Қазақистанлиқ уйғур боксчи шайим елиҗаноф: «хушал болушқа техи әтигән, алдимда йәнә мусабиқәм бар»

Ихтиярий мухбиримиз ойған
2019-12-12
Елхәт
Пикир
Share
Принт
Җәнубий қазақистандики чимкәнт шәһиридә болуп откән кәспий бокс бойичә асия мусабиқисидә уйғур боксчи шайим елиҗаноф 66 килограмлиқлар бойичә чемпийон болди. 2019-Йили 6-декабир.
Җәнубий қазақистандики чимкәнт шәһиридә болуп откән кәспий бокс бойичә асия мусабиқисидә уйғур боксчи шайим елиҗаноф 66 килограмлиқлар бойичә чемпийон болди. 2019-Йили 6-декабир.
RFA/Oyghan

Қазақистанлиқ уйғурларниң тәнһәрикәтниң һәр хил түрлири бойичә хәлқара вә дуня мусабиқилиригә қатнишип, зор нәтиҗиләргә еришиватқанлиқи мәлум.

«Карате», йәни қаидисиз челишиш, «вушу-санда», йәни чамбашчилиқ, «хоккей», йәни муз топ оюни, путбол, гимнастика, йәкму-йәк муштлишиш, «кикбоксиң», йәни әркин муштлишиш, бразилийәчә җю-җитсу, йәни әркин челишиш вә муштлишиш һәмдә башқилар шуларниң җүмлисидиндур. Бокс шулар ичидики әң аммиви тәнһәрикәт түрлириниң бири болуп, уйғур тәнһәрикәтчиләр бу түрдиму тиришчанлиқ көрситип кәлмәктә.

6-Декабирда җәнубий қазақистандики чимкәнт шәһиридә кәспий бокс бойичә асия мусабиқиси болуп өтти. Мусабиқигә оттура асиядики бәш җумһурийәтниң, йәни қазақистан, өзбекистан, қирғизистан, таҗикистан вә түркмәнистанниң әң күчлүк тәнһәрикәтчилири иштирак қилди. Мәзкур мусабиқигә қатнашқан қазақистанлиқ команда тәркибидә уйғур йигити шайим елиҗанофму бар болуп, у 66 килограмлиқлар бойичә чемпийон болди.

Биз алмута вилайити әмгәкчиқазақ наһийәсиниң қараторуқ йезисида яшаватқан шайим елиҗаноф билән алақиләштуқ. У радийомиз зияритини қобул қилип, өзи тоғрилиқ мундақ деди: «мән 3-синиптин башлап боксқа бардим. Нурәхмәт разийеф мениң биринчи тренерим болиду. Шуниң қолида тәрбийәләндим. Мән голофкин, елиҗаноф вә башқиму олимпик чемпийонларға һәвәс қилаттим, уларға қарап қизиқишим техиму күчәйди. Мән көплигән наһийәлик, җумһурийәтлик, хәлқара мусабиқиләрниң чемпийони болдум. Кәспий бокс бир аз қийинрақ болиду. Чимкәнттә биринчи болдум. Хушал болушқа техи әтигән, алдимда йәнә йәкмуийәк елишишлирим бар.»

Шайим елиҗаноф келәчәктә дуня мусабиқилиригә қатнишип, буниңдинму чоңрақ утуқларға еришиш армининиң бар икәнликини, уйғур боксчилиридин, болупму уйғур елидики һәм шундақла қазақистандики кәспий боксчи дилмурат миҗитофни үлгә тутидиғанлиқини оттуриға қойди. У йәнә өз тренерлири нурәхмәт разийеф, һемит тохтахуноф, роман сәйдуллайеф вә башқиларға чоң миннәтдарлиқини билдүрди.

Шайим камил оғли елиҗаноф 1992-йили алмута вилайитиниң әмгәкчиқазақ наһийәсигә қарашлиқ қараторуқ йезисида дуняға кәлгән. У кичикидин тәнһәрикәтниң бокс түригә қизиқип, тунҗи қетим әнә шу қараторуқ йезисиниң авут саттароф намидики оттура мәктипидә паалийәт елип бериватқан бокс кулубиға барған. У бир нәччә йил давамида бокс маһири нурәхмәт разийефниң қолида мәшиқлинип, көплигән мусабиқиләргә қатнашқан. Андин алмута шәһиридә теббий мәктипидә оқуватқан үч йил мабәйнидә тәнһәрикәт оқутқучиси досим дюсенбайефниң қолида мәшиқләнгән. Кейинки йиллири у тәнһәрикәт маһири, «фри спарриң» кулубиниң баш тренери һемит тохтахунофниң қолида тәрбийиләнди. Шайим елиҗаноф мушу йили түркийәдә өткән мусабиқиләргә қатнишип, яхши нәтиҗиләрни көрсәтти. Кейинирәк у чимкәнт шәһиридә роман сәйдуллайеф йетәкчиликидә мәшиқлинип, тәҗрибә алмаштурған иди. Сентәбир ейида чимкәнт шәһәрлик телевизийә қанилиниң «очуқ сөһбәт» программиси уни сөһбәткә чақирған. Униң тренери роман сәйдуллайеф вә кәсипдашлири яш боксчиниң талантиға юқири баһа берип, униң чоқум қазақистан туғини хәлқарада ләпилдитиғанлиқиға ишәнч бағлиған иди.

Радийомиз зияритини қобул қилған шайимниң аниси, авут саттароф намидики мәктәпниң муәллими сабирәм шәмийева мундақ деди: «шайим аилимизниң оттуранчи оғли. Шайим 8 йешидин боксқа қизиқип, қараторуқ мәһәллисидә бокс кулуби ечилғандин кейин беришқа башлиди. Мәктәптә оқуп йүргән вақитлирида наһийәлик, областлиқ, җумһурийәтлик мусабиқиләргә қатнишип, һәр қачан биринчи орунни алсамла дәп йүрәтти. Бирақ барған йеридин у медалсиз қайтип кәлмәйтти. У яз бойи чимкәнттә мәшиқ билән шоғулланди вә 6-декабирда өзиниң биринчи бәлвеғини елип кәлди.»

Сабирәм шәмийева қараторуқтин 30 әтрапида бокс һәвәскарлириниң чимкәнт шәһиригә берип, шайимни һәртәрәптин қоллап, уни роһландурғанлиқини, буниң пәқәт бир аилә әмәс, бәлки пүткүл қазақистан уйғурлириниң утуқи вә хушаллиқи болғанлиқини билдүрди.

Шайим елиҗанофниң биринчи тренери нурәхмәт разийефниң ейтишичә, шайим елиҗаноф бокс билән шоғулланған дәсләпки вақтидин башлапла яхши нәтиҗиләрни көрситип кәлгән икән. У мундақ деди: «елиҗаноф шайим наһийәлик, областлиқ, хәлқара мусабиқиләрдә чемпийон болуп йүргән. У 10-синипни пүттүрүп кәткәндин кейин, алмутаға берип, ишқа орунлишип, һемит тохтахуноф, сағатбек мусаханофта мәшиқлинишни давамлаштуриду. Андин түркийәдә болуп, у йәрдин қайтип кәлгәндин кейин чимкәнттә бәлвағни елип кәлди. Униң билән бир қатарда ренат қурбаноф кикбоксиң бойичә дуня мусабиқисидә иккинчи орун елип кәлди. Буниңдин ташқири разийеф наил, мәрүпоф руслан, исрапул ислам, мухпулоф зуляр қатарлиқ балилирим чемпийон болди.»

Мәлум болушичә, һазир нурәхмәт разийефниң қол астида 30 ға йеқин бала бокс бойичә мәшиқлиниватқан болуп, улар арисида өсүп келиватқан һәмдә келәчикидин зор үмид күтүлүватқан һәр милләт вәкиллири бар икән. Униң шагиртлири ичидә уйғур қизлириму болуп, мәсилән, шаһназ таһирова алмута шәһири бойичә чемпийон болуп, һазир җумһурийәтлик мусабиқигә тәйярланмақтикән.

Пикирләр (0)
Share
Толуқ бәт