13 Уйғурға өлүм җазаси берилиши түркийәгә берилгән сигналму?

Ихтиярий мухбиримиз әркин тарим
2014-12-09
Share
ikki-partlash-uyghur-sot-1.jpg 30-Апрел вә 22-май партлаш вәқәсигә четишлиқ дәп сотлиниватқан уйғур яшлири. 2014-Йили декабир, үрүмчи.
CCTV

Хитай коммунист партийәсиниң тәклипигә бинаән уйғур елини зиярәт қилған түркийәниң һакимийәт бешидики адаләт вә тәрәққият партийәсиниң ташқи ишларға мәсул муавин башлиқи муһаммәд билал маҗит башчилиқидики вәкилләр өмики үрүмчигә чүшкән күни хитайниң үрүмчи оттура сот мәһкимиси, бу йил ичидә үрүмчидә йүз бәргән икки чоң вәқәгә четишлиқ дәп әйибләп, 13 кишигә өлүм җазаси бәргән.

Бу хәвәр шинхуа хәвәр агентлиқиниң уйғурчә тор бетидә уйғур аптоном район рәиси нур бәкриниң түркийә адаләт вә тәрәққият партийәсиниң муавин рәиси, парламент әзаси муһаммәд билал маҗит башчилиқидики өмәкни қобул қилғанлиқиға аит хәвәр билән тәң елан қилинди.

Һазир түркийәни идарә қиливатқан адаләт вә тәрәққият партийәсиниң муавин башлиқи муһаммәт билал маҗит әпәнди 12-айниң 5-күни иҗтимаий таратқуларда үрүмчи зиярити тоғрисида тарқатқан хәвиридә мундақ дәп язған: хитай коммунист партийәсиниң тәклипигә бина ‘ән биз һазир хитайда. Шаңхәй вә бейҗиңдики зияритимизни ахирлаштуруп үрүмчигә меңиш алдида туруватимиз.

Түркийәдики бәзи тор гезитлиридә елан қилинған хәвәрләрдә түркийә зиярәт өмики үрүмчигә барған күни хитайниң 13 уйғурға өлүм җазаси бериши, бу икки хәвәрниң бир бәттә елан қилинишиниң тасадипий әмәслики, хитай һөкүмитиниң түрк һөкүмитигә бәргән сигнали икәнликини илгири сүрмәктә. 2002-Йили милләтчи һәрикәт партийәси рәиси дәвләт бағчәли қәшқәрни зиярәт қилған вақтида хитай һөкүмити қош тиллиқ маарипни йолға қойидиғанлиқини елан қилған иди. 2009-Йили түркийәниң сабиқ дөләт башлиқи абдуллаһ гүл үрүмчини зиярәт қилип болғандин кейинла үрүмчи вәқәси мәйданға кәлгән иди. Ундақта бу қетим түркийәни башқуруватқан адаләт вә тәрәққият партийәси муавин рәиси муһаммәт билал маҗит башчилиқидики өмәк үрүмчини зиярәт қиливатқан күни 13 уйғурға өлүм җазаси бериши немә мәнини ипадиләйду? бу һәқтә көз қаришини елиш үчүн мутәхәссисләргә микрофонимизни узаттуқ.

Түркийә истратегийилик чүшәнчә институти мутәхәссиси доктор әркин әкрәм әпәнди, хитай сотиниң 13 уйғурға өлүм җазаси беришиниң түрк һөкүмитигә берилгән сигнал икәнликини ейтти. Тәтқиқатчи һамут гөктүрк әпәнди болса тайландтики 300 уйғурни түркийә елип келимән дәватқан бир пәйттә 13 уйғурға өлүм җазаси берилиши түркийә һөкүмитигә берилгән очуқ-ашкара сигнал икәнликини илгири сүрди.

Хәвәрләргә асасланғанда, хитай соти 8-декабир күни, үрүмчидә йүз бәргән 30-март пойиз истансисиға һуҗум қилиш вәқәси вә әтигәнлик базарға һуҗум қилиш вәқәси һәққидә сот ечип, икки вәқәгә четишлиқ гумандарлар үстидин һөкүм елан қилған. Һөкүмдә 13 кишигә өлүм җазаси берилгән. Мәлум болушичә, берилгән өлүм җазалиридин бәши кечиктүрүп иҗра қилинидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт