Явропа инсан һәқлири соти абдуқадир япчан тоғрисидики қарарини елан қилди

Ихтиярий мухбиримиз әркин тарим
2016-12-01
Елхәт
Пикир
Share
Принт
Истанбулда яшаватқан җамаәт әрбаби абдуқадир япчан.
Истанбулда яшаватқан җамаәт әрбаби абдуқадир япчан.
RFA/Arslan

Явропа инсан һәқлири соти 11-айниң 30-күни 2-3 айдин бери түркийә сақчи даирилири тәрипидин тутуп турулуватқан дини зат вә паалийәтчи абдуқадир япчан тоғрисидики қарарини елан қилди. Қарарда абдуқадир япчанни хитайға вә түркийәдин башқа үчинчи бир дөләткә әвәтишкә болмайдиғанлиқи һәм соттин бихәвәр иш қилишқа болмайдиғанлиқи көрситилгән.

Биз бу қарар тоғрисида көз қаришини игиләш үчүн абдуқадир япчанниң адвокати ибраһим әргин вә япчан мәсилисидә паалийәт қиливатқан шәрқий түркистан маарип вә һәмкарлиқ җәмийити рәиси һидайәтулла оғузхан әпәндиләр билән сөһбәт елип бардуқ.

Ибраһим әргин әпәнди явропа инсан һәқлири соти чиқарған япчан тоғрисидики қарар тоғрисида мәлумат берип мундақ деди: «нормалда сот қарар чиқириду, һөкүмәтләр уни иҗра қилиду. Түркийә асасий қанун мәһкимиси япчанни хитай билән қазақистанға қайтуруп бәрмәслик тоғрисида қарар чиқарған иди. Әмма, бизниң чәтәлликләр тоғрисида 68 номурлуқ бир қанунимиз бар, бу қанунниң 52-53-маддилирида чәтәлликләрни үчинчи бир дөләткә әвәткили болиду дейилгән. япчанни асия дөләтлиридики һәрқандақ бир дөләткә әвәтсә хитайниң елип кетиш еһтимали барлиқи түпәйлидин, биз түркийә асаси қанун сот идарисиниң қарарини йетәрлик көрмигәчкә явропа бирлики инсан һәқлири мәһкимисигә илтимас қилған идуқ. Бизниң тәлипимизгә бинаән абдуқадир япчанни һечқандақ дөләткә йоллимаслиқи тоғрисида бир қарар мақуллиди.»

Ибраһим әргин әпәнди түркийә җумһурийитиниң һазирғичә явропа инсан һәқлири мәһкимисиниң қарарлириға риайә қилғанлиқини баян қилип мундақ деди: «түркийә һазирғичә явропа инсан һәқлири мәһкимисиниң қарарлириға риайә қилди. Биз түркийәниң йәнә риайә қилишини күтимиз. Риайә қилмаслиқи мумкинму десиңиз? мумкин, бу сиясий бир һәрикәт болиду. Һазир түркийәниң пут қоли бағланди, түркийә дөлитиниң япчанни қайтуруп бәрмәслики керәк. Әмма хитай түркийәгә қаттиқ бесим ишлитиватиду. Түркийә шаңхәй һәмкарлиқ тәшкилатиға кирсәм дәйду. Әмма қисқиси япчан мәсилисидә бурунқиға қариғанда һазир яхши.»

Шәрқий түркистан маарип вә һәмкарлиқ җәмийити рәиси һидайәтулла оғузхан әпәнди биләнму мәзкур қарар тоғрисида сөһбәт елип бардуқ. У, түркийә истанбул сот идариси вә түркийә асасий қанун идарисиниң абдуқадир япчанни хитайға қайтуруп бәрмәслик тоғрисида алған қарари болсиму, әмма явропа инсан һәқлири сот мәһкимисиниң 11-айниң 30-күни мақуллиған қарарини көргәндин кейин бираз хатирҗәм болғанлиқини баян қилди.

Һидайәтулла оғузхан әпәнди уйғур паалийәтчи, диний зат абдуқадир япчанниң балдуррақ қоюп берилиши үчүн һәр тәрәптин йол меңиватқанлиқини, явропа инсан һәқлири сот мәһкимисиниң қарари асасида йәнә түркийә әдлийә органлириға илтимас сунидиғанлиқини тәкитлиди.

Абдуқадир япчан 8-айниң 31-күнидин бери түркийәниң истанбул шәһиридики нәзарәтханида тутуп турулмақта.

Пикирләр (0)
Share
Толуқ бәт