Қазақистанлиқ уйғур тәнһәрикәтчилири хәлқара гимнастика мусабиқисидә чемпийон болди

Алмутадин ихтиярий мухбиримиз ойған тәйярлиди
2024.06.01
altun-medal-nariman-1 Гимнастика бойичә дуня мусабиқисидә алтун медалға еришкән нариман қурбаноф(оттурида). 2024-Йил май, булғарийә.
RFA/Oyghan

Қазақистандики уйғур яшлириниң илим-пән, маарип, әдәбият, сәнәт, ишләпчиқириш, шуниң билән бир қатарда тәнһәрикәт саһәсидиму чоң нәтиҗиләрни қолға кәлтүрүп, қазақистанниң шан-шәрипини қоғдаватқанлиқи һәмдә шуниң билән бирликтә уйғурларниму дуняға тонутуватқанлиқи мәлум.

Бир нәччә йиллардин буян уйғур тәнһәрикәтчилири бокс, кик-боксиң, йәни пут-қолни тәң ишқа селип әркин муштлишиш, карате, йәни қаидисиз челишиш, биразилийәчә җуҗитсу, йәни әркин челишиш вә муштлишиш, вушу-сәнда, йәни чамбашчилиқ, әркин муштлишиш, гимнастика вә башқиму түрлиридин асия вә дуня чемпийони дегән юқири атақларға еришмәктә.

Қазақистан мәтбуатлири вә иҗтимаий таратқулиридин мәлум болушичә, кейинки вақитларда қазақистанлиқларниң вә дуняниң һәр қайси дөләтлиридә яшаватқан уйғурларниң диққити гимнастика бойичә дуня мусабиқилиридә зор нәтиҗиләр қазиниватқан уйғур тәнһәрикәтчилиридә болмақта. Болупму талантлиқ гимнастикичи нариман қурбанофниң бу йил фирансийә пайтәхти парижда өткүзүлидиған олимпик мусабиқисигә қатнишидиған салаһийәтни қолға кәлтүрүши көпчиликни чоң хушаллиққа чөмдүрди. Мушу йеқинда уйғур тәнһәрикәтчилири өз һәвәскарлирини йәнә бир қетим хушал қилди.

Гимнастика бойичә дуня мусабиқисидә мис медалға еришкән һәсән сәлимоф(солдин биринчи). 2024-Йил май, булғарийә.
Гимнастика бойичә дуня мусабиқисидә мис медалға еришкән һәсән сәлимоф(солдин биринчи). 2024-Йил май, булғарийә.
RFA/Oyghan

Қазақистанниң әң инавәтлик аммиви ахбарат васитилириниң хәвәр қилишичә, қазақистанлиқ гимнастикичилар йеқинда булғарийәниң варна шәһиридә болуп өткән гимнастика бойичә дуня мусабиқисидә үч медал утувалған. Шу җүмлидин нариман қурбаноф тәнһәрикәтниң аз учрайдиған яғач атта оюн көрситиш түри бойичә 15.433 Номур билән алтун медалға, гимнастикиниң әркин түридә, йәни гиләмдә вә яғач атта оюн көрситиш, сәкрәш, чәмбәрдә есилип оюн көрситиш түрлири бойичә димитрий потанин 14.033 Номур билән күмүш медалға, һәсән сәлимоф болса, 13.533 Номур билән мис медалға еришкән.

Биз гимнастика бойичә дуня чемпийони һәсән сәлимоф билән алақиләштуқ. У зияритимизни қобул қилип мундақ деди: “гезәк сиңлим иккимиз йәттә яшқа кирип, биринчи синипқа кәлгәндә дадам бизни һүсән шерип оғлиға елип кәлди. У чағда һүсән шерип оғли интайин абруйлуқ мәшғулатчи болуп, кичик балиларни тәрбийәлимәйтти. У пәқәт қазақистан талланма командисиға киргән чоңларни тәрбийәләйтти. Дадам униң билән узун йиллар йеқин болғанлиқтин һүсән шерип оғли дадамға пәқәт яхши мәслиһәтини берип турди. Йәни шу вақиттики талантлиқ яш мәшғулатчи виталий казансефни тонуштурди. Шуниң билән мән шуниң қолида тәрбийәләндим. Бу җәрянда мениң ипадәм яхши болди. Башқиларму мениң кичикимдин чоң үмид күтти”.

Гимнастика бойичә дуня мусабиқисидә мис медалға еришкән һәсән сәлимоф. 2024-Йил май, булғарийә.
Гимнастика бойичә дуня мусабиқисидә мис медалға еришкән һәсән сәлимоф. 2024-Йил май, булғарийә.
RFA/Oyghan

Һәсән сәлимоф алтә йил виталий казансефниң қолида мәшиқлинип, һәқиқәтәнму чоң нәтиҗиләрни көрситишкә башлиған. Униң қабилийитини башқилар қатарида атақлиқ мәшғулатчи, дуня чемпийони нариман қурбанофниң дадиси һүсән қурбанофму байқиған.

Һәсән сәлимоф йәнә мундақ деди: “һүсән шерип оғли ‛һәсән чоң болуп, мениң шагиртлирим дәриҗисигә йәткәндә мән уни өзүмгә еливалимән‚ дегәниди. Һәқиқәтәнму шундақ болди. 13-14 яшлиримда мән униң командисиниң тәркибигә кирдим. Арида хушаллиқларму болди, рәнҗишләрму болди. Әмма вақитниң өтүши билән бир-биримизни чүшинип кәттуқ. Һүсән шерип оғлиниң йетәкчиликидә мән мушу йили март ейида түркийәниң анталя шәһиридә өткүзүлгән дуня мусабиқисидә алтун медалға, йеқинда булғарийәдә өткән дуня мусабиқисидә мис медалға ериштим. Мән мушу икки мәшғулатчилиримға вә даим маңа үмид-ишәнч беғишлиған ата-анамға, йеқинлиримға рәһмитимни ейтимән вә йәниму юқири пәллиләргә йетишкә тиришимән”.

Һәсән алимҗан оғли сәлимоф 2004-йили алмута шәһиридә дуняға кәлгән. Төт балилиқ аилиниң атиси алимҗан барлиқ балилирини кичикидинла гимнастикиға бериш үчүн һүсән қурбанофқа елип кәлгән. Чоң оғли адил дәсләптә гимнастика бойичә шуғулланған болсиму, кейин тәнһәрикәтниң әркин челишиш түригә қизиқишқа башлиған. Иккинчи оғли әзизму он бир йил давамида гимнастика бойичә шуғуллинип, тәнһәрикәт маһири дәриҗисигә еришкән. Лекин кейин бу саһәни ташлап, башқа кәсипкә алмашқан.

“кентавр” қабилийәтлик тәнһәрикәтчиләргә ярдәм қилиш җәмийәтлик фондиниң рәиси, қазақистанниң хизмәт көрсәткән тиренери, нариман қурбанофниң устази мәхмут искәндәроф әпәнди зияритимизни қобул қилип, һазир һәсән сәлимофниң һәрбий хизмәтни өтәшкә тәйярлиқ қиливатқанлиқини, қәсәм бериш мурасимидин кейин уни өз командисиға елип, мусабиқигә тәйярлайдиғанлиқини билдүрди.

У мундақ деди: “һәсән яш бала. 3-Орун бу яш балиға наһайити пайдилиқ болди. Шуниң үчүн бу, биз үчүн хушаллиқ. Бизниң илияс әзизоф торникта путини урувелип, җараһәт алди. Һазир аста-аста мәшиқлиниватиду. Үч йигитимиз бар. Улар хәлқара дәриҗидики тәнһәрикәт маһирлири. Биз улардин пәхирлинимиз. Нариман олимпик мусабиқисигә қатнишиду. Бу тарихта биринчи қетим болуватиду десәк болиду. Бизниң у йәрдиму бир медалға игә болиду дегән ойлиримиз бар. Сәвәби буни биз чиқармаймиз, бәлки гимнастика бойичә хәлқара бирләшминиң башлиқлири анализ қилип, уни биринчи орунға қойиду. Бирақ униңға игә болуш керәк. Буниңға икки ай қалди”.

Зияритимизни қобул қилған қазақистан командисиниң әзаси, гимнастика бойичә хәлқара тәнһәрикәт маһири нариман қурбаноф булғарийәдә өткән мусабиқә һәққидә мундақ деди: “ахирқи икки һәптидә мән икки чоң мусабиқигә қатнаштим. Биринчиси, ташкәнттә өткән асия мусабиқиси. Бу мусабиқә пәқәт мән үчүнла әмәс, бәлки бизниң команда үчүнму интайин муһим болди. Чүнки мән алтун медалға еришип, чемпийон болдум вә командамға юқири нәтиҗиләрни елип кәлдим. Мусабиқигә дуняниң күчлүк тәнһәрикәтчилири қатнашти. У йәрдин ташкәнткә бардим. Асия мусабиқисигә дуняниң 30 ға йеқин мәмликитидин 80 гә йеқин гимнастикичи қатнашти. Әмди мана парижда өтидиған олимпик мусабиқисигә тәйярлиқ көрүватимән”.

Игилишимизчә, қазақистанниң шан-шәрипини қоғдаватқан уйғур тәнһәрикәтчилириниң қолға кәлтүрүватқан утуқлири қазақистан вә дуня мәтбуатлирида, шуниңдәк иҗтимаий таратқуларда давамлиқ ейтилип кәлмәктә. Һазир уларниң кәйнидин өсүп йетиливатқан яш тәнһәрикәтчиләрниңму мусабиқиләрдә көрситиватқан нәтиҗилири қазақистанлиқ уйғурларни хушал қилмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.