Қазақистан уйғурлири роза-рамзан ейида хәйр-сахавәт паалийәтлирини күчәйтмәктә

Ихтиярий мухбиримиз ойған
2021.04.29
Қазақистан уйғурлири роза-рамзан ейида хәйр-сахавәт паалийәтлирини күчәйтмәктә Қазақистанлиқ уйғурларниң роза рамзан ейида йүргүзгән хәйр-сахавәт паалийәтлиридин көрүнүш. 2021-Йил, апрел, алмута.
RFA/Oyghan

Мәлумки, пүткүл дуня мусулман әһлиниң бу йилқи рамзан ейи хитайниң уйғур елидә мәсчитләрни чеқип, қәдимидин тартип ислам диниға етиқад қилип келиватқан уйғур вә башқиму мусулман хәлқләрниң диний әнәнилирини, һәқ-һоқуқлирини дәпсәндә қиливатқан бир вақитқа тоғра кәлгәниди. Демократик әлләрдә яшаватқан уйғурлар билән бир қатарда қазақистандики уйғурларму бу йили роза тутуп, өзлириниң мусулманлиқ бурчини ада қилмақта һәм өз дуалирида барлиқ мусулман қериндашлириға арзу-арманлириниң, истәк-хаһишлириниң орунлинишини тилимәктә. Қазақистандики уйғурлар һәр йилқидәк бу йилқи роза рамзан ейидиму хәйр-сахавәтлик ишлирини елип берип, өзлириниң инсаний бурчини орунлимақта.

Игилишимизчә, рамзан ейи кириши биләнла қазақистанниң һәр қайси җайлирида яшаватқан уйғурлар хәйрхаһлиқ паалийәтлирини кәң яйдурғаникән. Кейинки вақитларда дуняға тариған корона вируси вабасиниң күчийип, аһалиниң саламәтликигә чоң хәвп туғулғиниға қаримай, милләт җанкөйәрлири бихәтәрлик чарилирини қаттиқ сақлиған һалда, турмуш-тирикчилики начар аилиләргә, қери-чөриләргә, йетим-йесирларға, мәҗруһ инсанларға, тәбиий апәтләрдин зәрдаб чәккәнләргә маддий ярдимини көрсәтмәктикән. Бу һәрикәтләр мәтбуатларда, иҗтимаий таратқуларда йорутулуп, көпчиликниң алқишиға сазавәр болмақта.

Қазақистанлиқ уйғурларниң роза рамзан ейида йүргүзгән хәйр-сахавәт паалийәтлиридин көрүнүш. 2021-Йил, апрел, алмута.

Биз алмута вилайити уйғур наһийәсиниң мәркизи чонҗа йезисиға орунлашқан уйғур наһийәлик уйғур мәдәнийәт мәркизиниң катипи гүлминәм тохтайева ханим билән алақиләшкинимиздә, у мундақ деди: “уйғур наһийәсиниң хәлқиму алийҗанаб ишлардин чәттә қалғини йоқ. Мәсилән, турмуши төвән аилиләргә һәр йили қол учини сунуп келиватқан җанкөйәрлиримиз, атап ейтқанда, аруп ака шәрипоф 50 халта ун, май тарқатқан. Тиҗарәтчи қериндашлиримиз өйму-өй меңип йүрүп, хәлқимизниң һалидин хәвәр елип, йеқиндин ярдәм көрсәтмәктә. Буниңдин башқа йеза-йезиларда яшлар бирлишип, иқтисади төвән аилиләргә йемәк-ичмәк тарқитишни адәткә айландурған. Бу болсиму, яшлиримизниң инсанпәрвәрлики вә инақлиқини испатлайду”.

Мәлуматларға қариғанда, қазақистандики уйғурлар җумһурийәтлик уйғур етно-мәдәнийәт мәркизи вә униң шәһәр, наһийә, йеза-мәһәллиләрдики шөбилири әтрапиға топлишип, көплигән мәдәний ишларни әмәлгә ашуруп келиватмақтикән. Әнә шу җумһурийәтлик уйғур етно-мәдәнийәт мәркизиниң иҗраий мудири зухруллам қурванбақийеф әпәндиниң ейтишичә, җумһурийәтлик уйғур етно-мәдәнийәт мәркизиниң шәһәрлик шөбиси рәисиниң орунбасари “метал пром групп” ширкитиниң мудири долқунтай абдухелил билән алмута вилайәтлик уйғур мәдәнийәт мәркизиниң рәиси, вилайәтлик алий кеңәш әзаси, қазақистан хәлқи ассамблейәси рәисиниң орунбасари закирҗан қузийефлар һәр йили роза рамзан айлирида хәйрхаһлиқ ишлирини давамлиқ йүргүзүп туридикән.

Зухруллам қурванбақийеф мундақ деди: “бу йилиму закирҗан билән долқунтай иккиси 2 миң турмуши начар аилиләргә ярдәм қолини сунуп, ишлирини башлиди. Биз, мәркәз ичидики адәмләр мушу икки һөрмәтлик инилиримиз билән бирликтә аилиләргә тарқитип, мәдәнийәт мәркизиниң сахавәтлик ишлирини көрситишни башлидуқ. Буниңдин башқа бу иккиси мәктәпләрниң йетишмәйватқан дәрсликлири бойичә нурғунлиған ярдәмләрни көрситип келиватиду. Улар хәйрхаһлиқ ишлардин башқа дөләт ичидики нурғунлиған программиларға ярдимини көрситип келиватиду. Шуниңға бағлиқ ассамблейә рәһбәрлири икки инимизниң ишлирини баһалап, хәлқимизни хушал қиливатиду”.

Радийомиз зияритини қобул қилған алмута вилайитиниң талғир наһийәлик уйғур мәдәнийәт мәркизиниң рәиси иминҗан тохтахуноф әпәнди мундақ деди: “роза айниң ичидә җаһангир анимиз нәччә йиллар болди 80 нәччә йетим-йесирға өй селип келиватиду. Шундақла талғир наһийәсигә ярдәм қилип келиватиду. Йеқиндила җаһангир анимиз 40 аилигә розилиқ тамақларни тарқатти. Шуниң билән йәнила шу гүлдала йезисида ‛нозугум‚ топи 20 аилигә, алийәм алийева 30 аилигә таратти. Калинин, йәни һазирқи туздибастав йезисида, наһийә бойичә яшларниң йигит беши зумрәт инимизниң ‛тәклимакан‚ гурупписи күндә дегүдәк иптарлиқ тамақларни тарқитиватиду. Қизил ғәйрәт мәһәллисидә роза башланғандин бери бир милйон пул йиғип қойдуқ. Йәнә бу йәрдә от кәткән бир өй бар. Роза питирини шу йәргә йиғиватиду”.

Игилинишичә, қазақистанлиқ уйғурлар хәйрхаһлиқ паалийәтләрни йүргүзүш җәрянида башқа милләт вәкиллириниму чәттә қоймай келиватмақтикән. Өткән йилларда уйғур җәмийәтлик бирләшмилири, айрим милләт җанкөйәрлири, юрт-җамаәтчилик қазақистанниң һәр қайси районлирида йүз бәргән тәбиий апәтләрдин зәрдаб чәккәнләргә чоң миқдарда маддий ярдәм қилғанкән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.