Онсу тохула йезисидики ача-сиңил сиясий мәһбуслар әрлири билән бирликтә йәкән түрмисидә җаза муддитини өтимәктә

Мухбиримиз шөһрәт һошур
2016.06.20
hijap-romal-yaghliq-reshatka-jaza-305.jpg Төмүр решаткилиқ һойлиға соланған һиҗапланған уйғур аяллири.
RFA/Ruqiye

Мухбиримизниң өткән айдики ениқлашлири давамида, онсу наһийисиниң чағрақ йезисидики 49 яшлиқ ели ясинниң аилисидә уруқ-туғқанлири билән бирликтә диний үн-син буюмлирини көргәнлики үчүн 7 йиллиқ кесилгәнлики ениқланған иди, әмма шу күни униң билән биллә лента көргән икки сиңлисиниң ақивити һәққидә мәлумат елиналмиған иди. Мухбиримизниң давамлиқ илгириләп әһвал ениқлиши давамида бу ача-сиңил рошәнгүл ясин билән арзугүл ясинниң әрлири билән бирликтә өзлири тәвә болған тохула йезисида тутқун қилинғанлиқи вә нөвәттә йәкән түрмисидә җаза муддитини өтәватқанлиқи ашкариланди.

Диний синалғу материяллирини көргәнлики үчүн 7 йиллиқ кесилгән, онсу чағрақлиқ ели ясинниң сиңиллириниң ақивитини ениқлаш үчүн, биз улар тәвә болған онсу наһийисиниң тохула йезисиға телефон қилдуқ.

Сақчихана хадимлири әһвалдин хәвәрсиз икәнликини билдүргәндин кейин, биз мәзкур ача-сиңил тәвә болған кәнт аманлиқ мудиридин мәлумат соридуқ. Мудир рошәнгүл ясин билән арзугүл ясинниң әрлири билән бирликтә 7 йиллиқ кесилгәнликини ашкарилиди.

Мәлум болушичә, рошәнгүл ясин 45 яш, арзугүл ясин 38 яш, уларниң ака-ука әрлири езиз абдувәли вә әхмәт абдувәли 47 вә 40 яш болуп, булар нөвәттә йәркән түрмисидә җаза муддитини өтимәктә.

Радиомизда илгири берилгән, юқириқиға охшиған учурлардин мәлум болушичә, хитай даирилири йеқиндин буян уйғур районида аилә бойичә җазалаш тәдбирини қоллинишни кеңәйтмәктә. Бу әһвални бәзи уйғур көзәткүчиләр хитайниң уйғурларға қорқунчлуқ шәкилдә тәһдит селиши дәп чүшәндүрсә, бәзиләр хитайниң мәвҗут вәзийәттин чөчүп кетиши дәп тәриплимәктә, йәнә бәзиләр болса, хитайниң нөвәттики дөләт күчидин пайдилинип башқа милләтләрни ашкара һалда бозәк қилиши дәп қарашмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.