Melum bolushiche, xitayning mekit nahiyilik sot mehkimisi ötken yili 7-ayda ayrim-ayrim ikki meydan yépiq sot échip, pahishixanigha hujum qilghan qassap nurmemet yasinni qatilliq bilen eyibligen؛ uning bu pilanidin xewerdar dep qaralghan sulayman ablimit we enwer ablikim qatarliq 6 dostini térrorluq bilen eyibligen. Emma ularning konkrét qaysi herikitining térrorluq jinayitini shekillendüridighanliqi heqqide munasiwetlik a'ililerge héchqandaq melumat bermigen. Bezi a'ililer, tutqun sulayman ablimitning belgilik diniy melumati bolghachqila, qassap nurmemet yasin'gha idiye jehettin yétekchilik qildi, dep qaralghanliqini we mushu sewebtinla u térrorluq bilen eyiblen'genlikini texmin qilishmaqta.
Pahisheni öltürgen nurmemet yasin qatilliq bilen eyiblenmigen ehwal astida, uning 6 neper dostining térrorluq bilen eyiblinishi weqeni anglighuchilarda ghelitilik tuyghusi peyda qilmaqta.
Biz bügün tutqunlardin enwer ablikimning a'ilisige qayta téléfon qilip, ötken yili échilghan sot heqqide melumat soriduq:
So'al: shu échilghan sotqa qatnishalidinglarmu?
Jawab: yaq. U küni balilar nahayiti dehshetlik élip chiqildi sotqa. Balilarning putlirida kishen, bashlirida qara xalta, qolida koyza, qamaqxanidin sotqa 7 mashinida élip chiqti.
So'al: sotqa apirilghan we ekitilgenlikini körelidinglar, emma sot meydanigha kirelmidinglar?
Jawab: shundaq boldi. Balilirimizni körüp yighlashtuq, beziler hoshidin ketti, kochilarda kishilermu köp idi.
So'al: sotta némiler déyilgenlikidin xewiringlar boldimu?
Jawab: boldi. Sottin kéyin balilarning qoligha eyibname bériliptu؛ shu eyibnamini oqughanlardin angliduq. Xenzuni öltürgen nurmemet yasin bilen qalghan balilarning arisida bir chétishliq bolmighandin kéyin, nurmemetning ishini qatilliq dep ayrim délo turghuzup, ayrim sot échiptu. Bizning balilargha ayrim délo turghuzup térrorluq dep békitiptu. Sulayman ablimitni birinchi qol, abdukérim seyidinni ikkinchi qol, hidayitullah tahirni üchinchi qol, méning oghlum enwer ablikimni 4-qol, abduqéyim adilni 5-qol, abdusalam eniwerni 6-qol dep békitiptu.
So'al: ularni némining qoli dek békitiptu, teshkilatningmu yaki néme?
Jawab: sulayman ablimitni térrorluqni uyushturghan, qalghanlarni térrorluqqa egeshken deptu.
So'al: térrorluq dégen bolsa, bu yerde choqum bir heriketni tilgha élishi kérek, pahishexanigha hujum qilishni démekchimu ya?
Jawab: yaq, undaq emes. Uni qatilliq dep ayrip békitti, bularni térrorluq dédi, emma pakit yoq.
Biz yene tutqunlardin abdusalam eniwerning qérindashliridin melumat soriduq:
So'al: siz, abdusalam eniwerning némisi bolisiz?
Jawab: akisi.
So'al: shundaq qilip 20 aydin béri jawab yoqmu ulardin?
Jawab: yoq. Nurmemet yasin xenzuni öltürüwetkendin kéyin uning dostlirining henniwasini tutup ekirip ketken, ulardin qoyup bérip eng axirida 6 si qaldi. Körüshkilimu qoymidi, sotqimu qatnashquzmidi, asasiy qanunda gunahi yoq bolsa 24 sa'ettin kéyin qoyup bérish kérek deydiken, 20 aydin béri héch xewer alalmay olturduq, dadammu mushu derd bilen alemdin ötti.
Biz axirida tutqunlardin hidayitullah tahirning dadisidin melumat soriduq:
So'al: oghlingizgha artilghan gunahning néme ikenlikini bilelidingizmu?
Jawab: yaq, bilmiduq. Térrorchi dep eyibliginidin xewer taptuq, ya ularda qilghan birer ish yoq, xenzuni olturush bilen alaqisi yoqluqi aydingliship boldi. Yene térrorchi deydu yaki bir ularning pul toplighan ishi yoq, yaki bashqa ishi yoq, hemmisi normal tijaret qilip yürgen balilar idi,
Yuqirida xitay sotining xitay pahisheni öltürgen qasap nurmemet yasinni qatilliq bilen eyiblep, uning dostlirini térrorluq bilen eyibligenliki heqqide tepsiliy xewer berduq.
