Xitay yilqichi weqeside öltürülgenlerdin bir qismining kimlikini békitishte DNA siniqi qollan'ghan

Ashkarilinishiche, xitay saqchiliri aldinqi küni yilqichining 9- we 7-kentige bérip toxtimitaxun we séyit memetxan a'ilisidin DNA siniqi üchün ewrishke alghan. Yene melum bolushiche, shaxap yézisidiki bir qisim gumandarlar a'ilisi balilirini tépishqa mejburlinip soraqqa tartilghan we saqchixanilarda tutup turulmaqta. Bu ehwal xitay saqchilirining weqede öltürülgenlerdin bir qismining kimlikini téxichila békitelmeywatqanliqini ashkarilimaqta. Bu ehwal heqqide pikir bayan qilghan amérikida yashawatqan doxtur memet imin ependi, xitayning weqede gumandarlarni étip öltürüsh emes, belki ot qoyush yaki bombardiman qilish qatarliq wehshiylerche öltürüsh tedbirini qollan'ghanliq éhtimalini otturigha qoydi.

Biz bügün yilqichi yéziliq saqchixanining bir yardemchi xadimini ziyaret qilduq. Xadim özining yilqichining 9-we 7-kentlirige wilayettin kelgen saqchilarni élip barghanliqini, saqchilarning jesetlerning kimlikini aydinglashturush üchün mezkur ikki kenttiki toxtimitaxun we séyit memetxan a'ilisidin DNA siniqi üchün ewrishke alghanliqini pash qildi:
‏- Men öyning ichige kirmidim, sirtta saqlap turdum. Bu ikki a'ile weqege chétishliq gumandarlarning a'ilisi ikenliki we ulardin DNA siniqi üchün ewrishke élin'ghanliqidin xewer taptim؛ bashqa ishlarni sorimidim, sorashqimu bolmaytti. Bolun'ghan geplerdin qarighanda bezi jesetlerning kimliki téxiche aydinglashmighandek turidu.

Biz yene, shaxap yéza 12-kent partkom sékrétarini ziyaret qilghan waqtimizda, u saqchilarning jesetlerdin birining mezkur kenttiki mamut isimlik bir gumandargha a'it ikenlikini békitish üchün, uning nöwettiki iz-dérikini sürüshte qiliwatqanliqini bayan qildi. Shaxap yéza 2-kent sékrétari turadin tursun bolsa, özige da'iriler teripidin mezkur kenttiki 3 gumandarning weqede öltürülgenliki uqturulghanliqini, yene shundaq turuqluq saqchilarning mezkur ölgüchiler a'ilisige bérip gumandarlarning nediliki heqqide melumat bérishke qistawatqanliqini pash qildi:
‏- Men chüshinelmidim, ölüp bolghan ademni u nede dep yene sorawatidu. Ularning uruq- tughqanliri yéziliq yaki nahiyilik saqchixanilarda tutup turuluwatidu.

Xitay terepning weqede ölgüchilerning kimliklirini téxiche békitelmeywatqanliqi, jesetlerning tonughusiz halette zeximlen'genliki, weqede éghir tiptiki qorallarning qollan'ghanliq éhtimalliqini otturigha chiqarmaqta. Radi'omizgha bu heqte pikir bayan qilghan, nyuyorkta yashawatqan doxtur mehmet imin ependi, jesetlerning kimlikini békitish üchün DNA siniqigha éhtiyaj tughulushning özi weqede köydürüsh we partlitish qatarliq zeximlendürüsh wasitilirining yeni éghir tiptiki qorallarning qollinilghanliq éhtimalliqini ilgiri sürdi.

Bu heqtiki pikir we uchurlarning tepsilatini yuqiridiki awat ulinishidin anglaysiler.