Ghulja sheherlik ma'arip idarisi xadimi sha'ir we fizik qasim sidiqning tutqunda ikenlikini delillidi

Muxbirimiz shöhret hoshur
2021-01-04
Share
Ghulja sheherlik ma'arip idarisi xadimi sha'ir we fizik qasim sidiqning tutqunda ikenlikini delillidi Jem'iyetning her sahe kishiliri arisida köp qiziqish we ghulghula peyda qilghan sha'ir we fizik qasim sidiq ependi. (Waqti we orni éniq emes)
Rahile Kamal teminligen

"Men shundaq qatilgha amraq" qatarliq lirik shé'irliri, "Zoqlan'ghuchilar pisixologiyesi" qatarliq ilmiy maqaliliri we "Boshluq nezeriyisi" témisidiki fizika tetqiqati bilen jem'iyetning her sahe kishiliri arisida köp qiziqish we ghulghula peyda qilghan sha'ir we fizik qasim sidiq 4 yildin buyan tutqunda ikenliki, ghulja sheherlik ma'arip idarisining xadimi teripidin delillendi

Közitishlirimizdin melum bolushiche, 2017 ‏-yildin étibaren, Uyghur jem'iyitidiki köpligen serkiler qatarida sha'ir we tetqiqatchi qasim sidiqningmu ilmiy munazire sorunliridin séymasi, tor bet we gézit-zhurnallardin ismi ghayib bolghan idi. Ghulja weziyitidin xewerdar kishilerdin biri ötken yilning otturiliri radiyomizgha uchur yollap, sha'ir qasim sidiqning2017 ‏-yili3-ayda tutup kétilgenliki we ta hazirghiche iz-dériki yoqluqini melum qildi. Inkasta eskertilishiche, qasim sidiq ilgiriki yillarda köp qétim soraq qilin'ghan we tutup qoyup bérilgen bolghachqa, 2017 ‏-yil 4‏-ayda sabiq gumandar we sabiq tutqunlar qatarida tutup kétilgen. Ghulja sheherlik hökümettiki alaqidar xadimlar qasim sidiq heqqide melumat bérishni ret qildi.

Nöwette shiwétsiyede yashawatqan "Ili kechlik géziti" ning sabiq tehriri, sha'ire rahile kamalning tonushturushiche, qasim sidiq ghulja sheher dadamtu ottura mektipide uzun mezgil edebiyat oqutquchisi bolghan. Kéyinki yillarda edebiyat-sen'et saheside musteqil teshkilatchiliq ishliri bilenmu shughullan'ghan. Shu yillarda "Bu kéche" qatarliq naxsha tékistliri seweblik köp awarichilikke uchrighan.

Tor arxipliridin melum bolushiche, yéqinqi yillarda qasim sidiq fizika saheside otturigha qoyghan yéngi pikir, yéngi nezeriyeliri bilen Uyghur jem'iyitide her sahe kishilirini tang qaldurghan. Emma tebi'iy pen sahesige bash chökürüp kirishken bolsimu, uni siyasiy boran-chapqunlardin qoghdap qalalmighan. Radiyomizgha kelgen inkasta déyilishiche, qasim sidiqning buningdin 10-15 yillar iligiri yazghan shé'ir we naxsha tékitsliri seweblik "Milliy qutratquluq" bilen eyiblen'gen.

Biz qasim sidiqning nöwettiki ehwali heqqide melumat élish üchün ghulja sheherlik ma'arip idarisige téléfon qilduq. Ularmu qasim sidiq heqqide melumat bérishni ret qildi.

Biz qasim sidiqning sabiq ish orni dadamtu ottura mektipige téléfon qilduq. Mektepning xitay mudiri mektepte nöwette qasim sidiq isimlik bir xizmetchisi yoqluqini bayan qildi, emma u bizning pénsiyege chiqqanlar arisida qasim sidiq dep birining bar-yoqluqi heqqidiki so'alimizni jawabsiz qaldurdi.

Rahile kamal qasim sidiqning kéyinki yillarda élan qilghan bir türküm tebi'iy pen'ge a'it ilmiy maqaliliri heqqide qisqiche melumat berdi.

Axirida téléfonimizni qobul qilghan ghuljadiki ma'arip idarisining bir xadimi sha'ir qasim sidiq heqqidiki so'alimizgha jawaben "Tutqundiki oqutquchilar heqqide melumat bérelmeymiz" déyish arqiliq sha'ir qasim sidiqning tutqunda ikenlikini wasitilik delillidi. Emma u qasim sidiqning qanche yilliq késilgenliki heqqide melumat bermidi.

Sha'ire rahile kamal qasim sidiqning özide untulmas tesir qaldurghan shi'irliridin biri süpitide, uning "Müshkül" namliq shi'irini oqup ötti.

Qilip, doq ey zulum köplep,

Yéshimni tükmiking müshkül.

Bésip yelkemni taghlarche,

Bélimni pükmiking müshkül.

Özüngge bu ayan heqtur,

Reqibingning hésabi yoq.

Démek textingde teshwishsiz,

Qaqahlap ötmiking müshkül.

Jahan okyanliri chongqur

Emestur shundimu tegsiz,

Özidin özgige rebbim,

Ömürdin bermigen cheksiz,

Zulum qilmishliring nurghun

Hésabi bar, buning sheksiz.

Hésap deptirini achsam,

Ölümsiz pütmiging müshkül!

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet