"Kursant" abdujélil abdukérim: gunahim inimning türkiyede oquwatqan oghligha pul sélish

Muxbirimiz shöhret hoshur
2017-08-22
Élxet
Pikir
Share
Print
Xitay hökümiti xotende ötküzgen "Térrorluq" qa qarshi qesemyad yighinlirining biridin körünüsh.
Xitay hökümiti xotende ötküzgen "Térrorluq" qa qarshi qesemyad yighinlirining biridin körünüsh.
Social Media

Ghulja nahiyilik yépiq terbiyilesh merkizide tutup turup terbiyiliniwatqan 1500 che "Kursant" arisida, chet'elde oquwatqan oqughuchilarning ata-aniliriningmu barliqi ashkarilandi.

Yardemchi kadirlar sunup bergen téléfon arqiliq muxbirimiz bilen sözleshken atalmish kursant abdujélil abdukérim, inisining türkiyede oquwatqan oghli mirzat abduréshitqa pul salghanliqi üchün tutulghanliqini we bu atalmish gunahi üchün terbiye körüwatqanliqini ashkarilidi. Mezkur merkezdiki yardemchi kadir abdujélilning inisi abduréshitningmu türkiyede oquwatqan shu oghli seweblik nöwette türmide ikenlikini bayan qildi.

Biz, ghulja nahiyilik yépiq terbiyilesh merkizige qarita élip barghan téléfon ziyaritimiz dawamida, bu merkezde tutup turuluwatqanlar arisida misir we türkiyedin qaytqan oqughuchilar we ularning a'ile-tawabi'atlirining bar-yoqluqi heqqidimu melumat soriduq.

Melum bolushiche, "Kursant" abdujélil abdukérim ghulja nahiyisining qash yézisidin. Uning inisi abduréshit abdukérimning oghli mirzat abduréshit, ikki yilning aldida türkiyege oqushqa kelgen. U til öginish kursigha qatnishiwatqan mezgilide chong dadisi abdujélil abdukérim uninggha birqanche nöwet banka arqiliq pul ewetken.

Bayanlardin melum bolushiche, abduréshit abdukérim oghlini türkiyege oqushqa yolgha salghanliqi üchün qamaqqa élin'ghan, abdujélil abdukérim pul ewetkenliki üchün terbiyilesh merkizige ewetilgen.

Bu peqet ghulja nahiyisidiki 5 yépiq terbiyelesh merkizidin biride, bir yardemchi kadir mes'ul bolghan 15 kishi ichidiki bir neperning bu merkezge kélish sewebi.

Ghulja nahiyesidiki yépiq terbiyilesh merkezliride terbiyiliniwatqan 1500 che kishining ichide yene qanchilighan abdujélil abdukérimlarning barliqi؛ yene qanchilighan abduréshit abdukérimlarning türmide ikenliki hazirche melum emes.

Toluq bet