Xitay ölkiliridin qobul qilin'ghan 1000 gha yéqin saqchi aqtu nahiyeside ish bashlighan

Muxbirimiz qutlan
2017-08-16
Élxet
Pikir
Share
Print
Xitay saqchilirining héytgah meschitining etrapidiki kéchilik bazarni charlap yürgen körünüshi. 2017-Yili 25-iyun, qeshqer.
Xitay saqchilirining héytgah meschitining etrapidiki kéchilik bazarni charlap yürgen körünüshi. 2017-Yili 25-iyun, qeshqer.
AFP

Aqtu nahiyelik da'iriler bu yil 3-ayning 31-küni nahiyelik hökümet torida uqturush chiqirip, xitay ölkiliridin yuqiri ma'ash we alahide teminat bilen 600 neper xitay saqchi qobul qilidighanliqini élan qilghan idi.

Bügün aqtu nahiyesining saqchixaniliridin igilishimizche, xitayning gensu, shenshi, senshi, xénen, sichüen we xunen ölkiliridin qobul qilin'ghan zor türkümdiki xitay saqchilar alliqachan aqtu nahiyesige yétip kelgen iken. Ularning nöwette aqtu nahiye baziridiki saqchixana, charlash etriti we tekshürüsh tosuqlirida ish bashlighanliqi melum.

Aqtu nahiyesining pilal yéziliq saqchixanisidin téléfon ziyaritimizni qobul qilghan bir Uyghur ayal saqchi munularni bildürdi: "Ichki ölkilerdin qobul qilin'ghan saqchilar alliqachan nahiyemizge kélip orunliship boldi. Ularning hemmisi nahiye bazirida. Ularning birimu yézilargha teqsim qilinmidi. Ular bilen bizning xizmet da'irimiz asasen oxshash, emma ma'ash we teminatimiz oxshimaydu. Bizning ma'ashimiz 2600 som, ular 9 ming somdin köprek ma'ash alidu, dep anglidim. Ularning köpinchisi téxi toy qilmighanlar iken. Ular yene heqsiz turalghu we tamaqtin behrimen bolidu. Bundaq bolushi "Ularning ichki ölkilerdin nahiyemizge yardem bergili kelgenlikidin bolghan" dégen chüshendürüshlerni angliduq."

Aqtu nahiyesining üjme yéziliq saqchixanisidin téléfon ziyaritimizni qobul qilghan yene bir Uyghur ayal saqchi xitay ölkiliridin qobul qilin'ghan saqchilar yuqiri ma'ash we teminatqa ige bolupla qalmastin, belki ikki kün ishlep arqidin bir kün dem alidighanliqini, yerlik Uyghur saqchilarning 6 kün ishlep aran bir kün dem alidighanliqini ashkara qildi: "Bizning qiliwatqan xizmitimiz ular bilen oxshash bolsimu, lékin ma'ash we teminatimizda pütünley perqliq mu'amile qiliniwatidu. Ularning ma'ashi 8-9 mingdin artuq, uning üstige toy qilghanlargha bir yürüshtin heqsiz öy bérilidiken. Ular tamaqni ilgiri nahiyelik saqchi idariside yeytti. Hazir künde bir mashina ularning heqsiz tamiqini ish ornigha yetküzüp béridu. Bizning ma'ashimiz aran 2600 som, tamaq puli bérilmeydu. Ularning kiyim-kéchek, turalghu, xizmet shara'iti we bashqa teminatliri bizningkidin köp yaxshi. Ular adette yerlik amma bilen anche köp uchrashmaydu. Jiddiy weqe chiqip qalsa ularning arisigha milliy saqchilarni sepleydu. Shunga ularning Uyghur tili öginishke éhtiyajimu yoq. Ular adette ikki kün ishlise keynidin bir kün dem alidu. Biz heptide 6 kün ishlep, peqet bir künla dem alimiz. Ular ichki ölkilerdin kelgen bolghachqa yuqiriqidek étibar siyasetliridin behrimen bolidighan oxshaydu."

Xitay da'irilirining Uyghur diyarining jenubidiki Uyghurlar merkezlik topliship olturaqlashqan wilayet we nahiyelerde saqchi küchini köpeytishi, bolupmu xitay ölkiliridin türkümlep saqchi yötkep kélishi xelq'aradiki közetküchilerning diqqitini qozghimaqta.

Gérmaniyediki yawropa medeniyet we ilahiyet tetqiqat institutining léktori andiré'an zénz bu heqte inkas qayturup mundaq dédi: "Xitay yashliri barghanséri rayondiki bixeterlikni saqlash sahelirige jelp qilinmaqta. Ular, Uyghur rayonini xuddi tibetke oxshash 'mukemmel saqchi döliti' ning bir qismi süpitide tutup turush üchün bu charilerni ishqa séliwatidu. Elwette, saqchiliq xizmiti adettiki memuriy xizmetlerge oxshimaydu. Istratégiyelik pilan nuqtisidin xitay hökümiti nahayiti ustiliq bilen az iqtisad serp qilip yuqiri ünümge érishishni oylimaqta. Xuddi hazir rayonda türkümlep qobul qiliniwatqan saqchilarning ish toxtami gheyriy-normal bolghinidek, saqchiliqqa yallan'ghuchilarning oqush tariximu gheyriy normaldur. Qiziqarliqi shuki, oxshash bir saqchiliq xizmitining rayon perqi we oxshimighan jughrapiyege qarap ish heqqiningmu köp perqlinidighanliqi melum. Bezi jaylar saqchilarni yuqiri teminat bilen teminlise, bezi jaylar az teminat bilen ishletmekte. Shimaldiki shixenze qatarliq jaylarda saqchilarning ma'ashi jenubtiki chet rayonlargha qarighanda nechche hesse yuqiri ikenliki melum."

Toluq bet