Шиветсийәдики хитай әлчиханисиға четилған зор җасуслуқ делоси вә униң баш-ахири (10B)

Мухбиримиз қутлан
2015.07.01
babur-mexsut-namayish.jpg Ситокһолмдики уйғурларниң хитайға қарши намайишини көзитип турған җасус – бабур мәхсут (истәрилкида көрситилгән қара көзәйнәк тақиған киши).
Sherqiy Türkistan Teshwiqat Merkizi

10-Қисим :җасусниң сотқа тартилиши

Бирқанчә қетимлиқ соттин кейин 2010-йили 8-мартта шиветсийә соти 62 яшлиқ уйғур җасусниң делоси үстидин ахирқи һөкүмни елан қилиду. Җасус шиветсийәдә қанунсиз җасуслуқ қилмиши билән шуғулланғанлиқи үчүн 1 йил 4 айлиқ қамақ җазасиға һөкүм қилиниду.

Сот қарари елан қилинип, иккинчи күни хитай ташқи ишлар министирлиқи инкас қайтуриду. Хитай баянатчи чин гаң бейҗиңдики мухбирларни күтүвелиш йиғинида баянат берип, “шиветсийә һөкүмитиниң җуңголуқ дипломат билән мухбирни җасуслуқ билән әйиблишиниң һечқандақ асаси йоқ. У җаваб беришкиму әрзимәйду!” дәйду.

Шиветсийә дөләт радиосиниң мухбири ситокһолмдики хитай әлчиханисиға телефон қилип, җасуслуқ қилмиши билән шуғулланған хитай аял дипломати җу лулу һәққидә соал сорайду. Хитай әлчиханисидики нөвәтчи хадим шивет мухбири сориған соалларниң һәммисигила “билмәймән” дәп җаваб бериду. Шивет мухбири ахирида униңдин, “ундақта, исмиңиз немә?” дәп сориғанда һодуқуп кәткән хитай хадим: “билмәймән!” дәп күлкилик җаваб бериду.

Шиветсийә соти толуқ дәлил испатларниң тиркиши вә шиветсийә қанунидики мунасивәтлик маддилар бойичә уйғур җасусқа бир йил 4 айлиқ қамақ җазаси бәргән болсиму, лекин у буниңға рази болмай алий сотқа әрз суниду. Шиветсийә алий соти униң делосиға қайта қарап чиқип униңға йәнә 6 айлиқ қамақ җазаси қошиду. Буниң билән 62 яшлиқ җасус җәмий 1 йил 10 айлиқ қамаққа һөкүм қилиниду.

Шиветсийә уйғур комитетиниң сабиқ рәиси абдушүкүр муһәммәт әйни чағда шиветсийәдики уйғур тәшкилатлири билән уйғур җамаитиниң 62 яшлиқ җасусқа берилгән җазаға рази болмиғанлиқини тәкитләйду.

Шиветсийә уйғур маарип уюшмисиниң нөвәттики рәиси әхмәтҗан турсун җасусқа берилгән җаза һәққидә тохтилип мунуларни илгири сүриду: “тарихниң әң хәтәрлик басқучида туруватқан уйғур миллити арисидин чиқип, уйғурларниң миллий мәнпәитини сатқан вә хитай үчүн ишлигән бу җасусқа әслидә өлүм яки муддәтсиз қамақ җазасиму азлиқ қилиду. Һалбуки, бүгүн уйғурларда бундақ сатқунларни җазалайдиған һакимийәт вә униң қанун иҗрачилири йоқ. Шуңа биз шиветсийә қануниниң униңға бәргән җазасиға вақтинчә рази болмақтин башқа таллишимиз йоқ. Шуни тәкитләш зөрүрки, уйғур хәлқи бүгүнкидәк әң қийин бир мәзгилдә өз миллитигә асийлиқ қилған миллий сатқунниң қилмишини һәргиз унтуп қалмайду. Иншаалла, буниң сориқини алидиған бир күнниң чоқум келидиғанлиқиға ишинимиз!”

(10-Қисимниң ахирқи бөлики түгиди, давами бар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.