Shiwétsiyediki xitay elchixanisigha chétilghan zor jasusluq délosi we uning bash-axiri (A10)
2015.06.26

10- Qisim(A): jasusning sotqa tartilishi
62 Yashliq Uyghur jasus gumandari tutulghandin kéyin shiwétsiye adalet ministirliqi bu délogha intayin inchikilik we éhtiyat bilen mu'amile qilidu.
Sitokholm shehirining pulxémsgatan kochisidiki 30 -nomurluq qoruda mezkur déloning 2000 betke yéqin matériyali mexsus guruppidiki xadimlarning birqanche ayliq emgiki jeryanida hazirlinidu.
Bu heqte shiwétsiye dölet radi'osi mexsus xewer bérip munularni bildüridu: “Sepo, yeni shiwétsiye dölet xewpsizlik idarisining mexsus xadimliri sitokholm shehirining pulxémsgatan kochisi 30-nomurluq qorugha jaylashqan axbarat merkizide mezkur jasusluq délosigha da'ir matériyallarni 4 ay analiz qilidu hemde 2000 betke yéqin doklat teyyarlaydu. Halbuki, 62 yashliq jasus qolgha élin'ghan deslepki künlerde öz jinayitige iqrar qilmay turuwalidu.”
Yérim yildin köprek teyyarliqtin kéyin, 2009-yili 12-ayning otturilirida 62 yashliq jasus tunji qétim resmiy soraq qilinidu. 2010-Yili 2-ayning 1-küni u sitokholm sheherlik sot mehkimiside birinchi qétim sotlinidu.
Mezkur sotta gwentanamo türmisidin “Gunahsiz” dep qoyup bérilip, awwal albaniyege, andin shiwétsiyege yerleshken adil hékimjan teklip boyiche guwahliq béridu.
Shiwétsiye Uyghur komitétining sabiq re'isi abdushükür muhemmet ependimu eyni chaghda Uyghur komitétining re'islik wezipisini üstige alghan mahinur hesenowa xanim bilen bille sotqa qatnashqanliqini eslime qilidu.
Mezkur déloni pash qilish guruppisidiki sepo xadimliridin tomas lindström bilen jasusluqqa qarshi analizchi wilhélm un'gé qatarliq kishiler jasus gumandarining shiwétsiyediki Uyghur teshkilatliri bilen Uyghur siyasiy aktiplirining uchurini xitay elchixanisigha yetküzgenliki heqqide guwahliq béridu.
Adil hékimjan, eyni chaghdiki sot heqqide eslime qilip, Uyghur jawabkarning sotta héchqandaq ish bolmighandek bézirip olturghanliqini tilgha alidu. Abdushükür muhemmet ependimu jawabkarning sot meydanida sirttin qatnashqan Uyghurlarni qesten körmeske salghanliqini tekitleydu.
(10-Qisimning bash qismi tügidi, dawami bar)