Қорал елип қачқан гумандар ели мәттурсунниң толуқ кимлики вә иш излири ашкариланди

Мухбиримиз шөһрәт һошур
2015-03-04
Share
Eli-Mettursun-qoral-elip-qachqan-305 Қорал елип қачқан гумандар ели мәттурсунни тутуш елани.
Social Media

Хитай сақчилириниң чиқарған бир уқтурушида баян қилинишичә, ели мәттурсун исимлик хотән керийәлик бир хироен әткәсчиси, 1-март күни уни чиңхәйдики бир меһманханида хотәнгә елип маңған сақчиларниң қолидики икки наганни оқлири билән оғрилап қечип кәткән.

Йәнә сақчи торбетидә баян қилинишичә, ели мәттурсун қечип 15 саәттин кейин тутулған; әмма бу учурлар узун өтмәй тордин өчүрүветилгән. Мухбиримиз бу һәқтә икки ениқлаш елип бериш арқилиқ, ели мәттурсунниң мәһәллә күйлири билән сөзлишиш пурситигә еришти. Мәлум болушичә, ели мәттурсун, уқтурушта дейилгәндәк, хироен әткәсчилики билән әмәс, дөләт бихәтәрликигә тәһдит йәткүзүш гумани билән тутулған. У бурун бир мәһәл яман йолларда маңған болсиму, кейинки мәзгилләрдә өзгәргән вә шаңхәйдә ашхана ечип игилик тиклигән; у шуниңдин кейин көплигән хәйр-сахавәт ишлирини қилған. Шуниңдин кейин, хитай даирилири униң пейиға чүшкән.

Мәлум болушичә, ели мәттурсун, керийәниң җай йеза қаттикүн кәнтидики иқлимхан исимлик оқутқучи вә бир диний затниң беқивалған оғли болуп, у толуқ оттурини пүттүрүпла җәмийәткә чиққан. Бу йил 35 яшқа киргән ели мәттурсун, буниңдин 7-8 йил бурун, оюн-тамашиға берилип бир мәһәл юрт сорап йүргән, әмма кейинки мәзгилләрдә, униң һаятида бурулуш характерлик өзгириш болған, у шаңхәйдә ашхана ечип иқтисад җәһәттин ронақ тапқан, шуниңдин кейин юрти керийәдә бир қатар хәйр-сахавәт ишлирини қилған. Униң мәһәллә койидики бириниң баян қилишичә, у бирқанчә йилниң алдида керийәниң шәнбә базар йезисидики җәзхорларниң йиғип яман йолдин тосқан вә улардин пул йиғип, бир яшанғанлар санаторийәси тәсис қилған. У бу қилғини үчүн хитай даирилириниң диққитини тартқан. Болупму у, йеқинда бир мәсчиткә вә талип балиларға пул ярдәм қилғини үчүн, җәмийәт тәртипини бузуш вә бузушқа қутратқулуқ қилиш билән әйиблинип, буниңдин бир ай бурун тутқун қилинған. Керийә наһийисидә очуқ мәйдан сот ечилип униң қолға елинғанлиқи елан қилинған.

Ашкарилинишичә, ели мәттурсун, керийә қамақханисидин намәлум йоллар билән қечип кәткән, сақчилар уни из қоғлап хитай өлкилиригә берип тутуп қайтиватқинида, мәзкур қорал елип қечиш вәқәси йүз бәргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт