Нәнси пелуси ханимдин уйғурларға мунасивәтлик қанун лайиһәлирини қоллаш тәләп қилинди

Мухбиримиз ирадә
2019-02-26
Елхәт
Пикир
Share
Принт
Уйғур кишилик һоқуқ қурулушиниң башлиқи өмәр қанат әпәнди вә ташқи ишларға мәсули луиса гирив ханим америка авам палатасиниң рәиси нәнси пелуси ханимниң ишханисини зиярәт қилип, униң мәслиһәтчиси(оңда) билән көрүшти. 2019-Йили 25-феврал, вашингтон.
Уйғур кишилик һоқуқ қурулушиниң башлиқи өмәр қанат әпәнди вә ташқи ишларға мәсули луиса гирив ханим америка авам палатасиниң рәиси нәнси пелуси ханимниң ишханисини зиярәт қилип, униң мәслиһәтчиси(оңда) билән көрүшти. 2019-Йили 25-феврал, вашингтон.
Photo: RFA

«Уйғур кишилик һоқуқ сиясити қанун лайиһәси-2019» дәп аталған қанун лайиһәси бу йил 17-январ күни америка кеңәш палатасиниң нопузлуқ әзаси марко рубийо вә авам палатасиниң әзаси кристофер симит қатарлиқ вәкилләр тәрипидин бирла вақитта тонуштурулған иди. Бундин башқа йәнә америка дөләт мәҗлисиниң демократлар партийәсигә мәнсуп авам палата әзаси брәд шермин «уйғур қануни» дәп нам берилгән йәнә бир қанун лайиһәсини мәҗлискә сунған. Нөвәттә, дуня уйғур қурултийи, америка уйғур кишилик һоқуқ қурулуши қатарлиқ органлар һәммиси бу икки қанун лайиһәсиниң мақуллиниши үчүн америка дөләт мәҗлисидики һәрикәтлирини күчәйткән.

Мана мушу хизмәт рамкиси бойичә, уйғур кишилик һоқуқ қурулушиниң башлиқи өмәр қанат вә ташқи ишларға мәсули луиса гирив ханимлар 25-феврал күни америка авам палатасиниң рәиси нәнси пелуси ханимниң ишханисини зиярәт қилған. Өмәр қанат әпәндиниң билдүрүшичә, улар учришишта бу қанунниң мақуллинишиниң вәзийәтниң тәқәззаси икәнликини чүшәндүргән.

Америка дөләт мәҗлиси авам палатаси рәиси нәнси пелуси ханим америка сиясәт сәһнисидики тәсир күчи зор шәхсләрниң бири. Тибәт һәрикитиниң әң актип қоллиғучилиридин бири болуш билән тонулидиған нәнси пелуси ханим техи мушу айниң 12-күни тибәтләргә мунасивәтлик бир чоң паалийәттә сөз қилғанда, уйғурлар һәққидиму мәхсус тохтилип, уйғурларниң һазир хитай һакимийитиниң ассимилятсийә сияситиниң зәрбисигә учраватқанлиқини билдүргән иди. У сөзидә: «тибәттә йүз бәргән ишлар һазир хитайниң уйғур районида йүз бериватиду. Әгәр буниңға қарши турулмиса әмгәк лагерлиридики бир милйон уйғур ассимилятсийәгә учрайду. Бу лагерларниң мәқсити тибәт мәдәнийитиниң йетүк хаслиқини йоқитишқа урунуш билән охшаш» дәп көрсәткән. Нәнси пелуси ханим шу күндики сөзидә йәнә, америка ташқи ишлар министири майк помпейониң уйғур мәсилисини тилға елишиға өзиниң түрткә болғанлиқини билдүргән иди. Өмәр қанат әпәндиниң билдүрүшичә, улар нәнси пелуси ханимниң ярдәмчилири билән өткүзүлгән учришиштиму бу қоллашни һес қилған.

Нәнси пелуси ханим «уйғур кишилик һоқуқ сиясити-2019» намлиқ қанун лайиһәсигиму имза қойғучиларниң бири. Өмәр қанат әпәнди һазир уйғурларға аит қанун лайиһәлириниң һәр икки партийәниң қоллишиға еришкәнликини әскәртип, уйғурларға аит қанунниң әмәлгә ешишиға болған үмидиниң ашқанлиқини билдүрди.

Йеқинда, хәлқара кәчүрүм тәшкилатиниң америка шөбиси өзиниң икки милйондин ошуқ әзаси вә қоллиғучилирини һәрикәткә кәлтүрүш арқилиқ уйғурларға мунасивәтлик икки қанун лайиһәсиниң мақуллиниши үчүн һәрикәткә өтидиғанлиқини җакарлиған. Дуня уйғур қурултийиниң рәиси долқун әйса әпәнди хәлқара кәчүрүм тәшкилатиниң юқиридики қарариниң бу қанунниң мақуллиниши үчүн зор һәрикәтләндүргүч болидиғанлиқини билдүрди.

Өмәр қанат әпәндиниң ейтишичә, нөвәттә америкида бу қанунни илгири сүрүшкә болған қизғинлиқ интайин юқири болуп, америка пуқраси болған уйғурларму өзлириниң сиясий һоқуқлиридин пайдилинип, қанунниң мақуллинишиға күч қошуш үчүн паал һәрикәткә өткән икән.

Пикирләр (0)
Share
Толуқ бәт