Яридар турамәт турсунға һесдашлиқ қилған сақчи хизмитидин елип ташланған

Мухбиримиз шөһрәт һошур
2017-04-14
Share
charlash-uyghur-saqchi.jpg Коча чарлаватқан уйғур сақчи. 2015-Йили 17-авғуст, ақсу.
AFP

Ашкарилинишичә, 2014-йили поскам иккису сақчиханисида етиветилгән турамәт турсун яридар һаләттә икки саәткичә сақчиханида сақланған.

Қануний тәртип бойичә қилиш яки инсандарчилиқ нуқтисидин турамәт турсунни дәрһал дохтурханиға апиришни тәвсийә қилған сақчи хадими обул туняз, бу қилғини үчүн "сиясий мәйдани мустәһкәм болмаслиқ" билән әйиблинип хизмитидин елип ташланған.

Етиветилгән турамәт турсун һәққидә илгириләп әһвал ениқлишимиз давамида, униң оқ тәгкәндин кейин дәрһал җан үзмигәнлики, яридар һаләттә икки саәткичә йәни җан үзгүчә сақчиханида сақланғанлиқи ашкариланди.

Әһвалдин хәвәрдар кишиләрдин бириниң баян қилишичә, вәқә йүз бәргәндин кейин сақчилар, пичақта яриланған сақчи хадими нурәхмәтни дәрһал дохтурханиға елип барған. Әмма йетәрлик қатнаш қорали вә қутқузуш машиниси бар туруқлуқ, турамәт җайидин йөткәлмигән, вәқә үстидә бар болған сақчи хадими обул туняз, турамәт турсунниң таки сот һөкүми чиққанға қәдәр гумандар икәнликини әскәртип, униму дохтурханиға апиришни, бундақ болмиғанда қануний тәртипниң бузулидиғанлиқи вә сақчиханиға гәп келидиғанлиқини ейтқан, әмма бу гәп етибарға елинмиған.

Униңдин башқа өзини ашкарилашни халимиған бир хадимниң дейишичә, обул тунязниң тәклипи әйни чағда сақчилар арисида иккилиниш пәйда қилған, сақчиханидики бәзи уйғур сақчилар, турамәтниң қилмишиға четилип қелиштин қорқуп униңға йеқинлашмиған, хитай сақчилар болса униңға нәпрәт туйғуси билән пәрвасиз қариған.

Даириләр вәқәни бир тәрәп қилиш җәрянида турамәт турсунниң гумандарни дохтурға апириш тәклипи "һесдашлиқ қилиш" дәп қаралған вә у "сиясий мәйдани мустәһкәм болмаслиқ" билән әйибләнгән. Бу сақчиханида хизмәт қиливатқиниға икки йил болған, рәсмий дөләт хадими болған 27 яшлиқ обул туняз хизмитидин елип ташланған.

Хитай, хәлқара сәһниләрдә һәр вақит узлириниң бир қанун дөлити икәнликини, һәрқандақ бир ишниң қанун бойичә бир тәрәп қилиниватқанлиқини илгири сүрмәктә.

Муһаҗирәттики уйғур паалийәтчилири болса, уйғур районидики сиясийға четишлиқ һәрқандақ бир вәқәдә қанундин еғиз ечишниң мумкинсизликини, бу вәқәләрниң пәқәт аталмиш " ‹үч хил күчләр' ни баш көтүргүзмәслик" тин ибарәт сиясий шоар вә сиясий қарар билән бир тәрәп қилиниватқанлиқини тәкитлимәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт