Қазақистандики уйғурлар роза-рамазан ейини хәйр-сахавәтлик ишлар билән узатмақта

Ихтиярий мухбиримиз ойған
2022-04-29
Share
Қазақистандики уйғурлар роза-рамазан ейини хәйр-сахавәтлик ишлар билән узатмақта
RFA/Oyghan

Қазақистандики уйғур җамаити һәр йили хасийәтлик рамазан ейи кириши билән иқтисадий әһвали начар аилиләргә, йитим-йесирларға, көп балилиқ аилиләргә вә мәҗруһ-мейип кишиләргә маддий һәм мәнивий ярдәм қилип, хәйр-сахавәтлик ишларни изчил давамлаштуруп кәлмәктә. Өткән икки йил давамида башқа мәмликәтләргә охшаш қазақистан һөкүмитиму корона вируси вабаси мунасивити билән рамазан ейида бир йәргә топлишип, иптар өткүзүш, бир-бирини йоқлаш вә башқиму һәр хил коллектип һәрикәтләрни мәний қилған иди,  әмма уйғур җамаити өзлириниң мундақ хәйр-сахавәтлик ишлирини бихәтәрлик чарилирини қаттиқ сақлиған һалда давамлаштуруп кәлди. Бу йил вәзийәт юмшиғанлиқтин уйғур аһалиси яшаватқан йеза вә шәһәрләрдә мундақ сахавәтлик ишлар әркин вә һәртәрәплимә елип берилди. Қазақистанлиқ уйғурлар әнә шундақ хәйр-сахавәтлик ишлар арқилиқ өзлириниң  өмликини, меһир-шәпқитини вә инсаний хисләтлирини намайиш қилмақта. Бу һәқтики хәвәрләр уйғур тиллиқ мәтбуатларда вә иҗтимаий таратқуларда давамлиқ берилмәктә. Бу йилму сахавәтлик ишлар адәттикидәк уйғурлар зич оттурақлашқан алмута шәһири, шуниңдәк алмута вилайитиниң панфилоф, уйғур, әмгәкчиқазақ, талғир, қарасай наһийәлиридә елип берилди. Бу ишлар уйғур мәдәнийәт мәркәзлири, йигит башлири, ханим-қизлар кеңәшлири, яшлар вә башқилар тәрипдин уюштурулмақта.  

Радийомиз зияритини қобул қилған җумһурийәтлик “уйғур авази” гезитиниң панфилоф наһийәси бойичә өз мухбири гөһәрбүви исмайилҗанова ханим роза-рамазан ейиниң дәсләпки күнлиридин башлапла наһийәдә хәйр-сахавәтлик ишларниң қизғин башланғанлиқини оттуриға қоюп, мундақ деди: “панфилоф наһийәлик уйғур етно-мәдәнийәт мәркизи йенидики ханим-қизлар кеңишиниң рәиси маһинур аюпованиң рәһбәрликидә, яркәнт тәвәсидики ханим-қизлар кеңәшлириниң әзалири бир йәңдин қол, бир яқидин баш чиқирип, тәминати начар, ялғуз башлиқ бимарларниң көңлини елиш мәқситидә иптарлиқ уюштурди. Шундақла панфилоф наһийәсиниң пәхрий пуқраси гүлҗаһан һаҗим муратова хәйрихаһлиқ ишлирини яркәнт тәвәсидин башлиди. Униң аилиси тәрипидин 300 аилигә йемәк-ичмәк тарқитилди.”

Guljahan muratova panfilof nahiyesidiki kheyri-sakhavetlik ishi ustide 2022-yil aprel.jpg

Гөһәрбүви исмайилҗанованиң ейтишичә, гүлҗаһан муратова җумһурийәт бойичә 750 аилигә ун, гүрүч, чай, майға охшаш йемәк-ичмәкликләрни тарқатқан. Йеқинда панфилоф наһийәсиниң һакими тәркибидики анилар кеңиши, тәдбирчан ханим-қизларниң рәһбәрликидә “биз биргәмиз” һәрикити даирисидә иптарлиқ берилип, мундақ сахавәтлик ишлар йәниму давамлашмақта.

Биз әмгәкчиқазақ наһийәлик уйғур етно-мәдәнийәт мәркизи рәисиниң орунбасари нурҗамал һасанова ханим билән алақилашқинимизда, у мундақ деди: “айларниң султани болған хасийәтлик рамазан ейиниң ахирқи күнлири челәк тәвәсидики йеза-йезилиримизда көп балилиқ аниларға, миллитимизгә узун йиллардин бери әмгики сиңип, һазир дәм елишқа чиққан мөтибәр анилиримизға, қаракөз нарисидәлиримизгә, турмушта түрлүк кесәлликләргә учрап, қийнилип қеливатқан анилиримизға маддий ярдәм бериш, мәсчитлиримиздә иптарға чақириш вә башқа хәйр-сахавәт ишлири елип бериш ишлири — әмгәкчиқазақ наһийәси челәк тәвәсидики барлиқ мәдәнийәт мәркизи шөбисиниң әзалири, йигит башлири вә ханим-қизлар рәислириниң бирлик һәм өмлүктә юртдашларниң көңлини елиш үчүн алдимизға қойған яхши нийәтлиримиз һәм вәзипимиздур.”

Нурҗамал һасанова йәнә җумһурийәтлик уйғур етно-мәдәнийәт мәркизи тәркибидики йигит башлири кеңишиниң рәиси долқунтай абдухелилниң бу йилму челәк тәвәсидики юртларға 60 севәт озуқ- түлүк вә мөтибәр аниларға онға йеқин гиләм ианә қилғанлиқини тәкитлиди. У йәнә милләтпәрвәр инсан билал һошурофниң челәк йезисиниң мәркизигә җайлашқан қәбристанлиқниң әтрапини аватлаштурушқа һамийлиқ қилғанлиқини билдүрди. Нурҗамал һасанова әнә шундақ инсанларға юрт-җамаәт намидин миннәтдарлиқ билдүрүп, уларға хатирҗәмчилик, ишлириға утуқ вә бәрикәт тилиди.

Игилишимизчә, йеқинда қазақистан президенти қасим-җомарт тоқайеф роза тутқанлар үчүн иптарлиқ бәргән. У йиғилғанларға мураҗиәт қилип, иптарлиқниң хәлиқниң бирлики вә гүллинишини көрситидиған яхши әнәнә икәнликини, исламниң тинчлиқ вә инсанпәрвәрлик қәдрийәтлирини тәрғиб қилидиған,  адәмләрни иттипақлиққа чақиридиған дин икәнликини тәкитлигән, шундақила қазақистандики барчә пуқраларға бирлик вә хатирҗәмлик тилигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт