Аблаҗан авут аюпниң үрүмчидики сақчилар тәрипидин тутулғанлиқи илгири сүрүлмәктә

Мухбиримиз шөһрәт һошур
2018.05.16
ablajan-awut-ayup-305.jpg Уйғур районидики мода еқим нахша чолпини аблаҗан авут аюп.
Social Media

Түнүгүн мода еқим нахша чолпини аблаҗан авут аюпниң тутқун қилинғанлиқи һәққидики хәвиримиз елан қилинғандин кейин, аблаҗанниң әһвалини йеқиндин билидиған достлиридин бири радийомизға учур йоллап өзи билидиған бәзи әһвалларни ашкарилиди. Униң билдүрүшичә, аблаҗан дәсләптә гума санҗу сақчилири тәрипидин тутулуп, бир күн сорақ қилинған, андин қоюп берилгән. Һалбуки, у бу йил 2-айниң 15-күни үрүмчидики дөләт аманлиқ сақчилири тәрипидин қайта тутуп кетилгән вә шуниңдин кейин из-дерики болмиған.

Тордики учурлардин мәлум болушичә, мода еқим нахша чолпини аблаҗан авут аюп әң ахирқи қетимлиқ бир мәйдан оюнини бу йил 2-айниң 13-күни шаңхәйдә қойған. Үндидар топлирида әң ахирқи қетим 2‏-айниң 14‏-күни көрүнгән. Аблаҗан авут аюпни йеқиндин тонуйдиған аңлиғучилиримиздин бири униң гума санҗу сақчилири тәрипидин тутулушиниң бултур 12‏-айдики иш икәнликини вә шу қетим сорақтин кейин қоюветилгәнликини, әмма бу йил қайта тутулғандин кейин из-дерики йоқлуқини баян қилди. Биз аблаҗан авут аюпниң немә сәвәбтин тутулғанлиқини ениқлаш үчүн аввал гума наһийәлик сақчи идарисигә телефон қилдуқ. Сақчи хадимлири аблаҗан һәққидә гәп қилиштин изчил һалда өзлирини қачурди.

Биз йәнә тордики алақә учурлириға асасән аблаҗан истудийәсиниң алақиләшкүчиси дейилгән бир кишигә телефон қилдуқ. У өзиниң аблаҗанниң алақиләшкүчиси әмәсликини, бир йилчә илгири өзиниң аблаҗан билән уссулда һәмкарлашқанлиқини, әмма униң нөвәттики әһвалини билмәйдиғанлиқини ейтти. Төнүгүки ениқлишимизда гуминиң чода йезисидики бир сақчи аблаҗанниң санҗу йезилиқ сақчилар тәрипидин тутулғанлиқини баян қилған иди. Абалаҗанниң әһвалидин хәвәрдар киши униң туралғусиниң үрүмчи шәһирининиң тәңритағ райониға тәвә икәнлики вә тәңритағ районлуқ дөләт аманлиқ сақчилири тәрипидин тутулғанлиқини илгири сүрди. Тәңритағ райониниң дөләт аманлиқ сақчиси аблаҗан авут аюпниң тутулуш сәвәби һәққидики соалимизға өзиниң бу темида телефонда җаваб берәлмәйдиғанлиқини ейтти вә аблаҗанниң тутулғанлиқи һәққидики гепимизни инкар қилмиди.

Игилишимизчә, үрүмчи шәһири “йепиқ тәрбийәләш лагерлири” ниң орни вә сани һәққидики учур әң қаттиқ контрол қилиниватқан орунлардин бири. Өткәндә һәтта бир сақчи хадими үрүмчидә “йепиқ тәрбийәләш лагери” ниң мәвҗутлуқиниму инкар қилған иди.

Үрүмчидики учур контролиниң қаттиқлиқи сәвәбидин аблаҗан авут аюпниң нөвәттә қайси лагерда тутуп турулуватқанлиқи вә униң қандақ әһвалда икәнлики мәлум әмәс. У өткән йилқи бир син зиярәт хатирисидә өзиниң әмәлгә ашурмақчи болған көплигән арзу-арманлириниң барлиқини, вақтини кәспигә көпрәк мәркәзләштүрүш үчүн өйлиниш ишиниму һазирчә ойлашмайватқанлиқини баян қилған иди.

Юқирида мода еқим нахша чолпини аблаҗан авут аюпниң тутқун қилинғанлиқи һәққидә мәлумат бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.