Oghlini haraqtin tosqan boway doxturxanidin tutup kétilgen

Muxbirimiz shöhret hoshur
2017-11-02
Élxet
Pikir
Share
Print
Uyghur bowayning kocha charlawatqan xitay qoralliq eskerlirining yénidin ötüp kétiwatqan körünüshi. 2009-Yili 9-iyul, ürümchi.
Uyghur bowayning kocha charlawatqan xitay qoralliq eskerlirining yénidin ötüp kétiwatqan körünüshi. 2009-Yili 9-iyul, ürümchi.
AP

Yéngisarning egüs yézisida oghlini haraqtin tosup eyibligenliki üchün "Diniy esebiylik" bilen eyiblinip késiwétilgen 67 yashliq boway tursun memet, salametlikide mesile körülüp doxturxanida dawaliniwatqan mezgilide tutqun qilin'ghan. U saqchixanigha élip kétilip 3 kün'ge qeder öyige qaytip kelmigendin kéyin, perzentliri uning dorisini élip saqchixanigha barghan. Saqchilar bowayning nedilikini a'ile ezaliridin yoshurush bilen bir waqitta, bowayning dorisinimu qobul qilmighan. Melum bolushiche, bu a'ilidin 1 dada, üch oghul we ikki küy'oghul bolup jem'iy 6 kishi qamaqta iken.

Yéngisarning egüs yézisida 67 yashliq tursun memetning 13 yil burun oghlini haraqtin tosup eyibligenliki üchün 10 yilliq késiwétilgenlik weqesini yenimu tepsiliy éniqlash üchün nahiye we yézidiki alaqidar orunlargha qayta-qaytilap téléfon qilduq. Téléfonimizni qobul qilghan yerlik emeldar we saqchilarning héchbiri weqening rastliqini inkar qilmidi.

Mezkur késim heqqide radi'omizgha kelgen mektupta, tursun memetning aghriqchan bir kishi ikenliki, tutqun qilin'ghan mezgilide doxturxanida dawaliniwatqanliqi eskertilgen. Biz bu uchurning toghriliqini delillesh üchün alaqidar idare-organlargha téléfon qilduq. Xadimlar tursun memetning tutulush sewebi we jeryani heqqide éghiz achmidi. Biz axiri bu ehwalni yenila tursun memetning a'ile-tawabi'atidin soriduq. Tursun memetning jorisi, radiyomizgha kelgen mektupta déyilgenlerning toghriliqini delillidi.

Radiyomizgha kelgen mektupta tursun memet üstidin sot échilmighanliqi, peqet a'ilisige sotning höküm qeghizi oqup bérilgenliki tilgha élin'ghan. Mektupta yene tursun memetning tutqundin bir kün burun qeshqer kérembagh doxturxanisida özini tekshürtkenliki we réntigén'ge chüshkenliki yézilghan. Mektupta tursun memetning aghriqining némiliki tilgha élinmighan. Uning jorisimu bu heqte toxtilishni xalimidi. U peqet tursun memet bowayning ichiwatqan dorisi barliqini tilgha aldi.

Melum bolushiche, yéngisarda dawam qiliwatqan keng-kölemlik tutqun sewebidin tursun memet boway özini saqchi izdigen haman, gerche héchqandaq jinayiti yoqluqi özige ayan bolsimu, tutulush we késilish nöwitining özige kelgenlikini texmin qilghan. Saqchi xadimliri tursun memetning tutulush sewebi bilen birlikte tutup turuluwatqan orninimu yoshurghan؛ perzentliri élip kelgen dorini qobul qilmighan. Jorisining bayan qilinishiche, da'iriler tursun memetni a'ile-tawabi'ati bilen yéqinda ékranda körüshtürgen.

Tünügünki éniqlishimizda tursun memet boway a'ilisidin özi we üch oghli bilen 4 kishi késilgenliki déyilgen idi. Bügünki éniqlishimizda mezkur a'ilidiki ikki küy'oghulningmu nöwette qamaqta ikenliki ashkarilandi.

Toluq bet