Ayköl peyshenbebazar kentide 8 déhqan topliship namaz oqughanliqi üchün 7 yilliqtin késilgen

Ayköl peyshenbebazardiki siyasiy tutqunlar (7)

Aqsu aykölning peyshenbebazar kentidiki siyasiy mehbuslar toghriliq radi'omizgha yollan'ghan mektupta, mezkur kentning 1-guruppisidiki 8 déhqanning topliship namaz oqughanliqi üchün 7 yilliqtin késilgenliki tilgha élin'ghan.

Muxbirimizning téléfon ziyaretliri dawamida mezkur uchurning toghriliqi delillendi. Ahalilerdin biri bu 8 déhqan üstidin échilghan mexpiy sotqa qétilghanliqini, sotta ularning topliship namaz oqushtin bashqa qilmishining tilgha élinmighanliqini bayan qildi. Mektupta, peyshenbe bazarda her üch a'ilige bir mehbus toghra kélidighanliqi yézilghan. Peyshenbebazar kent amanliq mudiri mamut awut bu sanning köptürüwétilgenlikini éytti, emma u özi mes'ul kentte bashqa kentlerge nisbeten siyasiy mehbuslar a'ilisining köp ikenlikini yoshurmidi.

Mektupta déyilishiche, aykölning 17-kent 1-guruppisidin turdi mamut, turdi abla, tursun mamut, abla awut, memet satirash, exet awut, ablikim tursun we isma'il awut qatarliq 8 déhqan jüme namizini meschit sirtida topliship oqughanliqi üchün tutqun qilin'ghan. 2014-Yili séntebirde tutqun qilin'ghan bu 8 déhqan 2015-yili 1-ayda üstidin mexpiy sot échilip 7 yilliqtin késilgen. Sotqa ularning birqismining a'ile-tawabi'atliri qétilghan. Xette déyilishiche, ularning jüme namizini meschit sirtida topliship oqughanliqi sotta diniy esebiylikning alamiti hem pakiti qilip körsitilgen. Sotqa qatnashqan mehbus a'ile tawabi'atliridin birining déyishiche, sotta ularning topliship namaz oqushidin bashqa héchqandaq bir qilmishi tilgha élinmighan. Mektupta bu 8 neper déhqandin ikki nepirining salametlik ehwali sewebidin jaza mudditini sirtta ijra qiliwatqanliqi yézilghan idi, emma éniqlishimizche, ular qoyuwétilgendin kéyin yene tutulup, qaytidin türmige tashlan'ghan. Yene melum bolushiche, bu 8 neper déhqanning héchqaysining tebligh qilghudek diniy melumati yaki jama'etni yétekligüdek derijide aktipchanliqi bolmisimu, xitay yenila ularni dölet bixeterlikige tehdit dep qarighan.

Mektupta yene, peyshenbebazar kentide her üch a'ilige bir neperdin siyasiy mehbus toghra kélidighanliqi yézilghan, kent amanliq mudiri mamut awutning bayan qilishiche, san u derijide köp emes, u mes'ul bolghan kentte her 20 a'ilige bir neperdin siyasiy mehbus toghra kélishi mumkin. Emma kentning 1-guruppisidinla, uning üstige topliship namaz oqushtin ibaret birla qilmishtin 8 kishining tutulghanliqi, mamut awutning texminini ret qilmaqta. Uning üstige aykölde 2013-yili 8-awghust weqesi yeni ammining saqchilarni qorshuwélish weqesi yüz bergen؛ shu weqede saqchilar ammigha qaritip oq chiqirip az dégende 3 kishining ölümi we 100 nechche kishining yarilinishini keltürüp chiqarghan we weqege qétilghan ammining köp qismi peyshenbebazar kentidin bolup, weqedin kéyin aqsu aykölde keng kölemlik tutqun bashlan'ghan.