Конашәһәр наһийисиниң сайбағ йезисида тоқунуш йүз берип 16 адәм өлгән

Мухбиримиз қутлан
2013-12-16
Share
xitay-saqchi-uyghur-qizi-chong-bazar.jpg Хитай қораллиқ күчлириниң хәлқаралиқ чоң базар әтрапида коча чарлаватқан көрүнүши. 2009-Йили 14-июл, үрүмчи.
AFP

Тәңритағ тори тарқатқан хәвәрләргә қариғанда, 15-декабир, йәни йәкшәнбә күни кәчқурун шу йәр вақти саәт 11 әтрапида қәшқәрниң конашәһәр наһийисигә қарашлиқ сайбағ йезисида қанлиқ тоқунуш йүз бәргән.

Һазирғичә мәлум болған учурларға асасланғанда, тоқунушта икки сақчи өлгән, йәрлик уйғурлардин 14 нәпәр киши нәқ мәйданда етип өлтүрүлгән, икки нәпири тирик тутулған.

Мәлум болушичә, йәкшәнбә кәч саәт 11 ләр әтрапида сайбағ сақчиханисиниң сақчилири “гуманлиқ җинайәтчиләр” ни тәкшүрүш үчүн сайбағ йезисиниң гүлчимән кәнти 1-әтритини тәкшүрүватқанда қаршилиққа дуч кәлгән. Буниң нәтиҗисидә сақчилар билән йәрлик уйғурлар арисида шиддәтлик тоқунуш йүз бәргән. Кимлики намәлум болған һуҗумчилар партлиғучи буюмлар вә пичақ билән сақчи тәрәпниң шиддәтлик оқ ямғуриға тақабил турған. Ақивәттә бу тоқунуш 16 адәмниң өлүши билән ахирлашқан. Нөвәттә сақчи тәрәп тирик қолға чүшкән икки уйғурни сорақ қилмақтикән.

Дүшәнбә күни хитай дипломатийә министирлиқиниң баянатчиси хва чүнйиң мухбирларни күтүвелиш йиғинида: “бу қанлиқ вәқә террорчиларниң җәмийәткә вә инсанийәткә қарши һәқиқий қияпитини ашкара қилди. У хәлқара җәмийәтниң бирдәк әйиблишигә учриши керәк” дегән.

Дүшәнбә сәһәрдин башлап бу вәқә б б с, с н н вә “нюйорк вақит гезити” қатарлиқ дуняви ахбарат васитилиридә арқа-арқидин хәвәр қилинған. Һалбуки, хитай һөкүмәт тәрәп бу вәқә һәққидики учурларни қаттиқ қамал қилғачқа, дуняви таратқуларниң хәвәрлири пәқәтла хитай тәрәп тәңритағ торида елан қилған қисқа хәвәрдики мәзмунлар биләнла чәкләнгән.

Биз бу вәқә һәққидә йәрниму илгирилигән һалда әһвал игиләш үчүн нәқ мәйданға телефон қилдуқ. Вәһаләнки, қәшқәрдики җиддий һаләт сәвәблик, қәшқәр вилайәтлик мәмурий мәһкимә, тоққузақ наһийилик һөкүмәт вә сайбағ йезилиқ сақчихана қатарлиқ орунлар телефонимизни қобул қилмиди.

Биз сайбағ йезисиға қошна келидиған оғусақ йезилиқ сақчиханиға телефон қилип әһвал сүрүштүрдуқ. Нөвәтчи хадим телефонни алған болсиму лекин җаваб беришкә җүрәт қилалмай телефонни қоювәтти.

Биз оғусақ йезилиқ сақчиханиға қайта телефон қилғинимизда нөвәтчи хадим бу вәқә һәққидә һечнемә дейәлмәйдиғанлиқини, бу ишни пәқәт сақчихана башлиқи билән сиясий йетәкчиниң билидиғанлиқини ейтип давамлиқ сөзлишишни рәт қилди.

Биз арқидин оғусақ йезилиқ сақчиханиниң сиясий йетәкчиси абдусаламға телефон қилдуқ. У телефонниң әркин асия радиосидин кәлгәнликини уқуп телефонни қопаллиқ билән үзүвәтти.

Биз техиму илгирилигән һалда учур елиш үчүн тоққузақ наһийисидики аһалиләрдин әһвал сүрүштүрдуқ. Телефонимизни қобул қилған бир хитай аял соалимизға қопаллиқ билән муамилә қилди.

Конашәһәр наһийисидә олтурушлуқ мәлум бир уйғур оқутқучи телефонимизни қобул қилип, бу вәқәни башқилардин аңлиғанлиқини, әмма телефонда бу һәқтә сөзлишишни халимайдиғанлиқини билдүрди.

Қәдирлик радио аңлиғучилар, бу вәқә һәққидә йәниму илгирилигән һалда учур беришкә тиришмақтимиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт