Qazaqistanda xitaygha qarshi ikki qazaq öktichi tutqun qilin'ghan

Muxbirimiz gülchéhre
2019-12-11
Élxet
Pikir
Share
Print
"Dunya kishilik hoquq küni" qazaqistan dölet bixeterlik tarmaqliri teripidin tutup kétilgen qazaq kishilik hoquq qoghdighuchisi, "Ata yurt pida'iyliri" teshkilatining ichki kabinit ezasi kapar axat ependi.
"Dunya kishilik hoquq küni" qazaqistan dölet bixeterlik tarmaqliri teripidin tutup kétilgen qazaq kishilik hoquq qoghdighuchisi, "Ata yurt pida'iyliri" teshkilatining ichki kabinit ezasi kapar axat ependi.
Oqurmen teminligen

Qazaqistandiki "Ata yurt pida'iyliri" teshkilatining radiyomizgha yollighan uchurigha qarighanda, 10-dékabirdiki "Dunya kishilik hoquq küni" de ikki neper qazaq kishilik hoquq pa'aliyetchisi qazaqistan dölet xewpsizliki tarmaqliri teripidin tutup kétilgen.

Ularning biri "Ata yurt pida'iyliri" teshkilatining hey'et ezaliridin kapar axat, yene biri Uyghur élidiki lagérlargha qamalghan qazaqlar mesilisini qazaqistanda aktip anglitip kéliwatqan jumamurat shemshi iken.

Da'iriler gerche bularning tutqun qilinish sewebige chüshendürüsh bermigen bolsimu, emma eslidiki "Ata yurt pida'iyliri" ning gholluq ezaliridin güljan qazaq da'irilirining ularni tuyuqsiz tutqun qilish seweblirini anglatti. Uning bildürüshiche, ular qazaqistanda panahliq tiligen kastér musaxan we muraghér alimlarni qazaqistan terepning xitaygha qayturush qararigha qarshi chiqip, naraziliq bildürgen hemde bir qatar naraziliq pa'aliyetliri élip barghan iken. Ularning bu pa'aliyetliri qazaq da'iriliri teripidin tutqun qilinishigha seweb bolghan bolushi mumkin iken.

Güljanning chüshendürüshiche, "Ata yurt pida'iyliri" teshkilati bilen we kapar axat, jumamurat qatarliq bir qisim qazaq öktichi pa'aliyetchiler 9‏-dékabir küni almutada muxbirlarni kütüwélish yighini achqan. Ular eger qazaqistan terep muraghér alim'uli, qastér musaxan'uli isimlik bu ikki siyasiy panahliq tiligüchini xitaygha qayturup berse, ularning mutleq ten jazasigha uchraydighanliqi yaki öltürülidighanliqini tekitligen. Ular yene qazaqistan da'irilirining yuqiriqi ikki qazaq siyasiy panahlan'ghuchini xitaygha ötküzüp bérishni toxtitishi kéreklikini bildürgen.

Ular 27-noyabir bu toghrisida yene bir axbarat élan qilish yighini achqan idi. Ular bir qisim qazaq pa'aliyetchiliri we ammini bashlap yawropa ittipaqining qazaqistandiki ish béjirish ornigha bérip, mektup yollash arqiliq qazaqistan dölet xewpsizliki da'irilirining ikki neper qazaq siyasiy panahliq tiligüchini xitaygha qayturmasliq toghrisida yardem telep qilghan idi. Ular yene bu jeryanda amérika qatarliq gherb ellirining elchilirige xet yézish qatarliq pa'aliyetlernimu élip barghan iken.

8-Öktebir chöchekning dörbiljin nahiyesidin qéchip chiqip, qazaqistan chégrasigha kirgen muraghér alim'uli bilen qastér musaxan'uli 10-öktebirde almutada ötküzülgen axbarat yighinida özlirining xitay chégrasidin qanunsiz ötüp qazaqistan'gha chiqqanliqi, qazaqistan hökümitidin siyasiy panahliq telep qilidighanliqini élan qilghan idi.

Yéqinqi qazaqistan xewerliride ularning chégradin qanunsiz kirish bilen eyiblinip, nöwette tutup turuluwatqanliqi bildürülgen. "Azadliq" radiyosi qazaqistan dölet xewpsizliki komitétining mu'awin bashliqi darxan dilmanofning sözlirini neqil keltürüp ötken jüme küni bergen xewiride bu ikkiylenning xitaygha qayturulidighanliqini, ularning "Qazaqistanda qep qélish mumkinchilikining yoqluqi" ni ilgiri sürgen.

Uyghur élidin qazaqistan'gha köchüp chiqqan qazaqlar qazaqistan hökümiti we pütün dunya jama'itining, bolupmu amérika bashchiliqidiki gherb dunyasining zulumdin qachqan qazaqlargha ige chiqishni telep qilmaqtiken. Ular özliri xitaygha qayturulghanda milyonlighan kishilerge oxshashla lagérlargha qamilidighanliqi, hetta hayati xeter astida qalidighanliqini ilgiri sürüp, widiyoluq chaqiriqlarni élan qilip kelmekte.

"Ata yurt pida'iyliri" ning qurghuchisi sérikjan bileshning barliq pa'aliyetliri qazaqistan teripidin cheklen'gendin buyan uning xizmetlirini dawamlashturuwatqan orunbasari békzat mexsutxan ziyaritimizni qobul qilip, bu ikki neper pidakar qazaq kishilik hoquq pa'aliyetchisining sérkjandin kéyin tutqun qilin'ghan yene qazaq pa'aliyetchiliri ikenlikini bayan qildi.

Uning bayan qilishiche, kapar axat we jumamurat shemshi qatarliqlar hemde "Ata yurt pida'iyliri" ning naraziliqi bilen xelq ichidiki öktichilerning qarshiliq awazliri kücheygen. Buning netijiside yawropa ittipaqi, birleshken döletler teshkilati we amérika elchixanisi qazaqistan hökümitige mektup yollap, dörbiljin nahiyesidin qazaqistan'gha qéchip chiqqan muraghér alim'uli bilen qastér musaxan'uli xitaygha qayturulghanda ularning teqdirining intayin xeterlik bolidighanliqini agahlandurghan. Netijide ilgiri bu ikki qazaq panahlan'ghuchining "Qazaqistanda qep qélish mumkinchilikining yoqluqi" ni ilgiri sürgen qazaqistan dölet xewpsizliki komitétining mu'awin bashliqi darxan dilmanof bügün gépini özgertip "Qazaq xewer agéntliqi" gha ularning mesilisi éniqlinip bolghuche tutup turuluwatqanliqini, qazaqistanning ularni qayturmaydighanliqini bayan qilghan.

"Ata yurt pida'iyliri" teshkilatining nöwettiki mes'uli békzat özlirining resmiy adwokat tutup, qazaqistan sotigha erz sunush aldida ikenlikini bildürdi. U yene dunyadiki barliq taratqular we kishilik hoquqqa ehmiyet bergüchi hökümetlerning zulumgha uchrawatqan qazaqlarning heq-hoquqliri üchün küresh qiliwatqan qazaq pa'aliyetchilirining tutqun qilinishigha birdek awaz chiqirishini hemde ularni qoghdishini ümid qilidighanliqini bayan qildi.

Toluq bet