Уйғур дияридики хәлқләр байдики көмүрканға һуҗум қилиш вәқәсидин зади қанчилик хәвәр тапти?

Мухбиримиз қутлан
2015-10-28
Share
komurkan-komur-kan.jpg Хитайдики мәлум көмүркан. 2015-Йили 20-авғуст.
AFP

18-Сентәбир күни бай наһийисидә йүз бәргән көмүрканға һуҗум қилиш вәқәси радиомиз арқилиқ ташқи дуняға ашкара болғандин кейин, хитай һөкүмити мәзкур вәқә һәққидики хәвәрләрни қаттиқ қамал қилған.

50 Тин артуқ адәм өлгәнлики илгири сүрүлүватқан мәзкур вәқә һәққидә хитай һөкүмәт таратқулириниң һазирға қәдәр бир парчиму хәвәр бәрмәслики көзәткүчиләрниң диққитини қозғимақта.

Ундақта, вәтән ичидики уйғурлар бай наһийисидә йүз бәргән көмүрканға һуҗум қилиш вәқәсидин зади қанчилик хәвәр тапалиған? даириләрниң мәзкур вәқәни ахбараттин йошуруши вә бу һәқтики хәвәрләрниң хәлқ арисиға тарқилишини қаттиқ тосуши зади қанчилик үнүм көрситәлигән?

Биз бу һәқтә әһвал игиләш үчүн уйғур елидики икки җайға телефон қилдуқ. Ават наһийәсиниң йеңиериқ йезисиға "муқимлиқ" хизмити үчүн чүшкән хизмәт гурупписиниң мәлум бир әзаси зияритимизни қобул қилди.

У зияритимиз давамида кәнттики деһқанларни бай вәқәси тоғрисида гәп-сөз қилиштин қаттиқ чәкләйдиғанлиқини, өзлириниңму бу темида гәп-сөз қилмайдиғанлиқини яки сүрүштә қилмайдиғанлиқини билдүрди.

Биз арқидин, атуш шәһириниң үстүн атуш йеза қайрақ кәнтидики "қизил тәшвиқат чолпини" қурбан өмәрдин әһвал сүрүштүрдуқ. У зияритимиз давамида байдики көмүрканға һуҗум қилиш вәқәси һәққидә һөкүмәт тәрәптин һечқандақ хәвәр берилмигәнликини, әмма хәлқ арисида бу һәқтә гәп-сөзләрниң тарқилип йүргәнликини ашкара қилди: "байдики вәқәни аңлидим. Бу һәқтә һөкүмәтниң радио-телевизийә вә гезит-журналлирида һечқандақ хәвәр берилмиди. Һөкүмәтниң бу һәқтә немә үчүн хәвәр бәрмигәнликини билмидим. Һалбуки, хәлқ арисида бай наһийисидә көмүрканға һуҗум қилиш вәқәси йүз бәргәнлики тоғрилиқ миш-миш гәпләр болмақта. Шәхсән өзүм бу һәқтә икки кишидин аңлидим. Мән шәһәрлик һөкүмәткә кирип бу һәқтә әһвал игиләп бақмақчимән һәмдә ‹әсәбий күчләр' ниң вәқә пәйда қилип муқимлиқни бузғанлиқиға қарши тәшвиқат елип бармақчимән. Мән һазирға қәдәр һойламда қизил байрақ чиқиришни давамлаштуруп келиватимән. Бу қетимлиқ дөләт байримидиму бала-чақилирим билән байрақ чиқардим. Өткәндә қизилсу областиниң сабиқ партком секретари ваң шиңхәй атушни зиярәт қилғанда мәхсус мениң өйүмгә чиқип, партийиниң ғәмхорлуқини йәткүзди…"

Ават наһийәсидики бир нәпәр "муқимлиқ" кадири билән үстүн атуш йезисидики "тәшвиқат чолпини" қурбан өмәрниң баянлири бизгә байдики көмүрканға һуҗум қилиш вәқәси һәққидики хәвәрләрниң аллиқачан вәтән ичидики уйғурлар арисиға тарқилип болғанлиқини көрсәтмәктә.

Программиниң тәпсилатини юқиридики аваз улинишидин аңлиғайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт