Обулһәсән абдукеримниң наһәқ делоси 60 миңдин артуқ тор зиярәтчисиниң инкасини қозғиған

Мухбиримиз қутлан
2014.01.30
Share on WhatsApp
Share on WhatsApp
obulhesen-abdukerim-meyip.jpg Обулһәсән абдукеримға хотән вилайәтлик мейипләр җәмийити тәрипидин берилгән мейиплик кинишкиси.
RFA/Qutlan

Үрүмчидики иҗарә өйидә туруп зияритимизни қобул қилған обулһәсән абдукерим һәққаний йешимгә еришмигичә өзиниң һәргизму әрз-дәвадин тохтап қалмайдиғанлиқини билдүрди.

Обулһәсәнниң ашкарилишичә, хотәнниң ласгуй базири ақташ кәнтидин тартип таки уйғур аптоном районлуқ сәһийә назарити вә юқири сотқа қәдәр ички тор һасил қилған бйограт система униң әрз-шикайитини бирдәк рәт қилип кәлгән. 10 Йил ичидә бу наһәқ делодин қәтий бәл қоювәтмигән обулһәсән ахирида җамаәт пикри вә тор кезәрлириниң коллектип инкаси арқилиқ дәвада бөсүш еғизи ечишқа тиришқан.

Обулһәсән абдукеримниң қолидики барлиқ дәлил-испатлири билән 1-айниң 20-күни торға қоюлған мәхсус язмиси уйғур тор бәтлиридә күчлүк инкас пәйда қилған. Униң радиомизға билдүрүшичә, қисқа муддәт ичидә 60 миңдин артуқ тор зиярәтчиси бу наһәқ дело һәққидә инкас қайтурған. Униң мунасивәтлик қанун маддилиридин нәқил кәлтүрүп, дәлил-испатларни қошуп язған язмиси тордин-торға улап бесилған. Бу һәқтики күчлүк җамаәт пикри мейип обулһәсәнниң һәққанийәт үчүн дәвадин һәргиз қайтмаслиқтәк роһиға техиму зор ишәнч беғишлиған.

У өз язмисида хотәнниң ласгуй базар ақташ кәнтидин тартип уйғур аптоном районлуқ органларға қәдәр мәзкур делоға мунасивәтлик 11 шәхс вә орун үстидин әрз қилидиғанлиқини, уларниң исим-фамилиси, адреси, қилмиши һәмдә уларниң қанунниң қайси маддисини бузғанлиқини тәпсилий тилға алған. Обулһәсән йәнә 10 йил җәрянида өзиниң сағлам бир инсандин нимҗан мейипла айлинип қалғанлиқини, пүтүн аилиси бойичә ханивәйран болғанлиқини шундақла җисманий, иқтисадий вә роһий җәһәттин мислисиз дәриҗидә сунғанлиқини баян қилди һәмдә буниң үчүн мәзкур делоға мунасивәтлик шәхс вә орунлардин 12 милйон сом төләм тәләп қилидиғанлиқини билдүрди.

Обулһәсән абдукерим зияритимиз җәрянида 2007-йилидин 2009-йилиға қәдәр икки йил җәрянида ласгуй базар ақташ кәнт кадирлириниң уни юқири орунларға берип әрз қилиштин тосқанлиқини, һәтта униң һойлисиға мәхсус адәм қоюп назарәт қилғанлиқини билдүрди.

У бизниң “мәзкур давада утуп чиқип, төләмгә еришишкә ишәнчиңиз барму?” дегән соалимизға җаваб берип: “ишәнчим бар, бу даваниң ахири чиқмиғучә һәргиз ваз кәчмәймән!” деди.

Тәпсилатини аваз улиништин аңлиғайсиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.