Toqquzaqtiki oqutquchining ikki oghli bilen késilip ketkenliki delillendi

Muxbirimiz shöhret hoshur
2017-11-15
Share
terbiyelesh-merkizi-toqquzaq.jpg Toqquzaqtiki terbiyilesh merkizige özgertilgen burunqi mektep. 2017-Yili yaz.
RFA/Abduweli Ayup

Aldinqi hepte anglighuchilirimizdin biri radi'omizgha awazliq inkas yollap toqquzaqning bulaqsu yéza ottura mektipidiki hörmetke sazawer oqutquchi exet mirzakérimning oghulliri bilen késilip ketkenliki, uning késilishige doppa kiyip yürgenlikining seweb bolghanliqini melum qilghan idi.

Muxbirimizning ikki heptidin buyanqi éniqlashliri dawamida, exet mirzakérimning ikki oghli bilen birlikte késilgenliki, özining 5 yilliq qamaq jazasigha mehkum qilin'ghanliqi delillendi, emma uning jazalinish sewebining doppa kiyish ikenliki téxi aydinglashmidi.

Radi'omizgha yollan'ghan awazliq inkasta tutqun oqutquchining ismi exet dep ochuq bayan qilin'ghan bolsimu, familisi éniq ipadilenmigen. Shunga biz toqquzaqning bulaqsu saqchixanisidin aldi bilen bu heqte melumat soriduq. Xadim bu heqte melumat bérelmigendin kéyin, bulaqsuning kent saqchixanilirigha téléfon qilduq. Muhajirettiki toqquzaqliq kishiler, bulaqsudiki mezkur milletperwer we hörmetke sazawer oqutquchining isim-familisining exet mirzakérim ikenlikini bayan qildi.

Radi'omizgha kelgen awazliq inkasta tutqun oqutquchi exet mirzakérimning, bulaqsuning 2-kent, 5-mehelle ezasi ikenliki tilgha élin'ghan. Bulaqsuning 19-kent saqchi xadimi, exet mirzakérimning 2-kent ezasi ikenlikini delillidi.

Radi'omizgha kelgen inkasta yene exet mirzakérimning kochida doppa kiyip kétiwatqan mezgilide yéziliq partkom sékrétari bilen uchriship qalghanliqi we sékrétarning exet mirzakérimni chetke tartip soraq qilghanliqi we shu weqedin kéyin exet uning bir mehel jem'iyettin ghayib bolup ketkenliki bayan qilin'ghan.

Mezkur inkasta yene exet mirza kérimning yéqinda doppa kiygenliki üchün késilip ketkenliki bildürülgen؛ inkasta exet mirzakérimning oghulliriningmu késilip ketkenliki eskertilgen.

Bügün toqquzaqning bulaqsu yéziliq edliye ponkiti, oqutquchi exet mirzakérimning 5 yilliq késilgenlikini delillidi. Edliye ponkiti xadimi yene exet mirzakérim a'ilisidin 3 kishining késilgenliki, qalghan ikkisining uning oghli ikenlikini bayan qildi.

Éniqlashlirimiz dawamida exet mirzakérimning késilishige uning doppa kiygenlikining seweb bolghanliqi delillenmidi, emma uning aldidiki xewerlirimizde, yéngisar nahiyesidiki égusta 67 yashliq tursun memmetning 13 yilning aldida oghlini haraq tosqanliqi we uning oghli wahap tursunning ayaligha uzun könglek kiydürgenliki üchün 10 yilliqtin késilgenliki ashkarilan'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.