қоюлуш вә вәқәгә наразилиқ билдүрүп қаршилиқ көрсәткән яшларниң тутқун қилиниш җәрянлирини паш қилди.

Абдулла нураҗиниң паш қилишичә, у йезилиқ партком рәһбәрлириниң хәвәрләндүрүши вә йетәклиши билән шу күни йәни 21-март күни саәт 4 тә нәқ мәйданға-бала өлтүрүлгән хумданға йетип барған; барғинида сақчилар вәқә йүз бәргән өй вә әтрапини қоршап болған болуп, нәқ мәйданни муһапизәт қиливатқан икән. У шу мәйданда өлгүчиниң аилә-тавабиатлирини иш чиқирип қоюштин тосушқа вәзипәләндүрүлгән.

Униң нәқ мәйдандин уқушичә, өлгүчи әнқәрҗан ариз саәт икки әтрапида икки дости билән ойнаватқанда, қатил униңға йеқинлишип “кәл әнқәр мән саңа кәмпүт беримән” дәп хитайчә чақирған вә биликидин тутуп өйигә әкирипла баш вә қоллирини чаниған. Әнқәрҗанниң әһвалини деризидин көргән икки дости дәрһал қечип әһвални дадиси исмаил ниязға ейтқан. Исмаил нияз әнқәрҗанниң анисиниң акиси болуп, у нәқ мәйданға дәрһал йетип кәлгән вә балини чаналған вә қатилни қолида чәйдо тутқан һаләттә көргән. У “һәй капир, сән балини немә қилдиң?” дәп етилғинида, у һеч иккиләнмәстин “өлтүрдүм” дәп җаваб бәргән. Исмаил қолидики гүрҗәк билән қатилниң белигә урғинида у қачқан, исмаил арқисидин қоғлиған. Қатил шу арилиқта сақчиға телефон қилип җинайитини мәлум қилған. Сақчилар нәқ мәйданға дәрһал йетип келип қатилни тутуп, уруп өлтүрүлүштин қоғдап қалған.

Абдулла нураҗиниң баян қилишичә, балиниң өлүми толиму ечинишлиқ болғини үчүн, даириләр җәсәтни аилисигә дәрһал көрсәтмигән. Қанун дохтурлири җәсәтниң чаналған бешини тикип қураштурғандин кейин, аилисигә кечә саәт 9 әтрапида тапшурған. Җәсәтни көргән уруқ-туғқанлар өзини туталмиған. Өлгүчиниң туғқанлиридин керәм әйса оттуриға чүшүп, “һәммә чиқимни мән көтүримән, һәммә ақивәткә мән игә, җәсәтни үрүмчигә әкиримиз, дуңбазар вә йишөйәнниң алдида айлинип намайиш қилимиз. Бу әһвални әл җамаәт уқсун, шу чағда буни сорайдиған адәм чиқиду” дегән. Көпчилик бу тәклипкә бирдәк қетилған. Бу чағда абдулла нураҗи уларни тосқан. Җамаәт абдулла нураҗини өйдин қоғлиған; уни “я партийилик бол, яки мусулман бол” дәп әдәплигән вә уйғур тәрәптә әмәс, хитай тәрәптә турғанлиқини әйиблигән.

Җамаәт җәсәтни үрүмчигә йөткәш үчүн аптомобил елип кәлгән. Бу чағда даириләр абдулла нураҗини гәп қилишқа, кишиләрни тосушқа үндигән. Абдулла нураҗи даириләрниң буйруқини биҗанидиллиқ билән қобул қилип, аптомобилниң алдини тосқан вә йиғлап туруп, уларни үрүмчигә бармаслиққа нәсиһәт қилған. Униң йиғисидин бир аз тәсирләнгән керәм әйса, “бу ахунниң гепини бүгүнгичә аңлимай кәлдуқ, қени бу қетим бир аңлап бақайли” дәп ипадә билдүрүп җәсәтни өйгә әкирип кәткән.

Кечә саәт 2 мәзгили болғанда пичан наһийилик парткомда җиддий йиғин ечилған. Йиғинға абдулла нураҗи тәклип қилинип вәқәни җимиқтуруш һәққидә мәслиһәт сориған. Абдулла нураҗи җамаәт ичидә керәм әйсаниң инавәтлик вә йетәкләш күчи барлиқини, шу қайил болсила, бу ишниң җимиқидиғанлиқини ейтқан. Буниңға асасән, наһийилик партком секретари керәм әйсани шу кечидә ишханисидики йиғинға әкәлдүргән вә униңға қатилни әң қисқа вақит ичидә қаттиқ җазалайдиғанлиқи һәққидә вәдә бәргән. Абдулла нураҗиму, керәм әйсани җаң шуҗиниң гепини аңлашқа дәвәт қилип тәрбийә бәргән. Керәм әйса “секретар ахунумниң алдида вәдә бәрди, вәдисидә турсила, мәнму җамаәтни қозғалмаслиққа тәвсийә қилай” дегән. Йиғин тарқиғандин кейин абдулла нураҗи билән керәм әйса вә бир қисим уйғур әмәлдарлар, мусибәтлик аилигә берип йәнә нәсиһәт қилған вә уларни әтиси сәһәрдә җәсәтни йәрликидә қоюшқа көндүргән. Абдулла нураҗи әтиси мусибәтлик аилигә кәлгәндә җамаәт мейит намизи үчүн топлинип болған, әмма у билмигән бир сәвәб билән җамаәт бирдинла, җәсәтни йәрликидә қоюштин ваз кәчкән вә буниң үчүн сақчида тутуп турулуватқан өлгүчиниң уруқ-туғқанлирини қоюп беришни тәләп қилған. Сақчида тутуп турулуватқанлар қоюп берилмисә, мейитни йәрликидә қоймайдиғанлиқини ейтқан. Керәм әйсаму позитсийисини өзгәртип наразилиққа қетилған.

Юқирида аталмиш вәтәнпәрвәр диний зат абдулла нураҗиниң 7 яшлиқ балиниң өлүм вәқәси һәққидики баянлирини диққитиңларға сундуқ. Бу баянларниң давами әтики программимизда берилиду. Программимизниң әтики қисмида, җамаәтниң 22-чесла әтигәндә мейитни йәрликигә қоймаслиқ үчүн даириләр билән йәнә 4 саәт тиркәшкәнлики вә бир түркүм яшларниң сақчихана алдиға топлишип наразилиқ билдүргәнлики һәққидә мәлумат беримиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт