Xotendiki bir ottura mektepte yüz bergen ikki amanliq xadimini öltürüsh weqesining tepsilati ashkarilandi

Muxbirimiz shöhret hoshur
2013-07-17
Share
yusup-exmet-qadir-305.jpg Tutush buyruqi chiqirilghan 11 neper Uyghurning ikkisi yüsüp exmetqadir(sol) we memet'éli tursunniyaz.
http://uy.ts.cn

Uyghur aptonom rayonluq j x nazariti tutush buyruqi chiqarghan 11 gumandarning ish-heriketliri heqqide tekshürüsh (2)

Uyghur aptonom rayonluq j x nazariti yéqinda 11 kishi üstidin chiqarghan tutush buyruqida gumandarlardin yüsüp exmetqadir bilen memtili tuniyazning qaraqash deryasida ishlewatqan ishchilarni öltürgendin bashqa, xoten nahiyisidiki melum bir ottura mektepning ikki amanliq xadimini pichaq tiqip öltürüp jesitige ot qoyuwetkenliki bayan qilin'ghan؛ emma weqening tepsilati tonushturulmighan idi. Muxbirimizning bu heqte élip éniqlashliri dawamida weqening xoten nahiyisining yéngi'awat ottura mektipide yüz bergenliki ashkarilandi. Melum bolushiche, bu mektep qiz oqughuchilargha qarita yaghliqsizlashturush tüzümini qollan'ghanliqi, öltürülgen amanliq xadimliri bolsa bu tuzumni ijra qilishta aktipliq qilishtin bashqa, yéziliq saqchixanigha masliship paylaqchiliq qilghanliqi üchün weqede hujum nishanigha aylan'ghan.

Biz tutush buyruqidiki yip uchigha asasen, aldi bilen xoten nahiyilik ma'arip idarisige téléfon qilduq:

Xadim: xoten nahiyilik ma'arip idarisi!
Muxbir: ötkende ikki amanliq xadimi öltürülgen mektep qaysi mektep?
Xadim: méning taza xewirim yoqken.
Muxbir: manga nahiyilik 1-ottura mektep mudirining téléfonini dep bersingiz?
Xadim: erkin abliz, téléfoni....

Muxbir: mudir erkin ablizmu?
Mudir: shundaq men.
Muxbir: silining mektepte öltürülgen ikki amanliq xadimlirining isimliri néme?
Mudir: u weqe bizning mektepte yüz bermidi, yéngi'awatta yüz berdi.
Muxbir: undaqta weqe yüz bergen mektep nahiye bazirining sirtidiki mektepmu?
Mudir: shundaq, yéngi'awat ottura mektep.

Biz weqe yüz bergen orunni biliwalghandin kéyin, mezkur yézidiki ahalilerdin ölgen amanliq xadimlirining kimliki we weqede hujum nishani bolup qélishining sewebi heqqide melumat soriduq. Melum bolushiche, ölgen amanliq xadimliridin biri 29 yashliq shir'eli eziz, yene biri bolsa 41 yashliq ablikim axunbay. Ahalilerning pash qilishiche, bular mekteptiki qoghdash xizmitidin bashqa waqitlarda, xan'ériq we yéngi'awat saqchixanining xadimlirigha masliship, paylaqchiliq xizmiti qilghan. Ular bu qilmishliri bilen ikki yéza tewelikidiki bir qisim milletperwer diniy zatlarning tutqun qilinishigha, pida'iylarning bir qisim pilanlirining buzulushigha seweb bolghan. Yene ahalilerning pash qilishiche, mezkur ikki amanliq xadimi mektepning yaghliqsizlashturush tüzümini ijra qilishta, qiz oqughuchilargha qopalliq qilishtin bashqa, ularning ata-anilirighimu tehdit ishlitip qizlirini mektepke yaghliqsiz ewetishke mejburlighan. Mana bu ehwallar, weqede ularning hujum nishani bolushigha seweb bolghan. Yüsüp exmetqadir we memtili tursunniyaz qatarliq pida'iylar guruhi qaraqash deryasidiki xitay köchmenlirige hujum qilishtin 3 hepte burun, bu ikki amanliq xadimigha hujum qilghan. Biz ahalilerdin igiligen bu uchurlarning toghra-xataliqini éniqlash üchün, yéngi'awat ottura mektipining partkom sékritarigha téléfon qilduq:

Muxbir: siz mushu mektepning partkom sékrétari bolamsiz?
Sékrétar: shundaq, sékrétar hem mudir.
Muxbir: mektipinglarda ikki amanliq xadimi öltürülüsh weqesi yüz bergende siz qeyerde idingiz?
Sékrétar: menmu mektepte idim. Mektipimizde nahiye boyiche oqughuchilarning yénik atlétika musabiqisi ötküzülmekchi idi؛ nahiyidinmu kelgen rehberler bilen shuning teyyarliqini qiliwatqan iduq. Ikki amanliq xadimi kélip manga, siz ete ishleysiz dem éliwéling dédi؛ shuning bilen ishxanida yétip uxlap qaptimen. Sa'et 2 ge yéqinlashqanda, bir chaghda nöwette turuwatqan oqutquchilar, méni ot ketti dep oyghatti, yugriship barsaq, qoghdash bölümi we aldidiki 3 mashina köyüwétiptu. Oqutquchilar qoghdash öyidin jesetni élip chiqip andin qanun orunlirigha xewer qilduq. Qanun orunliri jesetning bedinide pichaq izi barliqini körüp buning addiyla ot kétish weqesi emeslikini békitip délo turghuzdi. Délo sadir qilghuchilar 4 kishi iken. Ikkisini tutti, ikkisini téxi izdewatidu.
Muxbir: mektipinglarning hem ikki neper amanliq xadiminglarning hujum nishani bolup qélishidiki sewebni néme dep texmin qilisiler?
Sékrétar: birinchisi mektipimiz, nahiye boyiche yénik atlétika musabiqisi ötküzüsh pursitige érishken, chong bir pa'aliyetke sahipxanliq qilmaqchi idi؛ bundaq bir shan-sherepke üch xil küchler buzghunchiliq qilishni oylidi bolghay. Ikkinchisi mektipimizde qiz oqughuchilarni yaghliqsizlashturush tüzümini yolgha qoyghan. Bu tüzümge bir qisim ata-anilarning naraziliqi, hetta qorsaq köpuki bar idi؛ buni bizge ayrimmu dégen, ata-anilar yighinliridimu otturigha qoyghan. Mushu ikki seweb dep chüshendüq.
Muxbir: yaghliqsizlashturush tüzümi qachandin béri yolgha qoyuluwatqan?
Sékrétar: bir yérim yildin buyan. Bu yalghuz bizning mekteptila emes, nahiye boyiche hemme mektepte yolgha qoyuluwatidu.
Muxbir: mektipinglarda qanche oqughuchi bar?
Sékrétar: 1592 oqughuchi bar.
Muxbir: ikki amanliq xadimining a'ile-tawabi'atigha tölem bérildimu?
Sékrétar: bérildi, birsige 420 ming, yene birisige 450 ming yüen bérip a'ililer razi qilindi.

Yuqirida Uyghur aptonom rayonluq j x nazariti tutush buyruqi chiqarghan 11 gumandarning sadir qilghan déloliri heqqidiki chatma xewirimizning ikkinchi qismini anglidinglar.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet