Турамәт турсунниң хитай сақчи йетәкчиси вей йүәнхоң тәрипидин етиветилгәнлики дәлилләнди

Мухбиримиз шөһрәт һошур
2017-04-11
Елхәт
Пикир
Share
Принт
Уйғур районидики мәлум сақчи понкитида, сақчиниң уйғур яшни уқуватқан көрүнүши.
Уйғур районидики мәлум сақчи понкитида, сақчиниң уйғур яшни уқуватқан көрүнүши.
Social Media

«Уйғур нидаси» тор радиоси поскам наһийә иккису йезисидики турамәт турсун исимлик бир яшниң 2014 ‏-йили 8 ‏-айда иккису сақчи хадими абдурусул тәрипидин етиветилгәнлики вә абдурусулниң көрсәткән бу хизмити үчүн поскамниң йима йезисиға сиясий йетәкчи қилип йөткәлгәнликини хәвәр қилди. Мухбиримизниң ениқлиши давамида иккису тағарчи кәнтидики турамән турсунниң шу йили, шу айда хитай сақчи вей йүәнхоң тәрипидин етиветилгәнлики вә вей йүәнхоңниң нөвәттә иккису сақчиханисида сиясий йетәкчи болуп ишләватқанлиқи дәлилләнди. Мәлум болушичә, турамәт турсун ақсуға ишләмчиликкә бериш үчүн сақчиханидин йол хәт сориған, сақчилар тәләпни рәт қилған, нәтиҗидә тоқунуш йүз берип турамәт турсун нәқ мәйданда етиветилгән.

«Уйғур нидаси» ториниң хәвиридә турамәт турсунни етивәткән сақчиниң иккису сақчиханисиниң сабиқ хадими абдурусул икәнлики вә нөвәттә униң йима сақчиханисида сиясий йетәкчи болуп ишләватқанлиқи баян қилинған. Биз бу йип учиға асасән аввал йима сақчиханисиға телефон қилдуқ. Сақчихана хадими абдурусул исимлик бир кишиниң бу сақчиханида сақчихана башлиқи болуп ишләватқанлиқини дәлиллиди; әмма униң телефон номури вә иш-изи һәққидә мәлумат беришни рәт қилди. Биз арқидин иккису йезисиға телефон қилдуқ. Иккису йезисидики сақчи вә кәнт секретарлири, турамәт турсунниң 2014 ‏-йили йол хети сорап кәлгән чеғида етиветилиш вәқәсини дәлиллиди. Мәлум болушичә, турамәт турсун ақсуға пахта теришқа бериш үчүн аввал кәнт рәһбәрлиридин рухсәт сориған. Кәнт секретари тәләпни кәскин рәт қилған; кәнт секретари билән турамәт турсун арисида сүркилиш йүз бәргән. Кәнт секретари турамән турсунни тәлипини сақчиханиға ейтишқа буйруған.

Бир қораллиқ қисим хадиминиң дейишичә, турамәт турсун сақчиханиға йәң ичигә кичик бир пичақни тиқип барған, йол хәт тәлипи рәт болғандин кейин, сақчиханиниң муавин башлиқи нурахмәтни пичақ билән яриландурған. Бу чағда сақчиханиниң сиясий йетәкчиси веи йүәнхоң турамәт турсунға қаритип икки пай оқ атқан, оқниң бири турамәтниң биликигә йәнә бири йүрикигә тәккән вә сақчиханида җан үзгән; йәнә бу хадимниң баян қилишичә, яриланған сақчи узун мәзгил даваланғандин кейин, нөвәттә йәнә муавин сақчихана башлиқи болуп вәзипә өтимәктә.

Иккису сақчи хадими вә бир кәнт секретариму турамәт турсунниң вей йүәнхоң тәрипидин етиветилгәнлики дәлиллиди, биз улардин турамәт турсунға оқ чиқарғучиниң абдурусул икәнлики һәққидә учур барлиқини ейтқинимизда, улар нөвәттә йима йезисида вәзипә өтәватқан абдурусулниң фамилиси абла икәнликини, әйни вақитта иккису сақчиханисиниң башлиқи икәнликини, шу күнки нәқ мәйданда абдурусул абланиңму барлиқини вә қораллиқ икәнликини, лекин абдурусулниң оқ чиқарған яки чиқармиғанлиқини билмәйдиғанлиқини, бу делони наһийә бир тәрәп қилғанлиқини ейтти.

Юқириқи сақчи хадимлири турамәт турсунниң етиветилиштин бурун муавин сақчихана башлиқини бирқанчә йеридин пичақ билән яриландурғанлиқини илгири сүрмәктә. Әмма вәқәни тунҗи болуп «уйғур нидаси» радийосиға ашкарилиған киши, турамәт турсунниң сақчилардин пәқәт өзигә йол хәт берилмәсликниң қануний асасини тәләп қилип гәп такаллашқанлиқи үчүнла етиветилгәнликини мәлум қилған. «Уйғур нидаси»ниң торида, турамәт турсунни етивәткән сақчиниң ялған пакит ойдуруп өзини ақлиғанлиқи баян қилинған.

Пикирләр (0)
Share
Толуқ бәт