Хитайниң мадриддики 5 нәпәр банка мәсуллири қолға елинди

Ихтиярий мухбиримиз әкрәм
2016-02-18
Share

Хитайниң испанийә пайтәхти мадрид шәһиридики сода - санаәт тармақ банкисиниң 5 нәпәр мәсули қарапул ююш вә баҗ оғрилаш җинайитигә четилип қолға елинған.

Б б с 17 - феврал хәвиридә баян қилинишичә, чаршәнбә күни испанийә пайтәхти мадриддики хитай сода - санаәт тармақ банкиси сақчиларниң туюқсиз бесип кирип тәкшүрүшигә учриған.

Сақчи тәрәпниң ашкарилишичә, хитайниң бу банкиси җинайи гуруһларниң әткәс йоллар билән баҗ оғрилаш вә ишчиларниң һәқлиригә хилаплиқ қилиш йоли билән тапқан пуллирини пул муамилә системисиға киргүзүшигә ярдәмләшкән. Андин бу пулларни қануний йоллар билән хитайға йөткәп кәткән. Йөткәлгән пулниң миқдари 40 милйон явроға йәткән.

Б б с хәвиридә әскәртилишичә, хитайниң мадриддики сода - санаәт тармақ банкисиға туюқсиз бесип кирип тәкшүрүш хизмитини сақчилар билән дөләтниң черикликкә қарши туруш - назарәт қилиш ишханиси, тәптиш органлири бирликтә һәмкарлишип елип барған. Һәрикәткә явропа җинайи ишлар сақчи әтритиму қатнашқан. Банкиниң баш директорини өз ичигә алған 5 нәпәр әмәлдари қолға елинған.

Фирансийә авазиниң 17 - февралдики мунасивәтлик хәвиридә тәкитлинишичә, мадрид сақчилири 2015 - йили 5 - айдин башлапла хитайға мунасивәтлик чоң бир әткәсчилик делосини тәкшүрүшкә киришкән. 30 Нәпәр хитайни әткәс мал киргүзүш вә баҗ оғрилаш гумандари сүпитидә қолға алған. Тәкшүрүш нәтиҗисидә, бу әткәс тиҗарәттин киргән киримләр хитайниң мадриддики сода - санаәт тармақ банкисиға берип тақалған. Әткәс мал вә баҗ оғрилаштин киргән бу қарапулларни мушу банкиниң ююватқан болуш еһтимали көрүлгән. Әгәр бу рәсмий испатланса, ююлған пулниң миқдари 40 милйон явро болидикән. “явропол” йәни явропа җинайи ишлар сақчи тәшкилати бу делониң башқа дөләтләрдики хитай банкилириға четилған болуш еһтималини нәзәргә елип, бу һәқтики учурни явропадики мунасивәтлик органлириға тарқатқан.

Германийә долқунлириниң 18 - февралдики хәвиридә оттуриға қоюлушичә, хитай баянатчиси хуң лей 18 - феврал ипадә билдүрүп, “һәқиқий түрдә қанунға тайинип, мунасивәтлик мәсилини адил бир тәрәп қилишни, испанийә - хитай карханилири вә хадимлириниң қанунлуқ һоқуқини һәқиқий түрдә капаләткә игә қилишини, испанийә - хитай мунасивәтлириниң яхши тәрәққият йүзлинишини һәқиқий түрдә қоғдишини тәләп қилимиз” дегән.

Мәзкур хәвәрдә көрситилишичә, хитайниң мадриддики баш әлчиханисиму 17 - феврал баянат елан қилип, хитай һөкүмитиниң изчил түрдә чәтәлләрдики хитай мәблиғи билән қурулған карханилиридин хитай вә өзи турушлуқ дөләтләрниң қанун - түзүмлиригә риайә қилишни, қанунлуқ тиҗарәт қилишни тәләп қилип кәлгәнликини баян қилип, “биз игилигән әһвалларға қариғанда, испанийәдики хитай иқтисадий қурулмилири бу тәләпни орунлиди” дегән вә хитай әлчиханисиниң испанийә һөкүмәт тәрәптин бу ишқа мунасивәтлик әһваллар тоғрилиқ һечқандақ мәлумат тапшуруп алмиғанлиқини илгири сүргән. Бирақ, хитай банкисиниң лондонда турушлуқ бир директори бу мәсилигә инкас билдүрүп, бу хилдики қилмишларниң хитай банкилириниң чәтәлдики инавитигә еғир тәсир йәткүзидиғанлиқини тилға алған.

Германийәдики уйғур зиялийси аблимит турсун бу хилдики әһвалларниң хитайниң дөләт образини яхшилаш сиясити билән тәтүр танасип болидиғанлиқини тилға алди.

Фирансийә авазиниң 17 - февралдики хәвиридә әскәртишичә, хитайниң төт чоң банкисиниң бири болған сода - санаәт банкисиниң мадрид тармиқи 2011 - йили рәсмий иш башлиған.

Хитайниң сода - санаәт банкиси асия қитәсидики әң чоң банка гуруһи болуп, пул аманәт ишлирида 1 - орунда туридикән. Бирақ, германийә долқунлириниң тәкитлишичә, хитай банкилириниң қарапулларни ююш вә баҗ оғрилаш билән агаһландурулуши илгири көп қетим йүз бәргән вәқә икән. Техи өткән йили 6 - айда италийәниң флоренса районлуқ тәптиш мәһкимиси, хитай җинайи гуруһлириниң җуңго банкиси милан тармиқи арқилиқ қачақ мәбләғ топлаватқанлиқини ашкарилиған. 7 - Айда америка федиратсийә аманәт банкисиму хитайниң қарапулларни ююш системисида кәмчиликләр барлиқини тәкитлигән.

Явропа шәрқий түркистан бирлики тәшкилатиниң рәиси әнвәрҗан әпәндиму бу тоғрисида өз қарашлирини билдүрүп өтти.

Германийә долқунлириниң мунасивәтлик хәвиридә тилға елинишичә, хитай җинайи гуруһлири чәтәлләрдә тапқан қарапуллирини хитай банкилири арқилиқ ююп, дөләт ичигә йөткәйдикән.

Өткән йили испанийә сақчилири хитай адәм әткәсчиләр гуруһидин бирни паш қилип, 80 нәпәр әткәсчи хитайни қолға алған. Сақчи тәрәпниң испатлишичә, бу әткәсчиләр гуруһи хитайдин явропа яки шималий америка қитәсигә беришни халайдиған хитай пуқралиридин 20 миң явро пул елип, ялған паспортлар билән уларни чегралардин өткүзүш җинайити билән шуғулланған.

Испанийәдә җәмий 191 миң хитай пуқраси яшайдикән. Хитай җинайи гуруһлириниң испанийәдә паш болуш вәқәлири көп қетим йүз бәргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт