Paltiliq hujumchi memet eli "Qattiq zerbe bérish" mezgilide yurtigha qayturulghan

Muxbirimiz shöhret hoshur
2017-03-02
Élxet
Pikir
Share
Print
Xitay bésimigha qarshiliq körsetken pida'iylarni tutush herikitide xelq ammisi seperwer qilin'ghan. 2014-Yili awghust, xoten.
Xitay bésimigha qarshiliq körsetken pida'iylarni tutush herikitide xelq ammisi seperwer qilin'ghan. 2014-Yili awghust, xoten.
CCTV

9-Féwral küni yéngisar doxturxanisida yüz bergen, 3 neper xitay köchmen we bir neper kent kadirining ölümige seweb bolghan paltiliq hujumning qozghatquch sewebi heqqidiki éniqlishimiz dawamida, 8 perzentning atisi bolghan hujumchi memet elining burun ürümchi we korlada nawayliq qilghanliqi, qattiq zerbe bérish dolqunida yurtigha mejburiy qayturup kélin'genliki, yurti yéngisar sétilda siyasiy terbiye körüwatqan mezgilide qan qusqanliqi melum boldi.

Melum bolushiche, bu yil 30 nechche yash bolghan memet eli tirikchilik üchün ürümchide nawayliq qilghan, lékin 2014-yili 6-ayda bashlan'ghan qattiq zerbe bérish dolqunida, u ürümchidin heydelgen. Jenubtiki hem iqtisadiy, hem siyasiy cheklimiler sewebidin tirikchilik ishlirining normal dawamlishishigha közi yetmigen, memet eli shimalda tüzüm nisbeten bosh dep texmin qilip korla shehirige köchüp barghan we shu yerde nawayliq qilghan. Emma, Uyghur rayonida qattiq zerbe bérish herikitining bir parchisi süpitide élip bérilghan köchme nopusni yurtigha qayturush belgilimisi sewebidin uninggha korlidimu aramchiliq bolmighan, memet elini téléfonda yurtigha qaytip kélishke köndürelmigen kent kadirliri korligha yétip kélip uni mejburiy qayturup eketken.

Yéngisargha qayturulush bilen memet eli yillardin béri desmaye salghan dukinidin yeni tirikchilik yolidin ayrilghan bolsa, yurtidiki siyasiy muhit uni a'ilisidinmu ayrip tashlighan. U kentte mexsus siyasiy terbiyege orunlashturulghan. Ilgiri rayondin igiligen uchurlirimizdin melum bolushiche, nöwette idiyiside mesile bar dep qaralghanlargha mana mushundaq mexsus siyasiy terbiyeler bérilmekte, terbiye jeryanida, ular öyge qayturulmastin, kent ishxanisida tutup turulmaqta. Melum bolushiche, memet eli terbiyilinish dawam qiliwatqan mezgilde salametlikidin chataq chiqip qan qusqan. Da'iriler, uni tekshürtüsh üchün yéngisar doxturxanisigha élip barghan. Da'iriler yéngisar paltiliq hujumini chet'eldinla emes, yéngisar xelqidinmu yoshurun tutqanliqi üchün, memet elining qan qusushigha uning burundin bar bolghan bilin'gen yaki bilinmigen bir késelning seweb bolghanliqi yaki bir qéyin-qistaqning seweb bolghanliqi melum emes, emma jem'iyet xewerliride memet elining qattiq bir qéyin-qistaqqa uchrighanliq éhtimali tilgha élinmaqta.

Memet eli yurtigha qayturup kélin'gendin kéyin, uning 8 balisi we ayaligha némiler bolghanliqi melum emes, ular korlada qépqalghanmu, memet eli bilen birlikte yurtigha élip kélin'genmu, yurtigha élip kélin'gen bolsa, ularning bir turalghusi-bir qoru jayi barmu we yaki memet eli bilen birlikte siyasiy terbiyege orunlashturulghanmu? bu so'allar hazirche jawabsiz. Emma uchurlardin melumki, memet elining 8 balisini béqish we terbiyileshtin ibaret bir atiliq burchini ada qilishi tosqunluqqa uchrighan؛ u siyasiy terbiye körüwatqan künliride qan qusqan. Uchurlardin melum bolushiche, weqening bu tereqqiyatigha asasen, yerlik ahaliler yéngisar paltiliq hujumigha bir qétimliq "Jandin toyush psixikisi" we yaki qéyin-qistaqqa qarita intiqam élish tuyghusi seweb bolghanliqini texmin qilishmaqta.

Toluq bet