Профессор ташполат тейип «бөлгүнчилик» билән әйиблинип кечиктүрмә өлүм җазасиға һөкүм қилинған

Мухбиримиз шөһрәт һошур
2018-10-04
Елхәт
Пикир
Share
Принт
Шинҗаң университетниң сабиқ мудири, профессор ташполат тейипн йиғинда сөздә. (Вақти вә орни ениқ әмәс)
Шинҗаң университетниң сабиқ мудири, профессор ташполат тейипн йиғинда сөздә. (Вақти вә орни ениқ әмәс)
Social Media

Йеқинда радийомизға кәлгән «вәтәндин сада» намлиқ мәктупта шинҗаң университетиниң сабиқ мудири, профессор ташполат тейипниң «бөлгүнчилик» билән әйиблинип, өлүм җазасиға һөкүм қилинғанлиқи вә җазаниң икки йил кечиктүрүлүп иҗра қилинишқа буйрулғанлиқи баян қилинған иди.

Мухбиримизниң уйғур аптоном районлуқ әдәбият-сәнәтчиләр бирләшмисиниң сиясий бөлүми вә қәшқәр тоққузақниң булақса сақчиханисиға қарита елип барған телефон зиярәтлири давамида профессор ташполат тейип һәққидики юқириқи учурниң тоғрилиқи җәзмләшти.

Һөрмәтлик радийо аңлиғучилар, өткән айда уйғур районидики мәлум бир төвәнгә чүшкән кадир тәрипидин йезилған вә радийомизға имзасиз һалда йолланған «вәтәндин сада» мавзулуқ мәктупта уйғур районида тәшвиқ қилиниватқан «агаһландуруш-ибрәт» филимлирида көрситилгәнләргә асасән маарип назаритиниң назири саттар савут, медитсина университетиниң мудири халмурат ғопур билән бир қатарда шинҗаң университетиниң сабиқ мудири, профессор ташполат тейипниңму «бөлгүнчилик» билән әйиблинип өлүмгә буйрулғанлиқи вә өлүм җазасиниң икки йил кечиктүрүп иҗра қилинишқа буйрулғанлиқи баян қилинған.

Биз өткән айда шинҗаң әдәбият-сәнәтчиләр бирләшмисиниң сиясий бөлүм мудирини зиярәт қилған вақтимизда уму идарә-органларда тәшвиқ қилиниватқан «агаһландуруш-ибрәт филими» дики мәлуматларға асасән ташполат тейипниң «бөлгүнчилик» билән шуғулланғанлиқи үчүн җазаланғанлиқини ашкарилиған иди.

Қәшқәр тоққузақниң булақсу сақчиханиси хадими нөвәттә өзлириниң бир йерим саәтлик узунлуқта бир «агаһландуруш-ибрәт филими» ни көрүватқанлиқини баян қилиш билән бирликтә мәзкур филимда ташполат тейип һәққидиму мәзмун барлиқини тилға алди. Бу хадим филимда өлүмгә һөкүм қилинип җазаси кечиктүрүлгән 3 киши һәққидә тонуштуруш барлиқи, бу үч шәхстин бириниң ташполат тейип икәнликини ашкарилиди.

Юқириқи һәр икки хадим гәрчә ташполат тейипниң алий мәктәп мунбиридин пайдилинип, аталмиш «бөлгүнчилик» идийәсини тәшвиқ қилғанлиқини баян қилған болсиму, әмма униң конкрет қандақ иш-һәрикәтләрдә болғанлиқи һәққидә мәлумат берәлмиди.

Илгири ашкариланған учурлардин мәлум болушичә, уйғурларниң чәтәл зияритиму икки йилдин буянқи сиясий долқунда «муһим сиясий хаталиқ» сүпитидә аталмиш «җинайәт» кә пакит қилинмақтикән. Ахбарат учурлиридин ташполат тейипниң илгири америка қатарлиқ дөләтләрни зиярәт қилғанлиқи мәлум. Шуңа биз мәзкур ш у а р әдәбият-сәнәтчиләр бирләшмиси сиясий бөлүм мудиридин ташполат тейипниң илгирики чәтәл зиярити һәққидиму мәлумат соридуқ. Мәзкур тәшвиқат филиминиң тәсиригә учриғанлиқи билинип турған бу хадим өзиниң шәхсий пикри сүпитидә ташполат тейипниң чәтәл зиярити давамида өзигә охшаш нийәттики кишиләр билән алақиләшкән вә һәмкарлашқан болуши мумкинликини илгири сүрди.

Шинҗаң университетиниң сабиқ оқутқучиси қутлуқ алмас өзиниң сабиқ хизмәтдашлириниң һәммисиниңла вәтән вә миллитигә садиқ кишиләр икәнлики, әмма уларниң нөвәттики сиясий вәзийәттә хитайға қарши бир иш-һәрикәтләрдә болуш имканлиридин мәһрум икәнликини илгири сүриду. Қутлуқ алмасниң пәрәз қилишичә, улар хитайға қарши бир һәрикәтләрдә болған болуши натайин, әмма нөвәттики аталмиш «үч хил күч» кә қарши сиясий долқунда хитай күткән дәриҗидә бир актипчанлиқини көрсәтмигән болуши мумкин. Ташполат тейипниң америкида яшаватқан иниси, паалийәтчи нури тейип акисиниң әһвали һәққидә икки йилдин бери һечқандақ учур алалмиғанлиқини баян қилди. У акисиниң җазалиниш сәвәби һәққидә өз пәризини оттуриға қойди. Нури тейип нөвәттики вәзийәттә акисиниң җазалинишидин һәйран қалмайдиғанлиқи вә акисиниң инсаний хисләтлири вә иш-излиридин пәхирлинидиғанлиқини баян қилди.

Пикирләр (0)
Share
Толуқ бәт