Палтилиқ һуҗумчи мәмәт әли «қаттиқ зәрбә бериш» мәзгилидә юртиға қайтурулған

Мухбиримиз шөһрәт һошур
2017-03-02
Елхәт
Пикир
Share
Принт
Хитай бесимиға қаршилиқ көрсәткән пидаийларни тутуш һәрикитидә хәлқ аммиси сәпәрвәр қилинған. 2014-Йили авғуст, хотән.
Хитай бесимиға қаршилиқ көрсәткән пидаийларни тутуш һәрикитидә хәлқ аммиси сәпәрвәр қилинған. 2014-Йили авғуст, хотән.
CCTV

9-Феврал күни йеңисар дохтурханисида йүз бәргән, 3 нәпәр хитай көчмән вә бир нәпәр кәнт кадириниң өлүмигә сәвәб болған палтилиқ һуҗумниң қозғатқуч сәвәби һәққидики ениқлишимиз давамида, 8 пәрзәнтниң атиси болған һуҗумчи мәмәт әлиниң бурун үрүмчи вә корлада навайлиқ қилғанлиқи, қаттиқ зәрбә бериш долқунида юртиға мәҗбурий қайтуруп келингәнлики, юрти йеңисар сетилда сиясий тәрбийә көрүватқан мәзгилидә қан қусқанлиқи мәлум болди.

Мәлум болушичә, бу йил 30 нәччә яш болған мәмәт әли тирикчилик үчүн үрүмчидә навайлиқ қилған, лекин 2014-йили 6-айда башланған қаттиқ зәрбә бериш долқунида, у үрүмчидин һәйдәлгән. Җәнубтики һәм иқтисадий, һәм сиясий чәклимиләр сәвәбидин тирикчилик ишлириниң нормал давамлишишиға көзи йәтмигән, мәмәт әли шималда түзүм нисбәтән бош дәп тәхмин қилип корла шәһиригә көчүп барған вә шу йәрдә навайлиқ қилған. Әмма, уйғур районида қаттиқ зәрбә бериш һәрикитиниң бир парчиси сүпитидә елип берилған көчмә нопусни юртиға қайтуруш бәлгилимиси сәвәбидин униңға корлидиму арамчилиқ болмиған, мәмәт әлини телефонда юртиға қайтип келишкә көндүрәлмигән кәнт кадирлири корлиға йетип келип уни мәҗбурий қайтуруп әкәткән.

Йеңисарға қайтурулуш билән мәмәт әли йиллардин бери дәсмайә салған дукинидин йәни тирикчилик йолидин айрилған болса, юртидики сиясий муһит уни аилисидинму айрип ташлиған. У кәнттә мәхсус сиясий тәрбийәгә орунлаштурулған. Илгири райондин игилигән учурлиримиздин мәлум болушичә, нөвәттә идийисидә мәсилә бар дәп қаралғанларға мана мушундақ мәхсус сиясий тәрбийәләр берилмәктә, тәрбийә җәрянида, улар өйгә қайтурулмастин, кәнт ишханисида тутуп турулмақта. Мәлум болушичә, мәмәт әли тәрбийилиниш давам қиливатқан мәзгилдә саламәтликидин чатақ чиқип қан қусқан. Даириләр, уни тәкшүртүш үчүн йеңисар дохтурханисиға елип барған. Даириләр йеңисар палтилиқ һуҗумини чәтәлдинла әмәс, йеңисар хәлқидинму йошурун тутқанлиқи үчүн, мәмәт әлиниң қан қусушиға униң бурундин бар болған билингән яки билинмигән бир кесәлниң сәвәб болғанлиқи яки бир қейин-қистақниң сәвәб болғанлиқи мәлум әмәс, әмма җәмийәт хәвәрлиридә мәмәт әлиниң қаттиқ бир қейин-қистаққа учриғанлиқ еһтимали тилға елинмақта.

Мәмәт әли юртиға қайтуруп келингәндин кейин, униң 8 балиси вә аялиға немиләр болғанлиқи мәлум әмәс, улар корлада қепқалғанму, мәмәт әли билән бирликтә юртиға елип келингәнму, юртиға елип келингән болса, уларниң бир туралғуси-бир қору җайи барму вә яки мәмәт әли билән бирликтә сиясий тәрбийәгә орунлаштурулғанму? бу соаллар һазирчә җавабсиз. Әмма учурлардин мәлумки, мәмәт әлиниң 8 балисини беқиш вә тәрбийиләштин ибарәт бир атилиқ бурчини ада қилиши тосқунлуққа учриған; у сиясий тәрбийә көрүватқан күнлиридә қан қусқан. Учурлардин мәлум болушичә, вәқәниң бу тәрәққиятиға асасән, йәрлик аһалиләр йеңисар палтилиқ һуҗумиға бир қетимлиқ «җандин тоюш психикиси» вә яки қейин-қистаққа қарита интиқам елиш туйғуси сәвәб болғанлиқини тәхмин қилишмақта.

Пикирләр (0)
Share
Толуқ бәт