Shenshining süyjyago türmiside Uyghur rayonidin yötkelgen mehbuslar barliqi delillendi

Muxbirimiz shöhret hoshur
2019-02-07
Élxet
Pikir
Share
Print
Xéylongjangdiki teyley türmisining derwazisi.
Xéylongjangdiki teyley türmisining derwazisi.
Baidu

Aldinqi küni "Zimistan" tori Uyghur rayonidin xitay ölkilirige yötkelgen Uyghur tutqunlarning yötkilish jeryani we bashqurulush tüzümi heqqide bir qisim melumatlarni ashkarilighan we bu melumatlar ichide shenshining süyjyago türmiside Uyghur tutqunlarning barliqi tilgha élin'ghan idi. Muxbirimizning bu uchurgha asasen élip barghan éniqlashliri dawamida shenshining süyjyago türmiside Uyghur rayonidin yötkelgen mehbuslar barliqi delillendi.

"Zimistan" torining 3-yanwardiki xewiride éytilishiche, nöwette shenshi ölkisining tongchu'en shehiridiki süyjyago türmisige üch ming Uyghur tutqun yötkelgen. Yerlik ahalilerning "Zimistan" tori muxbirigha bildürüshiche, bu tutqunlar pütünley yépiq poyiz bilen bilen awwal shi'en shehirige, andin herbiy yük mashinisida süyjyago türmisige toshulghan. Xewer bilen teminligüchi yene Uyghur tutqunlarning pütünley kéchisi yötkelgenliki we da'irilerning türmidikilerge bu mehbuslargha munasiwetlik herqandaq uchurni dölet mexpiyetliki süpitide qarap sir saqlishi kéreklikini buyrughan.

Biz bu uchurning toghriliqini delillesh üchün awwal shenshi ölkilik j x nazaritige téléfon qilduq. Alaqidar xadim ehwaldin xewiri yoqluqini éytqandin kéyin, biz süyjyago türmisige téléfon qilduq. Nöwetchi xadim bu türmide Uyghur rayonidin yötkelgen mehbuslarning bar-yoqluqi heqqidiki so'alimizgha bu so'alni sorash we buninggha jawab bérishning "Siyasiy intizam mesilisi" ikenlikini bayan qildi. Biz uningdin bu türmidiki Uyghur tutqunlarning sanini soriduq. U bu melumatni alaqidar resmiyetlerni béjirgendin kéyin munasiwetlik xadimlardin sorishimiz kéreklikini, özining bu heqte melumat bérelmeydighanliqini éytti. Biz yene uningdin tutqunlarning Uyghur rayonidin qachan yötkep kélin'genlikini soriduq. Mezkur xadim bu melumatning mexpiyetlik ikenlikini, shunga dep bérelmeydighanliqini éytti.

"Zimistan" torining xewiride yene uchur yetküzgüchilerning bayanlirigha asasen Uyghur mehbuslarning qattiq nazaret qilinidighanliqi, ular hajet qilidighan jayghimu közitish kamérasi ornitilghanliqi, tutqunlargha künige bir waqla tamaq bérilidighanliqi bayan qilin'ghan. Biz süyjyago türmisidiki mezkur xadimdin Uyghur rayondin yötkelgen tutqunlar arisida ayallarning bar-yoqluqini soriduq. U bu so'algha jawab bérishning özining hoquq we mes'uliyet da'irisidin halqip kétidighanliqi, shunga jawab bérelmeydighanliqini éytti. Emma u 10 minutqa dawam qilghan téléfon söhbitimiz dawamida bu türmide Uyghurlar barliqini ret qilmidi. Biz süyjyago türmiside Uyghurlarning barliqini téximu aydinglashturush üchün shenshi ölkilik türme bashqurush idarisige téléfon qilduq. Biz uningdin süyjyago türmisining qeyerde ikenlikini sorighinimizda, u "Tongchüen shehiride" dep jawab berdi. Biz uningdin "Shinjangdin élip kélin'gen mehbuslar süyjyago türmisidimu?" dep sorighinimizda u "Toghra, shundaq" dep jawab berdi.

"Beydu" uchur ambirida körsitilishiche, süyjyago türmisi shenshi ölkisining tongchüen shehirige jaylashqan. 1958‏-Yili qurulghan süyjyago türmisi 1963- we 1979‏-yilliri ikki qétim kömür kan'gha özgertilgen. 30 Yilche kömürkan ornida ishlitilgen bu orun 1995‏-yildin bashlap tekrar türmige özgertilgen. Kölimi 2200 kwadrat métir, yeni 4 mo etrapida iken.

Toluq bet