Сайбағ вәқәсидә етип өлтүрүлгәнләрниң бир җәмәт, ичидә 6 нәпири аял икәнлики ашкариланди

Мухбиримиз шөһрәт һошур
2013-12-18
Елхәт
Пикир
Share
Принт
Пичан лүкчүн вәқәсидин кейин сақчилар ахбарат орунлириниң рәсимгә тартишини тосуватқан көрүнүш. 2013-Йили 27-июн, пичан.
Пичан лүкчүн вәқәсидин кейин сақчилар ахбарат орунлириниң рәсимгә тартишини тосуватқан көрүнүш. 2013-Йили 27-июн, пичан.
AFP

Хитай 15-декабир күни қәшқәр конашәһәр сайбағ йезисида йүз бәргән қанлиқ вәқәдә, 16 кишиниң өлгәнлики, арисида икки нәпириниң сақчи хадими, қалғанлириниң болса террорчи икәнликини елан қилған, әмма кимликлирини тәпсилий ашкарилимиған иди.

Мухбиримизниң сайбағдики сақчи вә һөкүмәт органлиридин әһвал игиләшлири давамида вәқәдә сақчилар тәрипидин етип өлтүрүлгәнләрниң 4 ака-ука қериндаш, бир сиңил вә бир баҗа вә уларниң җорилири болуп бир җәмәт кишиләр икәнлики, өлгәнләрдин алтә нәпириниң болса аял икәнлики ашкариланди. Бу учурлар вәқә йүз бәргән сайбағ йезилиқ парткомда 17-декабир күни ечилған вәқә һәққидики хизмәт орунлаштуруш йиғинидин елинди.

Вәқә йүз бәргән сайбағ йезисидики сақчихана

Хадим: сайбағ сақчиханиси!
Мухбир: гүлчимәндә йүз бәргән вәқәдә өлгәнләрни бир аилә кишилири дәп аңлидуқ, шу аилидин қанчә киши өлгән болди.
Хадим: бу ишларға биз җаваб берәлмәймиз, наһийидики қоманданлиқ штабиға телефон қилиң.

Конашәһәр наһийилик сақчи идарисиниң җиддий вәқәләргә қоманданлиқ қилиш штаби

Мухбир: бу конашәһәр наһийилик сақчи идарисиму?
Хадим: шундақ немә иш барти?
Мухбир: сайбағниң гүлчимән йезисидики вәқәдә бир аилидин қанчә киши өлгән гәп?
Хадим: бу һәқтә биз бир нәрсә дейәлмәймиз!
Мухбир: болмиса вәқәдин хәвириңлар барму, қолуңларда бу һәқтә доклат барму?
Хадим: мән сизгә ишханиниң, катибат бөлүминиң телефонини дәп берәй, шулардин сорап беқиң.

Конашәһәр наһийилик җ х идариси қоманданлиқ штабиниң катибат бөлүми

Мухбир: бу конашәһәр наһийилик җ х идарисиму?
Хадим: һә.
Мухбир: қандақ әһвалиңиз, яхшиму?
Хадим: чүшәнмидим (хадим хитайчә җаваб бериду, диалог шундин кейин хитайчә давамлишиду.)
Мухбир: идариңизниң ахбарат баянатчисини чақирип қойсиңиз?
Хадим: сән шөһрәт һошурму?
Мухбир: шундақ мән шу.
Хадим: әмисә сорима бу ишни мақума?
Мухбир: немә үчүн?
Хадим....

Хадим телефонни қоюветиду вә қайта-қайта урулсиму телефонни қобул қилмайду.

Ахирқи қәдәмдә биз сайбағ йезилиқ парткомға телефон қилип вәқә һәққидә мәлумат соридуқ. Нөвәтчи хадим, бу вәқә һәққидә пәқәт тәшвиқат бөлүми мәсулиниңла җаваб бериш һоқуқиға игә икәнликини уқтуриду вә мәсул хадим гуән хуәйшя билән көрүшүшимизни тәвсийә қилиду. Берилгән телефон номуриға телефон қилғинимизда, телефон йиғин мәйданиға улиниду вә йезилиқ партком секретариниң вәқә һәққидики доклати вә хизмәт орунлаштуруши бир тәрҗиманниң еғизи арқилиқ төвәндикичә аңлиниду:

Секретар: .... Улар 7-айдин башлап террорлуқ, зораванлиққа аит тәшвиқат материяллирини көргән,... 8-Айда зораванлиқ қораллирини ясап синақ қилишқан.... 12-Айниң 15-күни йезимиздин мәй соҗаң билән наһийидин гобав дадүйниң дадүйҗаңи мәй веййүән 7 нәпәр сақчини елип йезимизниң 13-кәнт 1-мәһәллисидики ислам исмаилниң аилисигә булақсудики вәқәгә мунасивәтлик бир ишни ениқлап барғинида, мәй веййүән ишиктин киришигила бир террорчи етилип келип уни пичақ тиқип өлтүриду (ениқлашлиримиз давамида мәй соҗаң дегиниң сайбағ сақчихана башлиқи мәмәт сидиқ, мәй веййүән дегиниң конашәһәр наһийилик дөләт аманлиқ әтрити башлиқи, хәлқ қурултийи һәйити мәмәт турсун икәнлики ашкарилиниду-мухбирдин)..... Арқидин өй ичидин бирнәччиси етилип чиқип өзлири ясиған бомба билән кочидики сақчи аптомобилини партлитиду.... Улар йәнә ишик алдилиридин 150 метир неридики мәшиқ мәйданида мәй соҗаңниму өлтүриду.... Наһийидин сақчилар йетип кәлгәндә улар йәнә чекинмәстин сақчиларға етилип келиду, сақчилар тәслим болушқа вә дүм йетишқа буйруйду, улар давамлиқ һалда өзлири ясиған бомбилар билән сақчиларға қарап етилип келиду, андин сақчилар һәммисини етип ташлайду... Уруш ахирлашқандин кейин биз нәқ мәйданға йетип бардуқ, әһвал наһайити ечинишлиқ, мәй соҗаңниң беши бир йәрдә, бәдини бир йәрдә һаләттә, актип икки хизмәтчимиздин айрилип қалдуқ... Вәқәдин кейин 8 бомба қатарлиқ қораллар йиғивелинди, йиғивелинған қораллар арисида төт төшүкидин тәң оқ чиқидиған еғир қоралму бар.... Буниңдин кейин ропашлиқларни, сақаллиқларни қаттиқ тәкшүрүңлар, бу қетимқи вәқәдә өлгәнләрниң һәммиси сақаллиқ вә һәммиси ропашлиқ.... Өлгәнләрниң алтиси аял, 10 и әр.... Бундин кейин чәт яқидики өйләрни, йеңи өйләрни қаттиқ тәкшүрүңлар; болупму уруқ-туғқанлар топлишип олтурувалған аилиләрни қаттиқ тәкшүрүңлар, бу қетимқиси ислам исмаил аилисидики 4 ака-ука қериндаш, бир сиңил, бир баҗа вә җорилири болуп бир җәмәтниң териған иши. Әслидә булар буниңдин чоң иш қилмақчи, йезилиқ сақчидинму, наһийидинму тәкшүрүшкә келивәргәндин кейин, һә, паш боп қаптуқ, җазалинип кетимиз дәп териған иши.... Вәқәдин кейин 21 бала бизгә қалди, биз бүгүн қараймиз, әтә наһийигә йөткиветимиз; әслидә 27 бала бу, арилирида 3 нәпириниң аписи мушу йәрдә болғачқа сақчиханиға апирип сорақ қилинди....

Йиғиндин ашкариланған юқириқи мәлуматларниң бир қисми хитай ахбаратида баян қилинған болсиму, әмма вәқәдә өлгәнләр арисида аялларниңму барлиқи вә 21 балиниң йетим қалғанлиқи баян қилинмиған. Йиғиндики доклатта аялларниңму өлгәнлики паш қилинған болсиму, әмма қаршилашқучилар арисида аялларниң бар-йоқлуқи тилға елинмиған. Бу 6 нәпәр аялниң әр қериндаш вә җорилири билән бирликтә кочида етип ташланған вә яки олтурған өйидә етип ташланғанлиқидин ибарәт бу назук нуқта хитайниң мәзкур йиғинға қатнашқан өз хадимлиридинму сир тутулған.

Пикирләр (0)
Share
Толуқ бәт