Розиниса мәмәттохти: "өз аиләмдикиләрниң әһвалини ‹қарақаш һөҗҗәтлири' дин билдим"

Мухбиримиз гүлчеһрә
2020-02-20
Share
rozinisa-muxbir-ziyariti-tughqanliri.jpg Түркийәдә яшаватқан қарақашлиқ розиниса мәмәттохти ахбаратларға "қарақаш һөҗҗәтлири" гә киргүзүлгән уруқ-туғқанлири һәққидә гуваһлиқ бериватқан көрүнүшләрниң бири. 2020-Йили январ.
Rozinisa teminligen

"қарақаш һөҗҗәтлири" дәп аталған йеңидин ашкариланған 137 бәтлик бу һөҗҗәт хотәнниң қарақаш наһийәсигә қарашлиқ бостан иҗтимаий райондики 650 дин артуқ аилигә четишлиқ 3000 дәк кишиниң архипи икән.

Униңда бу тәвәликтики пуқраларниң диний етиқади, күндилик турмуши, йүрүш-туруши, ипадиси, характери, кимлик номури, кәспий, чәтәлдики аилә әзалириниң исми, йеқин қолум-қошнилири вә улар билән болған алақиси, бу аилиләрниң ичидин тутқун қилинип, лагерға қамалған вә кесилгән кишиләрниң исимлири, уларниң қамилиш, кесилиш вә лагерларға қайта әвәтилиш сәвәби қатарлиқ нурғун инчикә тәпсилатлар хатириләнгән икән.

3 Йерим йилдин буян юрти қарақаштики аилиси билән алақиси пүтүнләй үзүлгән истанбулдики 3 балиниң аниси розиниса мәмәттохти уйғур зиялийси абдувәли аюпниң иҗтимаий таратқуларда тәрҗимә қилип тарқатқан "қарақаш һөҗҗәтлири" дики 358-номурлуқ архиптин өз сиңлиси патәм мәмәттохтиниң лагерда икәнликини билгән. У йәнә һәдиси розинияз мәмәттохтиниң 10 йил кесилгәнликини дадисидин телефон арқилиқ билгән. Һәтта розиниса өзиниң исми вә униң чәтәлгә чиқип кәткәнликиму сиңлиси патәм һәққидики 358-номурлуқ архипқа йезилған.

Мәзкур һөҗҗәт хитай ташқи ишлар министири ваң йи германийәниң мюнхен шәһиридә җаза лагерлириниң мәвҗутлуқини инкар қилип, арқидинла елан қилинди. Бу һөҗҗәт дуня җамаәтчиликигә хитайниң уйғур районидики җинайи қилмишлириға даир муһим дәлилләрни тәминлиди. "қарақаш һөҗҗәтлири" дики лагердикиләрниң архиплирида йәнә уйғурларниң намаз оқуғанлиқи, тәблиғ аңлиғанлиқи, сақал қойғанлиқи, һиҗабланғанлиқи, паспорт алғанлиқи, чәтәлгә чиққанлиқи вә диний йүзлиниши сәвәблик тутқун қилинғанлиқи хатириләнгән. Бу һөҗҗәтләрдә йәнә тутқунларниң юқириқи аталмиш "җинайәт" лириниң уларниң тутқун қилинип, лагерларға қамилиши яки кесилишигә йетәрлик "җинайи дәлил" дәп қаралғанлиқи ениқ көрситилгән. Һөҗҗәттики 358-номурлуқ архипта патәм мәмәттохтиниң пиландин артуқ бир бала көргәнлики сәвәблик 2018-йили 3-айниң 8-күни қарақаш 4-лагерға қамалғанлиқи ашкара болиду.

Розиниса "қарақаш һөҗҗәтлири" дәп аталған бу һөҗҗәтләрдин сиңлиси патәмдин башқа йәнә 597-номурлуқ һөҗҗәттин өз һәдиси розинияз мәмәттохтиниң түрмидә икәнликидин хәвәр тапиду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт