биз түнүгүнки программимизда йеңисар наһийисиниң учар йезисида йүз бәргән 9-май тоқунуш вәқәси һәққидә мәлумат бәргән идуқ. нөвәттики программимизда йәнә шу тоқунуш давамида гумандарниң аяли нуримангүл һашимниң ериниң үстигә өзини ташлап уни таяқ-тоқмақтин қоғдиғанлиқи вә бу җәрянда өзиниңму еғир зәхимлинип дохтурханида җан үзгәнлики; тоқунуш давамида хизмәт гурупписидики хитай башлиқларниң уйғур кәнт мәсуллирини вәқәниң алдиға иттирип қоюп өзлири қечип кәткәнлики вә бу әһвалға өлгүчи кәнт мәсуллири аилә-тавабиатлириниң нарази болғанлиқи қатарлиқ җәрянларни диққитиңларға сунимиз.
йеңисардики вәқәдә, 3 әр кишидин башқа йәнә бир аял кишиму җан үзгән. гумандар алим әбәйниң аяли нуримангүл һашим, ериниң мәһәллә аманлиқ хадимлири тәрипидин қаттиқ урулуватқанлиқини көргәндин кейин, униң үстигә өзини етип уни таяқ тоқмақтин қоғдиған. вәқә пәсәйгәндин кейин нәқ мәйданға йетип кәлгән сақчилар, һошсиз һаләттә ятқан алим әбәйни дохтурханиға, нуримангүлни болса сақчиханиға елип маңған.
сақчилар нуримангүлниң сорақ давамида йүрәк кесили қозғилип, дохтурханида җан үзгәнликини ашкарилиған. әмма йәрлик аһалиләр, нуримангүлниң йүрәк кесили йоқлуқини, униң пәқәт вәқә җәрянида вә яки сорақ җәрянида йегән таяқ зәрбиси сәвәблик һаятидин айрилғанлиқини илгири сүрүшмәктә. мәлум болушичә, нуримангүлниң җәсити техичә уруқ-туғқанлири яки мәһәллә җамаитигә берилмигән. даириләрниң нуримангүлниң җәситини техичә сақлаватқанлиқи яки ун-тинсизла көмүвәткәнлики һазирчә мәлум әмәс.
бу қетимқи вәқәдә диққәтни тартидиған нуқтилардин бири, өй тәкшүрүш гурупписидики хитайларниң ишниң алдиға өтмигәнлики, уйғур кәнт мәсуллирини тоқунушта алдиға иттирип қойғанлиқи вә вәқә чиққандин кейин қечип кәткәнлики. бу әһвал өлгүчи кәнт мәсуллириниң аилә-тавабиатлириниң наразилиқини қозғиған. бу наразилиқ диний затларниң тәлим вә тәсәллилиридин кейинла пәскойға чүшкән.
йәнә мәлум болушичә, өткән йәкшәнбә күни йеңисар наһийисидә дағдуғилиқ матәм мурасими өткүзүлүп, вәқәдә өлгән икки кәнт мәсулиға тәзийә билдүрүлгән һәм бу мурасимда, вәқә давамида гумандар алим әбәй вә униң аялини уруп өлүшигә сәвәб болған 7 нәпәр мәһәллә аманлиқ хадими йәни минбиң мукапатланған. әмма гумандар алим әбәйниң қейнаниси гүлқиз техичә қамақта тутулмақта.
ашкарилинишичә, вәқәдин кейин гумандар алим әбәйниң 22 нәпәр сәпдишидин 16 нәпири тутқун қилинған. әмма бу 16 си тутулуш давамида һәрқайси җайларда йәнә қандақ вәқәләрниң йүз бәргәнлики мәлум әмәс.