Saybagh qanliq toqunushigha baghlinishliq yene bir weqe - bulaqsu yer asti mektep weqesi

Muxbirimiz shöhret hoshur
2013-12-25
Élxet
Pikir
Share
Print
Pichan lükchün weqesidin kéyin saqchilar axbarat orunlirining resimge tartishini tosuwatqan körünüsh. 2013-Yili 27-iyun, pichan.
Pichan lükchün weqesidin kéyin saqchilar axbarat orunlirining resimge tartishini tosuwatqan körünüsh. 2013-Yili 27-iyun, pichan.
AFP

Saybagh qanliq toqunushi heqqide xewer bergen xitay metbu'atliri shu küni saqchilarning weqe sadir bolghan öyge melum bir gumandarni tutqili barghanliqini ashkarilighan bolsimu, u gumandar chétishliq bolghan weqeni tilgha almighan؛ saybagh yéziliq partkomda échilghan yighinda bolsa, saqchilarning mezkur öyge bulaqsudiki weqeni éniqlash üchün barghanliqini ashkarilighan idi. Muxbirimizning bu yip uchigha asasen, bulaqsudiki bir saqchi xadimidin ehwal igileshliri dawamida, bulaqsudiki weqening bir yer asti diniy mektepning bayqilish we taqilish weqesi ikenliki ashkarilandi. Melum bolushiche, shu weqede az dégende 50 kishi soraq qilin'ghan we bir terep qilin'ghan. Saqchilar tekshürüshni téximu kéngeytip, saybaghdiki islam isma'il jemetining péyigha chüshken chéghida, mezkur toqunush kélip chiqqan.

Muxbir: bulaqsu yéziliq saqchixanimu?
Xadim: he shundaq.

Muxbir: hazir weziyet qandaq bulaqsuda?
Xadim: hazir xéli yaxshi.

Muxbir: ötkende weqe yüz bergen yer qeyerti?
Xadim: saybagh.

Muxbir: yaq, saybaghdiki emes, bulaqsudikini sorawatimen.
Xadim: bulaqsuda yéqinda anche chong weqe bolmidi.

Muxbir: saybaghdiki weqege seweb bolghan yene bir weqe barghu bulaqsuda yüz bergen? yighinda shundaq déyildighu, saqchilar bulaqsudiki weqeni éniqlash üchün barghanda saybagh weqesi kélip chiqti dep.
Xadim: he, inchike weqesini sorawatamsiz, u bir yer asti mektep weqesi.

Muxbir: u yer asti mektepte oquwatqan balilarning sani qanche iken?
Xadim: yigirme nechche bala iken.

Muxbir: oqutquchi qanche we kimler iken.
Xadim: oqutquchi bir, ismi ésimde yoq.

Muxbir: weqede qanche oqughuchi öldi, qanchisi yarilandi?
Xadim: u weqede ölgen, yarilan'ghan bolmidi.

Muxbir: bash gumandarning yeni shu oqutquchining aqiwiti qandaq boldi.
Xadim: uni bilmeymen.

Muxbir: shu weqede sizmu wezipe ötigili bardingizmu?
Xadim: yaq, men barmidim.

Muxbir: weqeni siz yazma bir matériyaldin uqtingizmu, yighindinmu?
Xadim: yighindin uqtum, shu chaghda saqchixanimizdimu bir yighin échilghan, uningdin kéyin yéqinda yéziliq partkomdiki yighindimu tilgha élindi.

Muxbir: bulaqsu yéziliq partkomning shu yighinida yer asti mektep weqesi heqqide néme déyildi?
Xadim: inchike weqesining gumandarliri saybagh weqesining gumandarliri bilen öz-ara chétishliq, eger biz shu weqeni waqtida bir terep qilmighan bolsaq, saybaghdiki weqege oxshash chong weqe kélip chiqatti dédi.

Muxbir: inichkidiki yer asti mektep weqesi qachan yüz bergen?
Xadim: bir aydin éship ketti, chétishliq kishilerning hemmisi yighishturulup boldi.

Muxbir: qanchilik kishi yighishturuldi.
Xadim : elliktin artuq kishi tutup kélinip soraq qilinip, qoyup bérilidighini qoyup bérilip, jazalinishqa tégishlikliri jazalinip boldi. Bularning shaykiliri köp bolghachqa, saybaghdimu tekshürüsh élip bériwatqanda shu weqe kélip chiqti.

Muxbir: inchike kenti, bulaqsuning nerige toghra kélidu?
Xadim: aqtu bilen tutishidighan jayda.

Yuqirida 15-dékabir saybagh qanliq toqunushigha baghlinishliq dep qaralghan bulaqsudiki inchike weqesi yeni yer asti mektep weqesi heqqide bir qisim melumatlarni diqqitinglargha sunduq.

Toluq bet