Шиветсийәдики хитай әлчиханисиға четилған зор җасуслуқ делоси вә униң баш - ахири (9)

Мухбиримиз қутлан
2015-06-20
Share
babur-mexsut-305.jpg Рәсимдики қолини көтүрүп турған әр бабур мәхсут, оң тәрәптики хитай аял шиветсийәдин қоғлап чиқирилған хитай аял дипломат җов лулу. 2010-Йили.
svd.se din elinghan


9 - Қисим: патпарақчилиқта қалған хитай әлчиханиси

Сәпо, йәни шиветсийә дөләт хәвпсизлик сақчилири стокһолмдики хитай әлчиханисиға четилған бу зор җасуслуқ делосини 2 йилға йеқин мәхпий көзитиш вә тәкшүрүш арқилиқ ахири торни йиғиш қарариға келиду.

2009 - Йили 6 - айниң 4 - күни 62 яшлиқ уйғур җасус стокһолмниң җәнубий районидики туралғусида қолға елиниду.

Бу хәвәр шу күни шиветсийә дөләт телевизийәси арқилиқ елан қилиниду. Шиветсийәниң шу вақиттики баш министери фредрик райнфелтму шу күни телевизийә мухбирлириға бу һәқтә баянат бериду: “биз ахириқи һесабта шиветсийәдә қанунсиз һалда җасуслуқ һәрикити билән шоғулланған 62 яшлиқ бу кишини қолға елиш тоғрилиқ қарар чиқардуқ.”

Җасус гумандариниң туюқсиз қолға елиниши стокһолмдики хитай әлчиханисини қаттиқ патпарақчилиққа селиветиду. Улар скандинавийә әллиригә орунлаштурған мәхпий җасуслиридин кимниң тутулғанлиқини җәзим қилалмай, 62 яшлиқ уйғур җасусқа шу күни 57 қетим телефон уриду.

Җасус гумандариниң өйидин қолға чүшкән 9 данә янфон сәпо хадимлириниң ишханисида туруп тохтимай җириңлайду.

“мухбир” қияпитигә киривалған хитай ишпийони лей да уйғур җасус билән алақә қилалмай пути көйгән тохудәк типирлайду. Сәпо хадимлири униң хитай әлчиханисидики “дипломат” қияпитигә киривалған аяли билән қилған кодлуқ телефон алақисини мәхпий аңлайду.

6 - Айниң 5 - күни әтигән саәт 9:30 болғанда, “мухбир” қияпитигә киривалған әр җуңго әлчиханисидики аял “дипломат”қа, телефон қилип уйғур җасусниң өйиниң телефон номурини дәп беришни сорайду. У телефонда аял “дипломат” қа: “номурни тәтүр тәрәптин оқуғин!” дәйду. Шу күни улар бирқанчә қетим телефонлишиду. Һалбуки, улар телефонда нормал сөзлишишниң орниға кодлуқ сөзләрни ишлитип қарши тәрәпкә учур бериду. Мухбир әр: “қаттиқ ямғур яғидиған болди” дегинидә, аял дипломат: “машинини еһтият билән һәйдигин” дәп агаһландуруш бериду.

Сәпо хадимлири дәрһал “мухбир” қияпитидики лей даниң кәйнигә чүшүп, мәхпий көзитиду. Шу күни саәт 11 дин 49 минут өткәндә у аптомобилини һәйдәп өз туралғусидин айрилиду - дә, удул 62 яшлиқ җасус гумандариниң рокесведтики өйи әтрапиға келиду. У аптомобилини һәйдигән пети бу мәһәллини икки қетим айлинип чиқиду, һалбуки, җасус гумандариниң өйигә киришкә җүрәт қилалмайду. Кейин у янфонидин җуңго әлчиханисидики аял “дипломат” қа телефон қилип, бу йәрдин дәрһал айрилиду.

62 яшлиқ уйғур җасус қолға елинип, узун өтмәй шиветсийә ташқи ишлар министирлиқи стокһолмдики хитай әлчиханисиға ултиматум тапшуриду. Униңда аял “дипломат” җу лулу билән униң “мухбир” қияпитигә киривалған ери лей даниң икки һәптә ичидә шиветсийә чеграсидин мәңгүгә айрилиши тәләп қилиниду.

Қизиқарлиқи шуки, хитай тәрәп шиветсийә һөкүмитиниң мәзкур җасуслуқ делосидики әйибнамисини инкар қилидиған һечқандақ дәлил - испат көрситәлмигән болсиму, лекин дипломатик усулда “өч елиш” ни унтумайду. Хитай тәрәп һечқандақ сәвәбсизла бейҗиңдики шиветсийә әлчиханисида хизмәт қилидиған бир җүп әр - аял шивет дипломатини қоғлап чиқириду.

Уйғур җасусниң тутулғанлиқи һәққидики хәвәр узун өтмәйла шиветсийәдики уйғур җамаитигиму мәлум болиду.

Сәпо хадими вилһелим унгә аридин 6 йил өткән бүгүнки күндә 62 яшлиқ уйғур җасусниң өйидин шиветсийәдә яшиғучи уйғур сиясий актиплириниң көплигән учурлириниң тепилғанлиқини илгири сүриду: “биз җасус гумандариниң өйидин җуңго дөләт хәвпсизлик органлири диққәт қиливатқан вә изчил көзитиватқан бир қисим уйғурларниң исим - фамилиси, телефон номури һәмдә уларниң фото сүрәтлирини қолға чүшүрдуқ. Шуниң билән биллә йәнә җасус гумандариниң улар билән учрашқан орунлири вә сөзләшкәндә қалдурған хатирилирини таптуқ.”

Шиветсийә уйғур маарип уюшмисиниң нөвәттики рәиси әхмәт турсун әпәндиму бу һәқтә гуваһлиқ берип, әйни чағда уюшма әзалириниң норвегийә вә финландийәгә қилған сәпәрлириму җасус тәрипидин хитай әлчиханисиға йәткүзүлгәнликини тәкитләйду.

Бабурниң ақлиғучи адвокатиму шиветсийә дөләт радийосиниң зияритини қобул қилип, өзиниң 62 яшлиқ уйғур җасусни ақлашқа амалсиз қалғанлиқини тәкитләйду: “мәсилә шу йәрдики, җавабкарниң җасуслуққа даир қилмиши йетәрлик дәлил - испатлар билән тиркәлгән икән.”

(9 - Қисми түгиди, давами бар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт