Nensi pélusi xanimdin Uyghurlargha munasiwetlik qanun layihelirini qollash telep qilindi

Muxbirimiz irade
2019-02-26
Élxet
Pikir
Share
Print
Uyghur kishilik hoquq qurulushining bashliqi ömer qanat ependi we tashqi ishlargha mes'uli lu'isa giriw xanim amérika awam palatasining re'isi nensi pélusi xanimning ishxanisini ziyaret qilip, uning meslihetchisi(ongda) bilen körüshti. 2019-Yili 25-féwral, washin'gton.
Uyghur kishilik hoquq qurulushining bashliqi ömer qanat ependi we tashqi ishlargha mes'uli lu'isa giriw xanim amérika awam palatasining re'isi nensi pélusi xanimning ishxanisini ziyaret qilip, uning meslihetchisi(ongda) bilen körüshti. 2019-Yili 25-féwral, washin'gton.
Photo: RFA

"Uyghur kishilik hoquq siyasiti qanun layihesi-2019" dep atalghan qanun layihesi bu yil 17-yanwar küni amérika kéngesh palatasining nopuzluq ezasi marko rubiyo we awam palatasining ezasi kristofér simit qatarliq wekiller teripidin birla waqitta tonushturulghan idi. Bundin bashqa yene amérika dölet mejlisining démokratlar partiyesige mensup awam palata ezasi bred shérmin "Uyghur qanuni" dep nam bérilgen yene bir qanun layihesini mejliske sun'ghan. Nöwette, dunya Uyghur qurultiyi, amérika Uyghur kishilik hoquq qurulushi qatarliq organlar hemmisi bu ikki qanun layihesining maqullinishi üchün amérika dölet mejlisidiki heriketlirini kücheytken.

Mana mushu xizmet ramkisi boyiche, Uyghur kishilik hoquq qurulushining bashliqi ömer qanat we tashqi ishlargha mes'uli lu'isa giriw xanimlar 25-féwral küni amérika awam palatasining re'isi nensi pélusi xanimning ishxanisini ziyaret qilghan. Ömer qanat ependining bildürüshiche, ular uchrishishta bu qanunning maqullinishining weziyetning teqezzasi ikenlikini chüshendürgen.

Amérika dölet mejlisi awam palatasi re'isi nensi pélusi xanim amérika siyaset sehnisidiki tesir küchi zor shexslerning biri. Tibet herikitining eng aktip qollighuchiliridin biri bolush bilen tonulidighan nensi pélusi xanim téxi mushu ayning 12-küni tibetlerge munasiwetlik bir chong pa'aliyette söz qilghanda, Uyghurlar heqqidimu mexsus toxtilip, Uyghurlarning hazir xitay hakimiyitining assimilyatsiye siyasitining zerbisige uchrawatqanliqini bildürgen idi. U sözide: "Tibette yüz bergen ishlar hazir xitayning Uyghur rayonida yüz bériwatidu. Eger buninggha qarshi turulmisa emgek lagérliridiki bir milyon Uyghur assimilyatsiyege uchraydu. Bu lagérlarning meqsiti tibet medeniyitining yétük xasliqini yoqitishqa urunush bilen oxshash" dep körsetken. Nensi pélusi xanim shu kündiki sözide yene, amérika tashqi ishlar ministiri mayk pompéyoning Uyghur mesilisini tilgha élishigha özining türtke bolghanliqini bildürgen idi. Ömer qanat ependining bildürüshiche, ular nensi pélusi xanimning yardemchiliri bilen ötküzülgen uchrishishtimu bu qollashni hés qilghan.

Nensi pélusi xanim "Uyghur kishilik hoquq siyasiti-2019" namliq qanun layihesigimu imza qoyghuchilarning biri. Ömer qanat ependi hazir Uyghurlargha a'it qanun layihelirining her ikki partiyening qollishigha érishkenlikini eskertip, Uyghurlargha a'it qanunning emelge éshishigha bolghan ümidining ashqanliqini bildürdi.

Yéqinda, xelq'ara kechürüm teshkilatining amérika shöbisi özining ikki milyondin oshuq ezasi we qollighuchilirini heriketke keltürüsh arqiliq Uyghurlargha munasiwetlik ikki qanun layihesining maqullinishi üchün heriketke ötidighanliqini jakarlighan. Dunya Uyghur qurultiyining re'isi dolqun eysa ependi xelq'ara kechürüm teshkilatining yuqiridiki qararining bu qanunning maqullinishi üchün zor heriketlendürgüch bolidighanliqini bildürdi.

Ömer qanat ependining éytishiche, nöwette amérikida bu qanunni ilgiri sürüshke bolghan qizghinliq intayin yuqiri bolup, amérika puqrasi bolghan Uyghurlarmu özlirining siyasiy hoquqliridin paydilinip, qanunning maqullinishigha küch qoshush üchün pa'al heriketke ötken iken.

Toluq bet