Үрүмчи өсмүрләр түрмиси вәқәсиниң йәнә бир бөлики-түрмидин қечиш-ашкариланди

Мухбиримиз шөһрәт һошур
2016-06-02
Share
sot-olum-jaza-uyghur-5-iyul.jpg CCTV Хәвиридә берилгән, 5-июл вәқәсигә четишлиқ уйғурларни өлүм җазасиға һөкүм қилған көрүнүш. 2009-Йили 15-өктәбир.
AFP

Өткән һәптә үрүмчи уланбайдики өсмүрләр түрмисидә йүз бәргән қанлиқ вәқә һәққидики илгирики хәвәрлиримиздә бир қисим өсмүр мәһбуслар билән нөвәтчи сақчилар арисида тоқунуш чиққанлиқи вә тоқунуштики мәһбусларниң түрмидә етиветилгәнлики һәққидә учур бәргән идуқ, мухбиримизниң илгириләп әһвал ениқлиши давамида, өсмүр мәһбусларниң икки нәпәр нөвәтчи сақчини өлтүргәндин кейин 10 нәпириниң түрмидин қечип чиққанлиқи вә булардин 3 нәпириниң түрмә сиртида етиветилгәнлики, қалған йәттисиниң тирик тутулғанлиқи ашкариланди.

Биз вәқә һәққидә техиму ениқ вә тәпсилий мәлуматқа еришиш үчүн үрүмчидики мунасивәтлик орунларға телефон қилдуқ, хадимлар давамлиқ һалда вәқәдин хәвәрсизликини ейтти.

Телефонимизни қобул қилған йәнә бир хадим вәқәниң тәпсилати һәққидә мунуларни билдүрди:
-Матәм мурасимида дейилишичә, 25-числа әтигәндә бир қисим балилар түрмидин қечишни пиланлиған, андин бирси уйғур, бирси хәнзу икки сақчини өлтүрүп қечип чиқип кәткән, иккинчи күни йәни қечип кәткәндин кейин һәммиси тутуп келингән.
Соал: вәқәдә өлгән киши қанчә?
Җаваб: икки. Икки нәпәр сақчи.
Соал: (уланбайдики) вәқә чиққан түрмә аяллар түрмисиму, өсмүрләр түрмисиму?
Җаваб: өсмүрләр.
Соал: түрмидин қечип чиққанлар қанчә?
Җаваб: җәмий 10 нәпәр, буниң ичидә 3 нәпири етиветилгән.
Соал: сиз бу учурни бирәр йиғинда аңлидиңизму яки бир доклаттин оқудиңизму?
Җаваб: шу күни һөкүмәт тәрәп қол телефонимизға бир қисқа учур әвәтти бу һәқтә, шуңа бу дегәнлирим һөкүмәт тәрәпниң учури.
Соал: шу учурда ениқ һалда немиләр дейилгән?
Җаваб: һөкүмәтниң бу учурида мундақ дейилгән " 5-айниң 25-күни сәһәр, үрүмчи 1-өсмүрләр түрмиси, өсмүрләрни тәрбийиләш орнида, 10 нәпәр тәрбийә обйекти )йәни өсмүр мәһбус( лагирдин қечип чиқип кәтти, җамаәт хәвпсизлик кадир-сақчилириниң қоғлап вә қоршап тутуши нәтиҗисидә һәммиси лагирға қайтуруп келинди. Тамға: үрүмчи җамаәт хәвпсизлик идариси."

Соал: бу уқтурушта өсмүрләрдин қанчә киши өлди дейилгән?
Җаваб: бу тилға елинмиған.
Соал: уқтурушта дейилгини икки сақчи өлгән шундақму?
Җаваб: бир уйғур, бир хәнзу икки сақчи өлгәнлики матәм мурасимида дейилгән.
Соал: өсмүр мәһбусларниң етиветилгән йери қайси әтрап? үрүмчи ичиму үрүмчи сиртиму?
Җаваб: бу тәпсилатларни мән билмәймән, буни матәм мурасимиға қатнашқан бизниң башлиқимиз билиду.

Юқириқи учурлардин қариғанда, хитай даирилири вәқә бесиқтурулғандин кейин идарә, җәмийәт башлиқлирини вәқәниң тәпсилатидин юқириқичиликла хәвәрләндүргән. Әмма уларниң түрмидин немә үчүн қачқанлиқи, қечишқа сәвәб болған вәқә һәққидә мәлумат бәрмигән, әмма бизгә кәлгән учур вә биз игилигән бир қисим мәлуматларға қариғанда, түрмидин қечиш вәқәсигә, түрмидә бир мәһбусниң түрмидә етип өлтүрүлүши вә буниңға қарита қозғалған мәһбуслар исяни сәвәб болған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт