Türkiyedin qayturulghan zinnetgülning apisining tutqunda ikenliki, inisining a'iliside késel ikenliki ashkarilandi

Muxbirimiz shöhret hoshur
2020-08-03
Élxet
Pikir
Share
Print
Zinnetgül tursunning türkiyede turushluq iqamet kinishkisi we ikki perzenti.
Zinnetgül tursunning türkiyede turushluq iqamet kinishkisi we ikki perzenti.
Social Media

Türkiyedin qayturulghan we qamaqta tügep ketkenliki ilgiri sürülgen zinnetgülning ehwali heqqide yenimu ilgirilep élip barghan éniqlashlirimiz dawamida uning apisining 9 aydin béri lagérda ikenliki, inisining bolsa lagérda éghir késelge muptila bolghanliqi üchün qoyuwétilgenliki, emma a'iliside qaraydighan kishi qalmighachqa béqishsiz qalghanliqi ashkarilandi.

Türkiyedin tajikistan arqiliq xitaygha qayturulghan zinnetgülning se'udi erebistandiki hedisi güljennet singlisi heqqide qorqunchluq uchur alghandin kéyin, uchurning toghra-xataliqini aydinglashturush üchün birqanche aydin béri alaqe qilip baqmighan apisi roshen'gül yasin'gha téléfon qilghan؛ emma heptilerche qilghan téléfoni baghlanmighan. Shundaqtimu u zinnetgül heqqide alghan uchurda ikki balisigha anisi roshen'gülning qarawatqanliqi eskertilgenliki üchün anisining ehwalidin bek endishe qilip ketmigen. Emma éniqlashlirimiz dawamida alaqidar saqchi xadimliri zinnetgülning anisi heqqidiki so'allirimizgha jawab bérishtin özini qachurdi. Biz bu saqchi xadimi teminligen téléfon nomuri boyiche, yézidiki bu ehwaldin xewerdar ikki kent kadiri bilen alaqileshtuq. Bu xadimlar zinnetgülning anisi roshen'gül yasinningmu 9 aydin béri tutqunda ikenlikini ashkarilidi. Emma kent xadimliri roshen'gülning néme üchün tutulghaliqi heqqide uchur bérelmidi. Téléfonimizni qobul qilghan yene bir xadim, roshen'gülning tutulushida uning ilgiriki türkiye sepirining seweb bolghanliqini isharetlidi.

Güljennetmu ziyaritimiz dawamida apisining2015- we 2016-yilliri qanuniy yollar bilen türkiyege kelgenliki we özi we singlisi bilen körüshkenlikini bayan qildi. Güljennetning déyishiche, roshen'gül yasin shu chaghda ikki qizi bilen bir mehel türkiyede yashashni arzu qilghan bolsimu, yurtida qépqalghan oghli ibrahimdin endishe qilip yurtigha qaytqan iken. Melum bolushiche, roshen'gülning türkiye sepiri yerlik da'irilerge sir emes؛ uning néme üchün tutqun keng kölemde dawam qiliwatqan2017- we 2018-yilliri tutulmay 2019-yili, yeni zinnetgül türkiyedin qayturulup ikki aydin kéyin tutqun qilinishi güljennetni oygha salmaqta. U bu heqte singlisi zinnetgülning qamaqxanida éghir qéyin-qistaqqa élin'ghanliqi we soraq jeryanida anisining türkiye sepiri heqqide atalmish bir jinayetke iqrar qildurulghanliq éhtimalliqini perez qilmaqta.

Zinnetgülning apisining néme üchün tutulghanliqi we nede tutup turuluwatqanliqi heqqide ehwal éniqlashlirimiz dawamida zinnetgülning inisi ibrahimningmu ikki yil burun tutup kétilgen lagérdin éghir késel halette a'ilisige qoyup bérilgenliki, emma a'iliside adem qalmighachqa, uning késel halette béqishsiz qalghanliqi ashkarilandi. Démek, nöwette iz-dériki melum bolmaywatqan zinnetgülning süydungdiki a'ilisidin anisi roshen'gül yasin qamaqta, ikki balisi chong apisining qolida béqishta, lagérdin késel chiqqan inisi ibrahim öyide béqishsiz halette yétiqta. Nöwette se'udi erebistanida yashawatqan güljennet iz-dériki bolmaywatqan singlisi, qamaqtiki anisining ghéimidin bashqa yene lagérdin késel chiqqan inisining salametlik we iqtisadiy ehwalidinmu endishe qilmaqtiken.

Yuqirida türkiyedin tajikistan arqiliq qayturulghan zinnetgülning apisining tutqunda ikenliki, lagérdin késel chiqqan inisining a'iliside béqishsiz qalghanliqi heqqide anglitish berduq.

Toluq bet