8 Yashliq dilare qoshnisi teripidin on nechche kün qiynap öltürülgen

Muxbirimiz gülchéhre
2016-01-21
Share
dilare-abdumijit-yutken-bala-yutush-1.jpg "Yütkenlerni tapayli pida'iylar etriti" chiqarghan, yoqap ketken 8 yashliq dilare abdumijitni izdesh uqturushi. 2015-Yili dékabir.
Social Media

Bir ay ilgiri aqsu sheher topluq yézisida 8 yashliq dilarening küp-kündüzde yoqap kétishi, uning ata, anisi we yéqinlirini zor endishige salghan bolsa, 19 kün bolghanda bu narisidining jesitining öz mehellisidin tépilishi pütün yézini wehime ichige alghan. Netijide ularni téximu qattiq shürkendürgini bolsa bu narisidini rehimsizlerche qiynap öltürgen qatilning del dilarening tam qoshnisi bolup chiqishidur. Kishini oygha salidighini, ejeba dilarening bulap qéchilip, ta qiynap öltürülüp jesiti tépilghiche bolghan on nechche kün ichide 10 mingdin artuq nopusqa ige bu yézida ya saqchi, yaki bashqilarning bu qebih jinayettin gumanliq bir shepe tuymasliqidur.

Dilare abdumijit topluq yéza merkizi bashlan'ghuch mektep 2-yilliqning elachi oqughuchisi, a'ilide 3 balining chongi we etiwarliq bir tal qiz idi, u 2015-yili 12-ayning 20-küni yekshenbe chüshtin burun 9yérim etrapida yoqap kétip 19 kündin kéyin mehellisidin jesiti tépilghan. Dilare abdumijitning yurti aqsu shehirining topluq yézisi 6 kenttin terkib tapqan, asasliq Uyghurlar olturushluq nopusi 10 mingdin ashidighan bir kichik yéza. Dilare bir tughqan qérindashliri bilen birlikte yolning qarshisidiki taghisining öyige tapshuruq ishlesh üchün xushal chiqip ketken péti qaytip kelmidi, özining mehelliside yoqap ketti. Uning hammisining éytip bérishiche, ta uning jesiti tépilghuche ariliqta, saqchilar jiddiy heriket qilmighan bolsimu, uning a'ilisidikiler, mekteptiki oqutquchi, sawaqdashliri, qoshna ‏-qolum we pida'iylar birlikte uni izdeshni toxtatmighan, emma bextke qarshi dilarening tonglap qalghan jesiti shu yézining özidin tépilghan.

Saqchilar uning jesiti üstidiki tekshürüsh netijisini mushu düshenbe küni a'ilisige bergen bolup, uningda dilarening basqunchiliqqa we qattiq jismaniy xorluqqa uchrighanliqi éniqlan'ghanliqi yézilghan iken.

Dilarening hammisining bayan qilishiche, saqchilar jeset bayqalghan meydandiki ayaq izliri we bashqa gumanliq yip uchrilirigha asasen deslep mehellidiki yéshi 13 yashtin yuqiri erlerning hemmisini tekshürüp qan ewrishkilirini élip tekshürgen. Netijide ikki kishini jinayet gumandari dep békitip soraq qilghan, bu ikki gumandarning biri mehellidiki dawamliq ish térip yüridighan rohiy késili bar bir yash, yene biri bolsa dawamliq xitayning ichkiri ölkilirige kirip‏-chiqip turidighan 19 yashliq ishsiz, sawatsiz bir yash bolup, bu del dilarening tam qoshnisining oghli. Bir qanche kün soraqtin kéyin del bu dilarening qoshnisi özining dilareni öyige yoshurup on nechche kün qiynighanliqini, axiri jansizlinip qalghanda soghuqqa tashlap qoyghanliqini iqrar qilghan.

Dilarening délosi qatilliq dep turghuzulghan. Dilarening hammisining bergen uchurliridin melumki, dilare özining mehelliside yitip ketti, öz qoshnisi teripidin bulap kétildi, on nechche künlep öz öyining biqinida görüge élinip kéche‏-kündüz qiyas qilghusiz derijide xorluqlargha uchridi we yene shu özi tughulup chong bolghan mehelliside jan üzdi, muzdek jesiti tépildi, bu arida héchkim héchnéme sezmigendimu? bu mumkinmu?

Bu biz tonugun topluq yéziliq saqchixanigha qayta téléfon qilip bu déloning pash qilinish ehwali heqqide melumat élishqa tirishqan bolsaqmu,lékin saqchi terep jawab bérishni ret qilghan idi. Bügünmu yene téléfon qilsaqmu lékin téléfon'gha jawab bolmidi. Dilare oqughan topluq merkizi bashlan'ghuch mekteptiki oqutquchila bilen alaqe baghlighinimizda, ular, dilarening bu échinishliq paji'esidin intayin qayghurghanliqini bildürgen bolsimu, bu heqte gep qilishqa jür'et qilalmidi, ularning éytishiche, saqchi orunliri dilarening jesiti tépilghandin kéyin derhal mekteptiki ikki yüz nechche oqutquchi, oqughuchilargha yighin échip, ularni dilarening délosi heqqide héchqandaq artuq söz qilmasliqqa agahlandurghan iken.

Dilarening hammisi, dilarening yoqap kétip, qoshnisining öyide xorluqqa uchrap jan üzgen'ge qeder bu jeryanda héchbir gumanliq shepining bilinmigenlikining sewebi heqqide, dilareni izdeshte aldi bilen "Adem bédikliri qachurghanmikin" dégen guman bilen yéqin kishiler we yéqin da'irining közdin saqit qilin'ghanliqi, yene biri da'irilerning yézidikilerni qar tazilashqa yighiwalghanliqi üchün, yézida qérilar we kichik balilarla qalghanliqi, soghuq qishta kishiler köp talagha chiqmighachqa kishilerning diqqitinimu chekmigenliki, saqchilarning bolsa muqimliq weziyiti üchün wezipe ötewatqan bir mezgilge toghra kelkenlikidek seweblerni körsetti.

Dilarening hammisining éytishiche, dilarening axiretlik ishliri tügigen. 8 Yashliq bu narisidige ziyankeshlik qilghan qatil 19 yashliq weli tursun tutup turuluwatqan bolsimu, emma uning bu wehshiy qatilliq délosigha téxi sot échilmighan. Dilarening a'ilisidikiler we pütün yézidikiler bu wehshiy qatilning tégishlik jazagha tartilishini kütüp turmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.