Ju yungkang qatarliq emeldarlarning qanun organlirigha tapshurulghanliqi inkas qozghidi

Muxbirimiz méhriban
2015-01-09
Share
zhou-yongkang-ju-yongkang.jpg Xitay siyasiy qanun komitétining sabiq bashliqi ju yungkang xitay xelq qurultiyida. 2012-Yili 5-mart, béyjing.
AFP


Xitay merkizi intizam tekshürüsh komitétining 7 - yanwar charshenbe küni sabiq xitay emeldarliridin ju yungkang,,jang jémin, li dungshyang qatarliq chiriklik bilen eyiblen'gen emeldarlarning qanun orunlirigha tapshurulghanliqini élan qilishi metbu'atlarda jiddiy inkas qozghidi. Bu heptidiki xitay we xelq'ara metbu'atlarda ötken yili shi jinping bashlighan “Parixorluqqa zerbe bérish” herikitide bir terep qilin'ghan xitay emeldarlirining omumiy ehwali we bu heqtiki mulahiziler asasiy salmaqni igilidi.

Xitay merkiziy intizam tekshürüsh komitéti mu'awin sékrétari xu'ang shüshyen 7 - yanwar küni bayanat bérip xitay siyasiy qanun komitétining sabiq bashliqi, xitay j x ministiri ju yungkangning chériklik délosining edliye organlirigha resmiy tapshurulghanliqini ashkarilidi.

Ju yungkang we uning kéyinki ayalining 2013 - yil 12 - ayning 1 - küni tutqun qilin'ghanliqi 2013 - yil axiridiki xelq'ara metbu'atlarda ashkarilinip bolghan. Emma xitay hökümiti aridin bir yil ötüp yeni 2014 - yil 12 - ayning 5 - künige kelgende andin ju yungkangning chériklik jinayiti bilen qolgha élinip, partiyedin qoghlap chiqirilghanliqini bildürdi.

Xelq'ara taratqulardiki xewer we inkaslardin melum bolushiche, shi jinping textke chiqqandin buyan, u élip barghan “Chiriklikke zerbe bérish” herikitide, ju yungkangdin bashqa yene xitaydiki dölet derijilik emeldarlardin 10 nechchisi, ölke derijilik emeldarlardin 50 tin artuq kishi chiriklik bilen eyiblinip jazalan'ghan.

Xitayning shinxu'a agéntliqi we xitay merkizi téliwéziye istansisining 2015 - yil 7 - ,8 - yanwar künliridiki xewerliridin melum bolushiche, ötken bir yil ichide xitaydiki aliy derijilik hökümet emeldarliridin ju yungkang, jang jémin, li dungshyang, shü seyxu, ling jixu'a, surung, yang wéyzé, jang ünshéng, yang jingshen, gaw shiyawyüen, ma shiyangdung qatarliq ministir derijilik we herbiy générallar bolup 10 din artuq dölet derijilik emeldar, 50 tin artuq ölke derijilik emeldar chiriklik délosi bilen tekshürülüp qanun orunlirigha tapshurulghan. 2014 - Yili parixorluq we chirilik qilmishliri ashkarilinip bir terep qilin'ghan hökümet emeldarliri 53 minggha yetken. 70 Ming hökümet xizmetchisi chiriklik délolirigha chétilip, ular üstidin tekshürüsh élip bérilghan. Peqet 2014 - yilning kéyinki yérimida yeni 2014 - yil 7 - aydin 12 - ayghiche bolghan besh ay ichide chet'ellerdin xitaygha qayturup kélin'gen hökümet emeldarliri 680 neperge yetken. Xitay jama'et xewpsizlik ministiri 8 - yanwar peyshenbe küni élan qilghan bayanatida 2014 - yilning kéyinki yérim yilida chet'ellerdin qayturup kélin'gen chiriklik délosigha chétishliq emeldarlarning 2013 - yili bir yilda qayturup kélin'genlerning 4 hessisige barawer ikenlikini bildürgen.

2014 - Yili xitayda chiriklik délosigha chétilip bir terep qilin'ghan emeldarlar bolupmu, xitay siyasiy qanun komitétining sabiq bashliqi, xitay j x ministirliqining sabiq ministiri we xitay hökümitide eng yuqiri hoquq igiliri bolghan xitay kompartiyesi siyasiy byurusidiki 9 da'imiy hey'etning biri bolghan ju yungkangning, edliye organlirining bir terep qilishigha resmiy tapshurulghanliqi heqqidiki xewer xelq'ara metbu'atlarning 2014 - yildiki we yéngi yil kirgendin kéyinki eng qiziq diqqet nuqtisigha aylandi.

En'giliye b b s agéntliqining xewiride, ju yungkangning chiriklik qilmish derijisining uningdin ilgiri bir terep qilin'ghan bo shiley, shü seyxu, jang jémin qatarliq xitay emeldarlirining chiriklik qilmishidin köp éghir ikenliki tilgha élinip, eger bulturdin bashlap xelq'ara taratqularda ashkarilan'ghan ju yungkangning chiriklik qilmishi, ilgiriki ayalini bashqilar arqiliq qestlep öltürgüzüwétish jinayiti, xu jintaw, wén jyabaw qatarliq dölet emeldarlirining télifonini oghriliqche anglash, dölet mexpiyetlikini ashkarilash, nöwettiki xitay re'isi shi jinpinggha qest qilish qilmishliri sotta delillense, ju yungkanggha ikki yil kéchiktürüp ölüm jazasi, hetta ölüm jazasi bérilishi mumkinliki tilgha élindi.

Xelq'ara metbu'atlarning 2015 - yil yéngi yildin kéyinki xewerliride yene, ju yungkangdin kéyin, chiriklik bilen jazalinish éhtimali bolghan xitay emeldarliridin yene kimlerning pash bolushi we jazagha uchraydighanliqi qatarliq témilarmu qiziq nuqta bolmaqta.

Amérikidiki nopuzluq statéstika orgini bolghan “Yer shari iqtisadi adilliq munbiri” élan qilghan statéstikigha qarighanda, 2002 - yilidin kéyin, xitay emeldarliri we ularning uruq - tughqanlirining xitaydin qanunsiz halda chet'ellerge yötkigen pulning miqdari 1 tirilyon dollardin éship ketken.

Nöwettiki xelq'ara xewerlerde yene, ju yungkangning sabiq xitay re'isi jyang zéminning yéqinliridin ikenliki tilgha élinip, ju yungkang délosidin kéyin yene kimlerning jazalinishi we xitayda élip bériliwatqan “Chiriklikke zerbe bérish herikiti”ning axiriqi hésabta sabiq xitay re'isi jang zémin terepdarlirigha tutiship kétish éhtimalliqi heqqide perezler otturigha qoyulmaqta.

Washin'giton pochtisi gézitining 9 - yanwardiki sanida bésilghan xitaydiki chiriklik déloliri heqqidiki bir xewerde “ 2015 - Yil yéngi yil kirishi bilen xitay re'isi shi jinping bashlighan“Chiriklikke zerbe bérish herikiti” yene bir baldaq yuqiri kötürülüshi mumkin. Chünki shi jinping hazir chirik emeldarlarni tazilash herikitini xitay armiyisi, xitay jama'et xewpsizlik ministirliqi hetta xitay bixeterlik ministirliqi qatarliqlarghiche kéngeytti. 2014 - Yili xitayda dölet derijilik emeldarlardinla 10 nechchisi jazalandi. Emdi tigh uchi téximu yuqiri derijilik emeldarlargha toghrilinishi mumkinmu? ular kimler bolushi mumkin? 2015 - yili xitayning yuqiri derijilik emeldarlar qatlimida qandaq siyasiy dawalghush yüz béridu?” dégendek bayanlar bérildi.

Chet'ellerdiki xitay démokratlirining xewer menbeliridin boshün tori 9 - yanwar küni xitayning sabiq dölet re'isi jyang zéminning oghli jyang menxéngning xitay pen - téxnika akadimiyisining shangxey shöbisining bashliqliq wezipisidin qaldurulghanliqini xewer qildi. Chet'ellerde chiqidighan “Mingjing pochta géziti” ning 9 - yanwardiki sanida xitay dölet bixeterlik ministirining mu'awin bashliqi ma jyenning 8 - yanwar küni wezipisidin qaldurulup tekshürüshke tapshurulghanliqi xewer qilindi. Uningdin bashqa 31 - dékabir yéngi yil kéchisi shangxeyde yüz bergen 36 ademning dessilip ölüsh weqesige chétilip shangxeydiki emeldarlardin yene kimlerning jazalinishi mumkinliki heqqide her xil pezerler otturigha qoyulmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet