Xoten sheherlik edliye idarisi xadimi: "Sheher ichide yighiwélish lagéridin üchi bar"

Muxbirimiz shöhret hoshur
2018-05-22
Élxet
Pikir
Share
Print
Kishilik hoquq weziyiti közetküchisi, jang shawn isimlik aliy mektep oqughuchisi twitérda xoten laskuydiki yighiwélish lagéri dep körsetken xeritisi.
Kishilik hoquq weziyiti közetküchisi, jang shawn isimlik aliy mektep oqughuchisi twitérda xoten laskuydiki yighiwélish lagéri dep körsetken xeritisi.
Social Media/Shown Zhang

Yéqinda kanadaliq bir aliy mektep oqughuchisi we kishilik hoquq weziyiti közetküchisi, xitay shirketlirining tor betliridin xitayning Uyghur rayonidiki yighiwélish lagérliri qurulushuni höddige bérish élanlirini tépip chiqti we buninggha asasen bir qisim lagérlarning orni we kölimi heqqide melumat berdi.

Muxbirimizning bu yéngidin bayqalghan lagérlarning ehwali heqqide rayondin ehwal éniqlishi dawamida, xoten sheher ichining özidila 3 orunda yighiwélish lagéri barliqi edliye idarisi xadimi teripidin delillendi.

Jang shaw isimlik kanadliq aliy mektep oqughuchisi deslepte qaghiliqning tétir yézisida qurulushi pilanlan'ghan yighiwélish lagérining höddige bérish uqturushini élan qilghan idi. U, uning keynidin yéngisarning qizil yézisida qurulmaqchi bolghan bir lagér heqqidiki uqturushni élan qildi. Uqturushta sélinidighan qurulushning kölimi 300 kwadrat métir, esliheliri bolsa sinip, yataq, muncha, hajetxana, mudapi'e témi we sim tosuq dep körsitilgen؛ qurulushqa jem'iy bir milyon 100 yüen meblegh ayrilghanliqi bildürülgen. Uqturushta, qurulushning nami "Qizil qanun tüzüm terbiyelesh mektipi", orni bolsa "Qizil yéziliq hökümetning yéni" dep körsitilgen. Uqturushta déyilishiche, bu qurulush pilani yéngisar nahiyelik hökümetning 55-nomurluq höjjiti bilen testiqlan'ghan.

Höjjette qurulushning chiqimi qizil yéziliq hökümetke yüklen'gen.

Höddigerlik élani bultur 7-ayda élan qilin'ghan bolup, lagér qurulushining tamamlinip bolghan yaki bolmighanliqini éniqlash üchün yéngisargha téléfon qilduq. Téléfonimiz xadimlar teripidin jawabsiz qalduruldi.

Oqughuchi jang shaw yene toqsu nahiyesi chiqarghan lagér qurulushi élaninimu tépip chiqqan. Élanda qurulushning kölimi 12789 kwadrat métir, yer üsti, ikki qewetlik dep körsitilgen؛ qurulushning nami "Bolsa toqsu nahiyelik kespiy iqtidar yétildürüsh merkizi" déyilgen.

Élanda bu qurulushqa 22 milyon yüen xirajet ayrilghanliqi bildürülgen. Élanda déyilishiche, bu qurulush pilani toqsu nahiyesining 2017-yili 49-nomurluq höjjiti bilen testiqlan'ghan.
Höjjette qurulushning nahiyelik edliye idarisi teripidin höddige bérilidighanliqi we xirajetning nahiye maliyesidin chiqirilidighanliqi bildürülgen.

Bu qurulush heqqidiki éniqlashlirimizmu, téléfon yollirining qisliqi we baghlanmasliqi, bolupmu uchur cheklimisining qattiqliqi sewebidin netijisiz qaldi.

Oqughuchi jang shaw tiwwitirda élan qiliwatqan yighiwélish lagérliri heqqidiki bu uchurlirida, xotendiki laskoy yighiwélish lagéri heqqidimu melumat bergen. Besh mingdin artuq adem barliqi melum bolghan bu lagér heqqide melumat élish üchün, xoten sheherlik edliye idarisige téléfon qilduq. Edliye idarisi xadimi xoten sheher ichidila 3 orunda yighiwélish lagéri barliqini ashkarilidi.

Muxbir: bu xotendiki qaysi idare?
Xadim: xoten sheherlik edliye idarisi.
Muxbir: hazir sheher ichide terbiyelep özgertish merkizidin qanchisi bar?
Xadim: üch orunda bar.
Muxbir: bularda jem'iy qanchilik adem bar?
Xadim: toxtap turung, matériyalgha bir qariwétey.

Xadim sheher boyiche lagérlarning we uningda yétiwatqanlarning omumi sani heqqidiki so'alimizgha deslepte jawab bérishke maqul kelgen bolsimu, arqidin jawab bérish niyitidin yéniwaldi.

Toluq bet