Атушта 70 кишиниң етиветилгәнлики һәққидики учурниң тоғрилиқи айдиңлашмиди

Мухбиримиз шөһрәт һошур
2017-03-13
Елхәт
Пикир
Share
Принт
Йолучилар айропилани билән тошулған хитай қораллиқ күчлири террорлуққа қарши маневир вә қәсәмядқа тәйярлиқ қилип, айропиландин чүшмәктә. 2017-Йили 27-феврал, хотән.
Йолучилар айропилани билән тошулған хитай қораллиқ күчлири террорлуққа қарши маневир вә қәсәмядқа тәйярлиқ қилип, айропиландин чүшмәктә. 2017-Йили 27-феврал, хотән.
AFP

Өткән һәптә фейсбук қатарлиқ иҗтимаий ахбарат васитилиридә, атушта 70 чә уйғурниң хитай сақчилири тәрипидин етиветилгәнлики һәққидә учур тарқалғандин кейин, хәвәрниң вәһимиси муһаҗирәттики уйғурларни еғир дәриҗидә паракәндә қилди. Дуня уйғур қурултийи рәиси рабийә қадир ханим бу һәқтә мәхсус баянат елан қилип, мустәқил ахбарат органлирини бу һәқтә ениқлаш елип берип, Гуманни йешишкә чақириқ қилди.

Радиомиз мухбирлири бир һәптидин буян изчил ениқлаш елип барған болсиму, та бүгүнгә қәдәр бу учурниң тоғрилиқи айдиңлашмиди.

Вәқә һәққидә иҗтимаий ахбаратта, атушта путбол ойнаватқан вә тамаша көрүватқан уйғурлар билән хитай сақчилири арисида тоқунуш келип чиққанлиқи, тоқунушта 70 әтрапида кишиниң етиветилгәнлики баян қилинған, учурлардин биридә, вәқәниң үстүн атуштики бостан кәнтидә йүз бәргәнлики, йәнә биридә болса, вәқәниң қәшқәр -атуш йоли үстидә йүз бәргәнлики қәйт қилинған. Бу учурға асасән, үстүн атуш бостан кәнтиниң секретари һәмдул, үстүн атуш дохтурхана башлиқи ғалип, дәм елишқа чиққан кәнт секретари абдурешит қатарлиқ 20 әтрапида кишини телефонда зиярәттә қилдуқ. Зиярәт қилинғучиларниң һәммиси дегүдәк вәқәдин хәвәрсизликини вә бу һәқтә тунҗи қетим гәп аңлаватқанлиқини билдүрүшти.

Бу һәқтә мухбирлиримиз әркин, гүлчеһрә вә қутлан тәрипидин елип берилған ениқлашлардиму, пәрқлиқ бир нәтиҗә чиқмиди.

Йеқинқи айлардин бери уйғур райониниң муқимлиқ вәзийитиниң йәнә бир балдақ җиддийләшкәнлики, бу җәрянда хитай тәрәпниң учурни техиму қаттиқ контрол қиливатқанлиқи, дөләт мәхпийәтликини ашкарилиғанларни қаттиқ җазалайдиғанлиқи һәққидики тәһдит вә тәдбирлирини күчәйткәнлики көздә тутулса, зиярәт қилинғучиларниң юқириқи баянлири йәнила гуманлиқ. Шуңа мәзкур учур һәққидики ениқлашлиримиз йәнә давамлишиду.

Пикирләр (0)
Share
Толуқ бәт