Шиветсийәдики хитай әлчиханисиға четилған зор җасуслуқ делоси вә униң баш - ахири - - 4 - қисим: күтүлмигән нәтиҗә

Мухбиримиз қутлан
2015-05-15
Share
Adil-Hekim-Adwukati-Shiwetsiye-305 Сүрәттә, адил һекимҗан вә адвокати Sten De Geer әпәнди соттики ғәлибисидин кейин биргә.
www.csmonitor.com Дин елинди. Сүрәтниң нәшир һоқуқи www.csmonitor.com Да.


Стокһолм шәһәрлик сот мәһкимисиниң 2010 - йили 8 - мартта чиқарған “б - 8976 - 09 номурлуқ” сот хатирисидики бәзи тәпсилатлар әйни вақитта шиветсийәдики хитай әлчиханисиниң адил һекимҗан делоси һәққидә пүтүн күчи билән ахбарат топлашқа урунғанлиқини ашкара қилиду.

Мәлум болушичә, хитайниң сикандинавийә әллиридики җасуслуқ тори әйни вақитта гуәнтанамо түрмисидин тунҗи түркүмдә “гунаһсиз” дәп қоюп берилгән адил һекимҗанни овлаш вә уни хитайға қайтуруп кетиш мәхпий пиланини түзгән.

Сәпо, йәни шиветсийә дөләт хәвпсизлик идарисиниң әйни чағда хитай әлчиханисиға четилған җасуслуқ делосини тәкшүрүшкә мәсул хадимлириниң йеқинда ашкарилишичә, хитай тәрәп “шиветсийә һөкүмити гуәнтанамодин қоюп берилгән адил һекимҗанға сиясий панаһлиқ бәрмәйду”, дәп һесаблиған.

Шу вәҗидин хитай әлчиханисиниң “дипломат хадими” қияпитидики җу лулу билән униң “мухбир” қияпитидики ери лей да стокһолмниң роксфелт мәһәллисидә олтурушлуқ 62 яшлиқ уйғур җасусни ишқа селип адил һекимҗанниң делоси һәққидә ахбарат топлайду.

Адил һекимҗан интайин әпсуслуқ ичидә әйни вақиттики әһвалларни әсләйду.

Шиветсийә уйғур маарип уюшмисиниң әйни вақиттики сабиқ рәиси абдулла көкяр бизниң бу һәқтики соаллиримизға өзи шаһит болған бир қисим кәчмишләр билән гуваһлиқ бериду.

2008 - Йилиниң феврал айлирида шиветсийә көчмәнләр идариси адил һекимҗанниң сиясий панаһлиқ илтимасини рәт қилиду. Бу әһвал хитай даирилириниң уни қолға чүшүрүш, пурсәт кәлгән һаман хитайға қайтуруп елип кетиш пиланини техиму күчәйтиду. Уйғур җасус хитай әлчиханисиниң тапшуруқи билән адил һәкимҗанниң һәммә ишлирини билишкә тиришиду.

Шиветсийәдики хитай җасуслириниң адил һекимҗанниң сиясий панаһлиқ делосиға шу қәдәр қизиқиши вә бу һәқтә мәхпий түрдә ахбарат йиғиши шиветсийә дөләт хәвпсизлик тармақлирини йәниму сәгәкләштүриду. Шиветсийә һөкүмити адил һекимҗанниң сиясий панаһлиқ делосиниң әмәлийәттә хитай билән шиветсийә арисидики бир мәйдан “дипломатик күч синишиш” қа айланғанлиқини чоңқур һес қилиду.

Биринчи қетимлиқ сотта адил һекимҗанниң сиясий панаһлиқ илтиҗасини рәт қилған, һәтта “адил һекимҗанға сиясий панаһлиқ бериш үчүн алди билән шиветсийә парламенти дөләтниң көчмәнләр қануниға өзгәртиш киргүзүши керәк” дәп турувалған шиветсийә көчмәнләр идариси бу қетим өз қарарини кәскин өзгәртиду.

Аридин бир йил 2 ай өткәндә, йәни 2009 - йили 4 - айниң 29 - күни шиветсийә соти адил һекимҗанниң сиясий панаһлиқ илтиҗасини қобул қилғанлиқини җакарлайду. Шиветсийә көчмәнләр идарисиму сотниң һөкүмигә асасән адил һекимҗанға мәггүлүк олтурум бериду.

Бу хитай һөкүмити әсла ойлап бақмиған шундақла һечқачан күтмигән нәтиҗә иди!

Шиветсийә соти адил һекимҗанниң шиветсийәдә мәңгүлүк олтурум һоқуқиға еришкәнликини елан қилип 10 минут өткәндә, 62 яшлиқ уйғур җасус адилға телефон қилип бу хәвәрни аңлайду.

Сәпо, йәни шиветсийә дөләт хәвпсизлик сақчилири дәл шу минутта җасусниң кочидики аммивий телефон арқилиқ “мухбир” қияпитигә киривалған хитай җасуси лей даға бу учурни мәлум қилғанлиқини мәхпий аңлайду. Күтүлмигән бу хәвәрдин һаң - таң болған лей да телефон турупкисини қоювәтмәй туруп уйғур җасустин “бу растму?” дегән соални 3 қетим қайта - қайта сорайду.

Сәпо хадимлири шу вақитниң өзидә йәнә җасус лей даниң бу хәвәрни кодлуқ сөзләрни ишлитип хитай әлчиханисидики аял “дипломат” җу лулуға йәткүзгәнликини, униң шу күнила бу хәвәрни йәнә бейҗиңдики каттибашлириға мәлум қилиғанлиқини уқуп туриду.

Шундақ қилип, гуәнтанамо түрмисидин қоюп берилип албанийәгә йәрләштүрүлгән адил һекимҗанниң 3 - дөләт болған шиветсийәдики сиясий панаһлиқ илтиҗаси мувәппәқийәткә еришиду.

Хитай билән шиветсийә оттурисидики адил һекимҗанниң делосини нуқта қилған бир мәйдан “ис - түтәксиз” дипломатик күч синишиш тоқунуши ахирида хитайни қуруқ қол қалдуриду.

Шуниңдин кейин, 62 яшлиқ уйғур җасус адил һекимҗанниң делоси һәққидики вәзиписини тамамлап, диққитини башқа нишанларға қаритиду.

(4 - Қисим түгиди, давами бар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт