Qazaqistan puqrasi tursun'eli begdölet nilqa nahiyeside saqchilarning zorawanliqigha uchrighan

Nilqa nahiyesige tughqan yoqlashqa barghan qazaqistan puqrasi tursun'eli begdölet mushu ayning 23-küni xitay saqchilirining zorawanliqigha uchrighan. Tursun'elining nilqida turup xelq'ara jama'etke inkas qilishiche, saqchilar u chétilghan 2016-yildiki bir qatnash weqesini bahane qilip, uning pasportini tartiwalghan. Saqchilar uning pasportini tartiwélish jeryanida uni tokluq orunduqqa olturghuzush qatarliq qéyin-qistaq wasitilirini qollan'ghan. Töwende muxbirimiz shöhret hoshurning bu heqte teyyarlighan pirogrammisi diqqitinglarda bolidu.

 Tursun'eli begdöletning ijtima'iy taratqular arqiliq ehwal inkas qilishiche, u, bu yil 13-dékabir küni apisi we ayali bilen birlikte tughqan yoqlash üchün nilqa nahiyesige barghan. 23-Dékabir küni nilqa nahiyelik saqchi idarisige chaqirtilghan. U saqchixanigha barghinida, saqchi xadimlar uni yer asti soraqxanigha élip kirip, 2016-yili chétilghan bir qatnash weqesi heqqide soraq qilghan. Soraq jeryanida, uning qoli koyzilan'ghan, puti kishenlen'gen we tokluq orunduqqa olturghuzulghan. Soraqtin kéyin uning pasporti tartiwélin'ghan.

Tursun'elining qazaqistandiki qizi jana tursun'elining déyishiche, dadisi 2017-yili qazaqistan puqraliqigha ötken, arqidinla qazaqistandiki xitay elchixanisi arqiliq xitay puqraliqini emeldin qaldurghan. Xitay terep bahane qilghan qatnash weqesi bolsa, 2016-yili yüz bergen bolup, weqede tursun'elining mashinisi bir xitay köchmenning mashinisigha urulup ketken. Eyni chaghda ikki terep öz'ara kéliship mesilini tügetken.

 Jananing qarishiche, eger shu qétimliq qatnash weqeside rastinila dadisi jinayet sadir qilghan bolsa, uning qazaqistan'gha chiqishi cheklinishi, jinayet tarixi bolghini üchün pasportmu alalmasliqi kérek idi. Jananing déyishiche, ene shu qétimliq qatnash weqesidin kéyin we qazaqistan puqrasi bolushtin ilgiri, dadisi qazaqistan'gha 3 qétim bérip kelgen. Ene shu chaghda mezkur qatnash weqesi heqqide héchnéme démigen xitay saqchilirining emdilikte u qazaqistan puqrasi bolghandin kéyin, weqeni sürüshte qilishining ularda, mezkur qatnash weqesining bir bahane ikenliki, esli meqsetning uning xitay puqraliqidin waz kechkenlikige qarita bir öch élish ikenliki heqqide guman peyda qilghan.

 Tursun'eli begdöletning widiyoluq inkasida bayan qilinishiche, saqchilar uninggha ayali we 80 yashliq apisining aldida zorawanliq qilghan. U özining zorawanliqqa uchrighanliqi, insaniy qedir qimmitining depsende qilin'ghanliqini ilgiri sürüp, qazaqistan hökümiti we xelq'ara jama'ettin yardem sorighan.

 Nilqa nahiyelik saqchi idarisining xadimliri tursun'elining soraq jeryanida qiyin-qistaqqa uchrighanliqi heqqidiki so'alimizgha jawab bérishni ret qildi. Emma, tursun'elining pasportining tartiwélin'ghanliqini inkar qilmidi.

 Yuqirida qazaqistan puqrasi tursun'eli begdöletning nilqida xitay saqchilirining zorawanliqigha uchrighanliqi heqqide melumat berduq.